كورده‌يل فه‌يلى.. ئايا چاره‌سه‌ر هه‌س؟

شه‌فه‌ق نـيـوز

شه‌فه‌ق نيوز/ سروشت و شيوازه‌يل كۆمه‌ڵگاى عراقى رووژيگ له‌ رووژان كاريگه‌رى نه‌ياشگه‌ له‌بان شيرازه‌ى پيكهاته‌يلى و رووشنهويرى عراقييش نه‌ويه‌سه‌ رووشنهويرى تون و تيژى، وه‌لێ ئه‌و ئاڵشتكاريه‌ ك روێدا له‌ عراق له‌رزه‌ خسته‌ گيان رژيمه‌يل ناوچه‌گه‌ ك نيشتوينه‌ بان سينه‌ى ملله‌ته‌يليان، ئمجا ده‌مداين پليته‌ى تايفه‌گه‌رى ته‌نيا رييگه‌ ئه‌را مقه‌يه‌تيكردن له‌ رژيمه‌يليان وه‌ هه‌نارده‌كردن رووشنهويرى ئاشوو تايفه‌گه‌رى ك وه‌شيوه‌ى فراوان و خراويگ كاريگه‌ر بوى له‌بان بار عراقى، تا ئه‌وه‌ بوى عراقيه‌يل له‌و كرده‌وه‌ ره‌سينه‌و ك خوين فريه‌يگ ملله‌ت عراقى له‌ى رشيا.

 

كورده‌يل فه‌يلييش ئه‌و ناڕه‌حه‌تيه‌ وه‌پيان ره‌سى جوور ئه‌وه‌گ ره‌سيه‌ باقى عراقيه‌يل تر له‌وه‌ر وجووديان له‌ ناوچه‌يل ناوڕاس و باشوور عراق، ك ئه‌يانيش وه‌ سه‌ڵامه‌ت ده‌رنه‌چين له‌و جه‌نگه‌يل سه‌خته‌.

 

ئمجا هه‌رچه‌نى ئه‌و ئاشوو كووتايى هات، وه‌لێ سيستم حوكم له‌ عراق له‌بان بنه‌ماى نه‌ته‌وه‌يى و مه‌وه‌زى به‌شه‌و كريا، ك له‌يوا كرد كورده‌يل فه‌يلى سه‌رگه‌ردان بوون له‌ناونى لايه‌نه‌يل، ئه‌ويش وه‌جوويگ ك جاريگ وه‌ل نه‌ته‌وه‌و جاريگ وه‌ل مه‌زه‌و، دى ئه‌وه‌ بوى قه‌واره‌يگ سه‌روه‌خوه‌يان نه‌ياشتن تا بڕيار بارودوخ خوه‌يان بيه‌ن، هه‌ر وه‌و خاتريشه‌ بوينه‌ سه‌ر وه‌ ئه‌و حزبه‌يله‌ ك خه‌ريك به‌ژه‌وه‌نديه‌يل خوه‌يان بوين و بار فه‌يليه‌يل له‌ هويره‌و بردن و له‌وه‌ر ئه‌وه‌يش باج ساڵه‌يل تريش دان له‌شوون 2003يش.

 

وه‌ل ئه‌وه‌يشا وه‌ چه‌و كه‌م و كزيگه‌و ته‌ماشايان ئه‌كريه‌ێد و يه‌يش له‌يوا كردگه‌ كيشه‌يليان وه‌بى چاره‌سه‌ر بمينێد، ك خاستر ئه‌وه‌ بوى رزه‌يليان يه‌كه‌و بخستيان و ئه‌گه‌ريش كورده‌يل فه‌يلى په‌يوه‌س بوون وه‌ نه‌ته‌وه‌و ئايينيان و به‌شبه‌شه‌و نه‌ون له‌ناونى خوه‌يان هيز فيشتريگ په‌يا ئه‌كه‌ن، چوينكه‌ ته‌بيعه‌ت كورده‌يل فه‌يلى و وجووديان وه‌ل ئه‌شاير عه‌ره‌ب و مه‌شقكردن نه‌ريت و دروشمه‌يل ئايينى و تيكه‌ڵبوينيان وه‌ل ئه‌و ئه‌شايره‌يله‌ له‌يوا كردگه‌ مه‌سه‌له‌ى ئايينى و مه‌زه‌وى زاڵتر بدێ، وه‌لێ يه‌يش نواگيرى له‌ فه‌يليه‌يل ناكا په‌يوه‌س بوون وه‌ نه‌ته‌وه‌يان و نه‌بايه‌د واز له‌ هويچكاميان بارن و ئاشكرايشه‌ ك بار سياسى عراقى ئه‌راى ده‌ركه‌فێد ك فه‌يليه‌يل ته‌نيا پيكهاته‌يگن ك قه‌يرانه‌يل له‌وه‌ر خاتر به‌رژه‌وه‌ندى خوه‌يان ئستغلال نه‌كردنه‌، به‌ڵكوو وه‌ چه‌واشه‌وه‌ وه‌ل ئه‌وه‌يشا تومه‌تيش ئه‌خريه‌ێده‌ پاڵيان له‌وه‌ختيگ هه‌ڵوژاردنه‌يليش كووتايى وه‌پى ئه‌يه‌ێد، يه‌يش وه‌بى ئه‌وه‌گ ته‌ماشاى خواسته‌يليانيش بكريه‌ێد، هه‌ر وه‌و خاتريشه‌ بايه‌سه‌ له‌بان تيان رزه‌يليان يه‌كه‌و بخه‌ن و مه‌رجه‌عيه‌ى سياسى و قورسايى داشتوون له‌ناونى حزبه‌يل و فراكسيۆنه‌يل و ده‌رچن له‌ى بار ناجووريانه‌و چه‌وه‌ڕى ئه‌وه‌ نه‌كه‌ن كار ئه‌وه‌ بكه‌ن بار سه‌روه‌خوه‌ييگ داشتوون و به‌رنامه‌يگ خوه‌ى فه‌رز بكا له‌بانيان ك بوونه‌ى شه‌ريك له‌ پرووسه‌ى سياسى و با قوربانى بيه‌ن له‌وه‌ر پيكهاته‌گه‌يان جوور ئه‌وه‌گ قوربانى دان له‌وه‌ر خاتر مه‌ردمان تر، چوينكه‌ هيمان ئاڵشتكارى ها به‌رژه‌وه‌ندييان ئه‌گه‌ر بخوازن هه‌وڵ بيه‌ن و قسه‌و گفتيان يه‌كبخه‌ن.

سه‌ڵاح شمشير