له‌جی داشتن شوونيگ له‌ى خاكه‌، به‌هه‌شت بويه‌ به‌شيان

شفق نيوز

ئه‌نده‌نووسيا وه‌ ده‌سمان ڕه‌سی. ئه‌ی كاره‌ساته‌ له‌ ناونی مانگ ديسه‌مبه‌ر گوزه‌يشته‌ له‌ په‌ی ته‌قالای بڕێگ له‌ كووچبه‌ره‌يل ئه‌را ره‌سين وه‌  ئوستراليا (وڵاتێگ شايه‌د بووده‌ مه‌مه‌ر ئه‌وه‌گ بڕێگ له‌ ئازاره‌يل گوه‌زيشته‌يان له‌ هويره‌و بوه‌ن) رویدا.

بايه‌خ نه‌ياين كاروه‌ده‌سه‌يل ده‌وڵه‌ت عيراق وه‌ تايبه‌ت وه‌زاره‌ت خارجيه‌و  وه‌زاره‌ت كووچبه‌ره‌يل يا ته‌نانه‌ت وه‌زاره‌ت ماف مرۆڤ وه‌ ئه‌ی كاره‌ساته‌و خه‌وه‌ر ئاژانسه‌يل خه‌وه‌ری وه‌ عيراقی نه‌وين ئه‌ی قوروانيه‌يله‌ وه‌ ته‌نيا هاوردن يه‌گ ئه‌وانه‌ بڕێگ په‌نابه‌ر ناياسايين ك له‌ ئاوه‌يل ئه‌نده‌نووسيا خكيانه‌، بويه‌ مه‌مه‌ر ئه‌وه‌گ خه‌م و په‌ژاره‌مان دوئه‌وقه‌ره‌ فره‌تره‌و بوود.

وه‌ گوره‌ی خه‌وه‌ر‌يگ ك له‌ سايت گلگامش بڵاوه‌‌و كرياس‌، كه‌شتييگ ك له‌تی سه‌دان په‌نابه‌ر ئيرانی و ئه‌فغانی بوينه‌ له‌ ئاوه‌يل ئه‌نده‌نووسيا خنكيانه‌ له‌ وه‌ختێگ فێشتره‌ك له‌ شه‌ست كه‌س له‌ قوروانيه‌يل ئه‌ی كاره‌ساته‌ كورد فه‌يلی بوينه‌.

ئه‌و كورده‌يله‌گ وه‌ ده‌س رژيم به‌عس وه‌ زووره‌ملی له‌ وڵات ده‌ركريان و بی ميلكان و بی ناسنامه‌ ته‌نانه‌ت بی پێناسه‌‌يش كريان.

خوو، ئه‌را ميديا و ره‌سانن عيراقی يا ره‌سانن كوردی له‌ بڵاوه‌و‌ كردن ئه‌ی كاره‌ساته‌ دڵته‌زنه‌‌ چه‌و نويقانن!؟. ئايا كورد فه‌يلی بوين ئه‌ی قوروانيه‌يله‌ بويه‌ مووده‌ی ئه‌وه‌گ ره‌سانن بێ ده‌نگ بوود!؟. يا ك كورده‌يل فه‌يلی، جوور عيراقيه‌يل ده‌يشت وڵات وه‌ هساو تيه‌ن ك چاره‌‌نويسيان ئه‌را كاروه‌ده‌سه‌يل عيراقی گرنگی نه‌ێرێد!؟.

ته‌واو سياستمه‌داره‌يليگ كێشه‌ی كورد فه‌يلی جوور به‌رگ سه‌ركه‌فتنێگ ئه‌را وه‌ ده‌س هاوردن ده‌نگ هاوڵاته‌يل‌ عيراقی ئاڵشتی كردنه‌، ئاوه‌ختی يه‌ خوازن ك چنه‌ كاره‌ساتێگ هه‌م نووه‌و بوود تا جيگه‌ی سياسی خوه‌يان بوه‌نه‌و بان و ده‌نگ فێشترێگ له‌ ناو مه‌ردم وه‌ ده‌س بارن.

ئيمه‌ له‌ شه‌فه‌قيش خوه‌مان له‌ گرنگيدان و بڵاوه‌و كردن ئه‌ی خه‌وه‌ره‌ وه‌تاوانبار زانيمن و مه‌مه‌ر ئه‌ی تاوانيشمانه‌ هه‌ڵه‌وگه‌ردێ ئه‌را ئه‌وه‌ ك زانياری پێويست له‌ باوه‌ت قوروانيه‌يل و بنه‌ماڵه‌يليان نه‌ياشتيمن. شه‌فه‌ق ته‌نيا تويه‌نست وه‌ وه‌كارهاوردن ئه‌و خه‌وه‌ره‌يله‌گ بڕێگ له‌ ئاژانسه‌يل خه‌وه‌ری په‌خشی كردوين، ئی كاره‌ساته‌‌ په‌خشتر و بڵاوتريه‌و‌ بكا.

وه‌لی من خوه‌م جوور نۆێنه‌ريگ له‌ پارله‌مان هه‌رێم كوردستان، ناتويه‌نم ئه‌ی مه‌سه‌له‌ وه‌بی ئه‌وه‌گ به‌ڵگه‌یگ داشتووم بخه‌مه‌ی وه‌ر باس. وه‌ داخه‌و بايه‌د بويشيه‌ێد: بڕێگ له‌‌ی تاوانه‌ هه‌ڵه‌وگه‌رديه‌ێد ئه‌را‌ كورده‌يل فه‌يلی خوه‌يان، ئه‌وانيش وه‌ نه‌يان خه‌وه‌ر هويرده‌كاريه‌يل ئه‌ی كاره‌ساته‌ وه‌ ئاژانسه‌يل خه‌وه‌ری، دياره‌ له‌ ئه‌ی مه‌سه‌له‌ تاوانبارن.

 

ئيمه‌ له‌ شوون هاوردن مه‌هانه‌و ده‌سپێچگ نيمن ئه‌را يه‌گ ئه‌ی تاوان خوه‌مان و كه‌سه‌يل تر له‌ی مه‌سه‌له‌ بشاريمنه‌و به‌ڵكم  خوه‌مان و كه‌سان تره‌كيش له‌ وه‌رايوه‌ر ئه‌ی شه‌هيده‌يله‌ وه‌تاوانبار زانيمن.

وه‌لی ئوميدواريمن ك ئه‌ی كاره‌ساته‌ جوور ئه‌زموونيگ ئه‌را ئيمه‌و كه‌سه‌يل تر بوود. له‌ گشت عراقيه‌يل ناو و ده‌يشت وڵات خوازيمن تا گشت زانياريه‌يل خوه‌يان له‌ باوه‌ت ئی جووره‌ كاره‌ساته‌يلێگ بيه‌نه‌ پيمان. چوينكه‌ ئی كاره‌ساته‌ وه‌ دڵنياييه‌و له‌نه‌تيجه‌ی وه‌رده‌وامی ناعه‌داله‌تی له‌ وڵات و نه‌ڕه‌سين هاوڵاتيه‌يل وه‌ ئاساييترين ماف خوه‌يانه‌.

له‌ ده‌رگای په‌روه‌ردگار گه‌ورا ئه‌را ئه‌ی شه‌هيده‌يله‌ داوای ره‌حمه‌ت كه‌م و ئه‌را بنه‌ماڵه‌يل داخداريانيش تاقه‌ت و سه‌بر له‌ خودا خوازم.

 

 

عه‌لی حوسێن فه‌يلی