گرفت ڕه‌سانن كوردستانى له‌ ده‌یشت هه‌رێم كوردستان

شفق نيوز

وه‌تایبه‌تى چین ڕووشنهویر و بژارده‌یل ك له‌ نزیكه‌و چه‌ودێرى ڕویدایه‌یل كه‌ن و ڕاى خوه‌یان له‌باره‌یانه‌و ده‌ربڕن و دیدگاى خوه‌یان له‌باوه‌ت هه‌ر ڕویداى بویچگ و گه‌ورایگ خه‌نه‌ ڕوى.
وه‌ل ئه‌و بازكوتان سه‌رسوڕهاوه‌ره‌ له‌ پیشكه‌فتن ته‌كنۆڵۆجیاى په‌یوه‌ندیكردن و كلكردن زانیارى وه‌ چه‌ن خوله‌كیگ ئه‌را دویرترین خاڵ باكوور و باشوور و ڕووژئاوا و ڕووژهه‌ڵات زه‌وى وه‌ ڕیگه‌ى كه‌ناڵه‌یل ئاسمانى و تووڕ عه‌نكه‌بووتى و په‌یوه‌ندیه‌یل، ده‌وڵه‌ت و ده‌زگایه‌یل ڕووشنهویرى و ئه‌ده‌بى و زانستى و سیاسى وه‌تایبه‌تى پارته‌یل و هێزه‌یل سیاسى یا هه‌ر لایه‌نیگ تواید هویر و ئایدیۆلۆجیا و تیۆرى یا نه‌زه‌ریه‌ى خوه‌ى ده‌ربخه‌ید، بیگومان هه‌وه‌جه‌ى ها وه‌ وه‌سیله‌ى ڕه‌سانن دوینریاى یا ژنه‌فیاى یا خوه‌نریاى، تاگه‌ر ئه‌وه‌گ توایده‌ى بڕه‌سنیده‌ وه‌رگر (مته‌له‌قى) و كاریگه‌رى كردن له‌بانى.
ئیمه‌ى ملله‌ت كوردیش له‌ ڕووژهه‌ڵات ناوڕاس ك سێیم نه‌ته‌وه‌یمن له‌ شوون هه‌ردوگ نه‌ته‌وه‌ى عه‌ره‌ب و تورك، له‌ سه‌ده‌ى وه‌رین تویش جووره‌ها زوڵم و سته‌م و سه‌ركوتكردن نه‌ته‌وه‌یى و سیاسى و كوومه‌ڵایه‌تى و ئابوورى هاتیمنه‌، وه‌ جه‌نگه‌یل سه‌خت و سه‌نگه‌تایگ ك دژمان ئه‌نجام دریان و تویش پیسترین جووره‌یل تاوان هاتیمن وه‌ده‌س ڕژیمه‌یلیگ ،خاك و ملله‌ته‌گه‌مان وه‌ڕیگه‌ى پیلانه‌یل ناوده‌وڵه‌تى به‌شبه‌شه‌وكردنه‌ بان خوه‌یان له‌وه‌ر ئه‌و شوون ستراتیجیمانه‌ له‌ ناوچه‌گه‌ و داشتن سه‌رچه‌وه‌یل وزه‌، ئه‌یه‌ له‌ لایگ و له‌ لایگتر ئیمه‌ تویش دڕنده‌ترین هه‌ڵمه‌ته‌یل ڕه‌سانن و پڕۆپاگه‌نده‌یى هاتیمن له‌ لایه‌ن دوشمنه‌یلمان چوینكه‌ ئه‌وان ته‌نیا خاوه‌ن ماكینه‌ى ڕه‌سانن بوین و ئیمه‌یش نه‌یاشتیمنه‌ى، چوینكه‌ ئیمه‌ هویچ چه‌كیگ وه‌ده‌سمانه‌و نه‌وى ئه‌را وه‌رگرى كردن له‌ خوه‌مان و تواناى لایه‌ن میدیاییش نه‌یاشتیمن ئه‌را ڕووشنه‌وكردن كێشه‌ ڕه‌واگه‌مان ئه‌را ئه‌و ملله‌ته‌یله‌ ك وه‌لیانا ژیه‌یمن تا بزانن تویش چ جووره‌ هه‌ڵمه‌ته‌یل قرانكردن و جینۆسایدیگ هاتیمنه‌، له‌و جه‌نگه‌یل مه‌یدانى دڕنده‌ و غه‌زاى ڕووشنهویرى و میدیایى ئه‌را سڕینه‌وه‌ى شناسنامه‌ى نه‌ته‌وه‌ییمان، ئینجا هه‌ر له‌وه‌ر ئه‌وه‌ بوى ك تویش ئه‌نفال و كیمیاواران و ڕمانن و ویرانكردن ئاواییه‌یل و سزانن باخ و بووسانه‌یلمان هاتیمن، وه‌ل گشت جووره‌ تاوانه‌یل جینۆساید، بى ئه‌وه‌گ میدیاى ناوخوه‌یى و هه‌رێمى و ناوده‌وڵه‌تى له‌ى جه‌هان خاوه‌ن ژیاره‌ ده‌نگیگ له‌لى هه‌ڵباید.
له‌ى وه‌ختیشه‌ و له‌ناوڕاس ئه‌و گۆڕانكاریه‌یل سیاسى جه‌هانیه‌، وه‌تایبه‌ت له‌ ناوچه‌گه‌مان و ئه‌و گۆڕانه‌ ك له‌ عیراق ڕوى دا، هه‌رچه‌نى ك شماره‌یگ خاس كه‌ناڵه‌یل ئاسمانى و ماڵپه‌ڕ و سایته‌یل ئینته‌رنێتى و ئامێره‌یل ڕه‌سانن دوینریاى و ژنه‌فیاى و خوه‌نریاى په‌یا بوى، وه‌لى هیمان ئیمه‌ ڕوى وه‌ڕوى لاوازى و زوعف ڕه‌سانن كوردستانى بویمنه‌ وه‌و شیوه‌ ك نه‌تویه‌نستیمنه‌ ڕاسیه‌یل وه‌گشتى بڕه‌سنیمنه‌ جاده‌ى به‌غدادى وه‌و شیوه‌ ك وه‌گووره‌ى دڵ خوه‌مان بوود، ئه‌ویش وه‌ڕاى من له‌وه‌ر دو هووكار سه‌ره‌كیه‌، یه‌كمیان بایه‌خ نه‌داین ڕه‌سانن حكوومى له‌ به‌غدا وه‌ بوونه‌یل نه‌ته‌وه‌یى جیاجیاى كوردى و كێشه‌ى كورد وه‌ گشتى، هه‌رچه‌نى ك به‌شدارى كارایگیش دیریمن له‌ ئۆپه‌راسیۆن سیاسى و حكوومه‌ت عیراقى وه‌به‌رزترین ئاسته‌یلیانه‌و، چوینكه‌ هیمان ڕه‌سانن حكوومى له‌ به‌غدا كێشه‌ى كورد پشتگووش خه‌ید و باسى نیه‌كه‌ید، له‌وه‌ر زاڵبوین هویر شۆڤینى و ڕه‌گه‌زپه‌رستى له‌بان كه‌ناڵه‌یل ڕه‌سانن و نه‌جمیان لایه‌ن كوردى له‌ى مه‌یدانه‌، هه‌رچه‌نى ئیمه‌ وه‌گووره‌ى ده‌ستوور دویم نه‌ته‌وه‌یمن له‌ عیراق و زووان كوردى بویه‌سه‌ زووانیگ ڕه‌سمى، وه‌لى...!!!
دویم هووكاریش سسى و كه‌مزوورى ڕه‌سانن كوردستانیه‌ له‌ به‌غدا، چوینكه‌ كه‌ناڵه‌یل ڕه‌سانن له‌ هه‌رێم كوردستان ئاراسته‌ى هاوڵاتى كورد وجاده‌ى كوردستانى كریاس جوور وه‌رگر (متلقى) سه‌ره‌كى و كه‌ناڵه‌یل ڕه‌ساننمان له‌ به‌غدا له‌ لایه‌ن پیشه‌ییه‌و له‌ ئاست خوازریاى نه‌ویه‌، چوینكه‌ زیاتر بایه‌خ دانه‌سه‌ مه‌سه‌له‌یل حزبى تایبه‌ت و لایه‌ن گرنگتر پشتگووشخستنه‌ ك لایه‌ن نه‌ته‌وه‌ییه‌، چمانى هه‌وه‌جه‌ نه‌یریمن ك هاوڵاتى غه‌یره‌كورد له‌وه‌ بڕه‌سنیمنه‌و ك ئه‌وسا تویشمان هاتیه‌ و ئه‌وه‌گ له‌ هه‌رێم كوردستان ڕوى ده‌ید و نه‌تویه‌نستیمنه‌ ڕاسیه‌یل بڕه‌سنیمنه‌ وه‌رده‌س هاوڵاتى به‌غدادى مه‌گه‌ر چشتیگ كه‌م نه‌ود، و هیمان زوورمى مه‌ردم له‌ ڕاسیه‌یل كیشه‌ى كورد باخه‌وه‌ر نین و ئاگایان له‌و سیاسه‌ته‌یل پاكسازى ڕه‌گه‌زیه‌ نیه‌ ك ڕژیمه‌یل وه‌رین دژمان وه‌كارى هاوردنه‌ و كوت فره‌یشیان تا ئیسه‌یش باوه‌ڕ نیه‌كه‌ن ك چه‌ك كیمیاوى دژ هاوڵاتیه‌یل بیگوناه‌ له‌ هه‌ڵه‌بجه‌ى شه‌هید وه‌كار هاوریاس و وه‌ ئه‌نفالكردن سه‌دان هه‌زار له‌ ڕووڵه‌یل شار و ئاواییه‌یل كوردستانى و خاك كردنیان له‌ له‌ قه‌ورسانه‌یل ده‌سه‌جه‌مى باوه‌ڕ نیه‌كه‌ن و له‌هه‌مان وه‌ختیش ئه‌و ڕاسیه‌یله‌ ك ئیسه‌ له‌ بان خاك كوردستان وه‌چه‌و دوینریه‌ن وه‌پى نیه‌زانن چ له‌لایه‌ن سیاسى بوود یا ڕووشنهویرى و ئابوورى و كووومه‌ڵایه‌تى.
ئینجا ئه‌را لاداین له‌ خه‌له‌ل و دویره‌و كه‌فتن له‌ غه‌ڵه‌ته‌یل گوزه‌یشته‌، بایه‌ته‌ كه‌ناڵه‌یل ڕه‌سانن كوردستانى ڕوى بكه‌نه‌ ڕاى گشتى عیراقى و كێشه‌گه‌مان بڕه‌سننه‌ لاى عیراقیه‌یل وه‌گشتى؛ ئه‌ویش وه‌ڕیگه‌ى به‌رنامه‌یل ڕووشنهویرى و كوومه‌ڵایه‌تى و هه‌مه‌ڕه‌نگ، جوور فیلمه‌یل سینه‌مایى و كورته‌ فیلم و فیلم دۆكیمه‌نتارى و زنجیره‌ دراما و سه‌رداینه‌یل دولایه‌نى له‌ هه‌رێم كوردستان وه‌ل ئه‌وباقى ناوچه‌یل عیراق و هه‌ڵه‌وگه‌ردانن یا ته‌رجه‌مه‌كردن به‌رهه‌مه‌یل فكرى و ڕوشنهویرى كوردى ئه‌را سه‌ر زووانه‌یل عه‌ره‌بى و توركمانى و سریانى و بیناكردن پیه‌ڵه‌یل په‌یوه‌ندى و دووسى و خوه‌شه‌ویسى له‌ناوبه‌ین كورد و ئه‌و پیكهاته‌یل نه‌ته‌وه‌یى و تایه‌فى تر له‌ ملله‌ت عیراق.

جه‌واد كازم فه‌یلى