بازى په‌رله‌مانى

شفق نيوز

 

بێجگه‌ ئه‌وه‌یش هه‌ر وه‌گووره‌ى ئه‌و هه‌ڵوژاردنه‌ گشت ئه‌و راسیه‌یله‌ ده‌ركه‌فێد ك كام حزب زوورم ده‌نگه‌یل وه‌ده‌س هاوردگه‌ له‌ ئاكامیش وه‌ڕیه‌وبردن وڵات و ده‌سڵاتیش له‌ماوه‌ى دو هه‌ڵوژاردن گرێده‌ ده‌س.

دى وه‌گووره‌ى ئه‌وه‌یش كه‌مینه‌ ئه‌وه‌نه‌ى شماره‌ى ده‌نگه‌یلى كورسى وه‌پى دریه‌ید له‌ په‌رله‌مان و نه‌خش ئۆپۆسیۆن نیشان ده‌ید وه‌ بوونه‌ى كه‌مى ده‌نگه‌یلیه‌و. له‌یرا ئۆپۆزسیۆن ئه‌ڕاى هه‌س له‌ په‌رله‌مان گفتگوو له‌بان گشت پرووژه‌و پیشنیاره‌یل بكاو دویاخریش خریه‌یده‌ ده‌نگداین و ئه‌گه‌ر له‌حاڵه‌تیگ زوورم ده‌نگه‌یل وه‌ده‌س هاورد ئه‌وه‌ بووده‌ بڕیار په‌رله‌مان و بایه‌سه‌ جیوه‌جى بكریه‌ید.

دى نووڕید له‌ سیستم په‌رله‌مانى بایه‌سه‌ كه‌مینه‌ گووش له‌ زوورمینه‌ بگرێدو نیه‌ود ئه‌گه‌ر بڕیاریگ وه‌ دڵى نه‌وى بكاده‌ى ئاژاوه‌و قاڵبخوڕ و شكانن كه‌ره‌سه‌یل ناو په‌رله‌مان.

ئه‌یه‌ گه‌مه‌یگ دیموكراسیه‌و ده‌ستوور و یاساى خوه‌ى دیرید، چوینكه‌ كه‌مینه‌یش ئه‌گه‌ر له‌ هه‌ڵوژاردن تویه‌نستن بوونه‌ زوورمینه‌ ئه‌وه‌ ئه‌وانیش تویه‌نن وه‌ حوكم زوورمینه‌ى خوه‌یان ئه‌و پرۆژه‌یله‌ ك خوازن پیشكه‌شى بكه‌نه‌ په‌رله‌مان و هه‌ر وه‌ حوكم زوورمینه‌ى ده‌نگیان سه‌ركه‌فتن ئه‌ڕاى مسۆگه‌ر بكه‌ن.

كه‌مینه‌ى په‌رله‌مان بایه‌سه‌ ئه‌و راسیه‌ بزانید ك تا هه‌ڵوژاردن ئاینده‌ هه‌ر كه‌مینه‌سه‌و ئه‌وه‌نه‌ ده‌نگ نه‌یرید تا بتویه‌نید پرۆژه‌و پیشنیاره‌یلى سه‌ر بخه‌ید، بیگومان وه‌ یه‌یش نیه‌ود هویچ وه‌ختیگ دڵگیر بوود و په‌لامار ئه‌ى وئه‌و بیه‌ید.

ئه‌گه‌ر په‌رله‌مان وه‌ ریككه‌فتن پیكهاوریاوید، ك تائیسه‌ په‌رله‌مان ریكخریاگ له‌هویچ شوونیگ له‌وڵاته‌یل دونیا نه‌دوینریاگه‌، ئه‌وه‌ هه‌ڵسوكه‌فت كه‌مینه‌ى ناو په‌رله‌مانیش مه‌هانه‌ى خوه‌ى داشتیاد ئه‌را ئى رویداگه‌یل دویاخره‌ له‌ناو په‌رله‌مان.

هه‌ر له‌وه‌ر ئه‌وه‌یش تویه‌نیم بویشیم ئه‌گه‌ر ئۆپۆزسیۆن ك ئیسه‌ كه‌مینه‌ى ناو په‌رله‌مانه‌و خوازیار دیموكراسیه‌، ئه‌وه‌ك ئمڕوو له‌ په‌رله‌مان كوردستان كریه‌یدو كه‌فیده‌ وه‌رچه‌و، ئایا ئه‌وه‌ چه‌واشه‌ى دیمۆكراسى نییه‌؟.

سه‌لام عه‌بدوڵڵا

ج . أ