فه‌يليه‌يل ته‌نيا سه‌رچه‌وه‌ی مه‌زڵوميه‌ت نيين

شفق نيوز

چشت ئه‌ڵڵاجه‌ويگ نيه‌ ئيمه‌ی كورده‌يل فه‌يلی هه‌ڵويسته‌يل ده‌گمه‌ن و ئه‌ڵڵاجه‌وی له‌ وه‌خته‌يل فريه‌يگ بگريمنه‌ خوه‌مان ك وه‌ل هه‌ڵكه‌فتمان نه‌گونجيه‌ێد يا كيشه‌يلمان ئاسانه‌و بكا، به‌ڵكوو وه‌ چه‌واشه‌وه‌ فيشتر مه‌سه‌له‌گه‌ سه‌ختتره‌و ئه‌كاو ده‌سميه‌ت كاره‌يل چويچيانمان ئه‌ياد.

ئه‌وه‌گ روێ ئه‌ياد گورز سه‌ختيگه‌ له‌ بار ئيمه‌ی فه‌يلی و له‌بان بنه‌مای وازيه‌يل ويرانكه‌ر و ئاكامه‌گه‌يشی وه‌ ئاسانی ته‌مام نادێ، ئمجا هه‌ر دويره‌وكه‌فتنيگ ئه‌را فه‌يليه‌يل له‌ ماوه‌ی ساڵه‌يليگ وه‌ بوونه‌ی يه‌يگه‌ری و مكوڕی بويه‌ وه‌بی مانا يا هه‌ر شيه‌وكارييگ و ده‌س له‌ به‌ديل ئه‌زمه‌نكاری و پابه‌ندييش هاورديم، دی وه‌رده‌وام كيشه‌ی ئيمه‌ ئه‌وه‌سه‌ له‌ بانه‌و ته‌ماشای خوه‌مان ئه‌كه‌يم و راسيه‌گه‌يش له‌يوا نيه‌و ته‌نانه‌ت ئه‌گه‌ر فه‌رز بكه‌يم ئی مه‌سه‌له‌يشه‌ واقعيه‌، ئه‌وه‌ بار ئيسه‌مان فيشتر هه‌وه‌جه‌ وه‌ ئه‌قڵانيه‌ت ديرێد نه‌ك ئه‌قڵيه‌تيگ به‌تاڵ، ئه‌ويش وه‌ ئه‌وه‌گ ئه‌قڵ به‌هره‌يگ خوداييه‌، وه‌لێ ئه‌قڵانيه‌ت حاڵه‌تيگ وه‌ده‌سهاودنه‌.

فه‌رز بكه‌يم كورد جوور نه‌ته‌وه‌و شيعه‌يش جوور مه‌زه‌و ئايا ته‌قه‌بول روێداين وه‌رانوه‌رييگ ئه‌كه‌ن له‌ناونی كه‌سيگ فه‌يلی كوردپه‌رس و كه‌سيگ تر فه‌يلی شيعه‌په‌رس، جواو ئيچنه‌ پرسياريگ هه‌وه‌جه‌ وه‌ به‌ڵگه‌يليان ديرێد له‌ ده‌رئه‌نجام ئه‌وه‌گ ئه‌ژنه‌ويم و ئه‌دوينێم، وه‌لێ گرينگ تر له‌ گشت ئه‌وانه‌، ئه‌وه‌سه‌ ك ئايا له‌يوا گفتگووه‌يليگ ناوبڕ ناونيان كه‌مه‌و ئه‌كا يا كه‌لينه‌گه‌ فيشتر سه‌خته‌و ئه‌كا له‌ی جه‌ده‌ليه‌ت كويه‌نه‌.

ئی مه‌سه‌له‌ ئه‌ياده‌ بان نويسه‌ره‌يل فه‌يلی و فكرمه‌نه‌يليان، ك له‌ نويسانن و داناينيان ئه‌و فه‌رق جياوازيه‌يله‌ له‌ناونی رووڵه‌يل پيكهاته‌گه‌و كومه‌ڵگا كه‌مه‌و كردنه‌؟

ئه‌را ئی باوه‌ته‌ روێداگيگ ئه‌كه‌فێده‌ هويرم و باوه‌ڕم ئه‌وه‌سه‌ هاته‌ تويش مه‌ردمان فريه‌يگ، ك رووژيگ له‌ رووژان پياويگ نابينا له‌ منار جاده‌يگ دانيشتوێد و دروشميگ داناوێد له‌ وه‌رده‌می و له‌قه‌يه‌و نويساوێد(من نابينام ده‌سميه‌تم بيه‌ن)، كابرايگيش ره‌وشت به‌رز وه‌لايا گوزه‌ر كرد و چه‌وی كه‌فته‌ بڕيگ پويل له‌ناو قوتييگ له‌وه‌رده‌م نابيناگه‌ ك ريواره‌يل وه‌پی داوينه‌ی، ئمجا كابرايش بڕيگ پويل خسته‌ وه‌رده‌می و قه‌ڵه‌مه‌گه‌ی ده‌ركرد و له‌ ديم دويه‌م دروشمه‌گه‌ی گوزارشيگ نويسا، ئيواره‌ هه‌مان كابرا وه‌لای كابرای نابينا گوزه‌ر كرد و ته‌ماشا كرد قوتيه‌گه‌ پڕ بويه‌ له‌ پويل، نابيناگه‌ ئه‌و كابرا وه‌ خشه‌ی پايه‌و ناسی و وته‌پی چه‌ له‌قه‌ی دروشمه‌گه‌م نويساێد؟ ئه‌ويش وته‌پی مه‌سه‌له‌گه‌ گرينگ نيه‌، وه‌لێ من گوزارشه‌گه‌د وه‌ شيوازيگ تر نويسام، دی رووژ هات وچی كابرای نابينا نه‌زانست چه‌ نويسياس، وه‌لێ كابرای ره‌وه‌ن ئه‌ڕای نويساوێد(ئمڕوو رووژ جوانيگه‌، وه‌لێ من توانای دوينستنی نه‌يرم).

ئيمه‌ی فه‌يله‌يل شايه‌ت توانی وه‌ڕيخستن كاره‌يلمان نه‌ياشتويم، هه‌ر وه‌و خاتريشه‌ بايه‌سه‌ ستراتيجيه‌ت خوه‌مان ئاڵشت بكه‌يم و له‌ی وه‌ختيشه‌ دوينيم چشته‌يل فريه‌يگ جيوه‌جی ئه‌دێ و ئاڵشتكاريه‌يليگ فريه‌يگيش ئه‌را ئه‌مڕوومان وه‌كاره‌و بايه‌سه‌ هه‌وڵ و كار و هويره‌وكردنمان له‌بان واقع حاڵه‌ته‌گه‌مان بوودو جوور شاعيريگ نه‌ويم ك چه‌وه‌ڕی دامه‌زرانن حكومه‌ت تازه‌ بكا تا شيعره‌گه‌ی بنويسێد، ئمجا ده‌ركردن و ئاواره‌يی چشته‌يل فريه‌يگ نيشانمان دا، وه‌لێ وه‌ ته‌مامی هيز وه‌پيمان نه‌يا، هه‌ر له‌وه‌ر ئه‌وه‌يش وه‌هيزكردن بونيه‌ت كومه‌ڵايه‌تی و سياسی فه‌يلی هه‌وه‌جه‌ وه‌ پرووژه‌يگ ئه‌قڵانی ديرێد نه‌ك چشتيگ تر.

عه‌لی حسێن فه‌يلی