نه‌جه‌ف قولى و مورته‌زاى براى له‌ناونى ئه‌فشارى و عوسمانى

شفق نيوز

له‌و سه‌رده‌مه‌ نادر شا كار ه‌یل مه‌سه‌له‌ى گرده‌وكردن باج و كاره‌یل تر خوه‌ى و هووز دونبولى داویده‌ ده‌س ئى هه‌ردوگ برا، ك دویاخریش وه‌ ئه‌وه‌ تومه‌تباریان كرد ك گوایا 100 هه‌زار تومه‌ن له‌لى گله‌و دانه‌و داوا له‌لیان كرد ئه‌و پویله‌ بیه‌نه‌ دویاوه‌، ئمجا ئه‌وانیش ئه‌را ئه‌وه‌ك ئه‌و پویله‌ له‌ ئێڵ و هووزه‌یل دونبولى جه‌مه‌و بكه‌ن ، هه‌وه‌جه‌ وه‌ وه‌خت فیشتر كردیان له‌ نادر شا ئه‌را ئه‌وه‌ك بچنه‌ ناو ئێڵه‌گه‌.

ئى هه‌ردوگ برا وه‌ختیگ قورتاریان بوى دى یه‌كسه‌ر پشت كردنه‌ فه‌رمانه‌یل نادرشاو گووشنه‌یانه‌ قسه‌یلى و نامه‌یگیش ئه‌را سه‌ركرده‌ى له‌شكر عوسمانى نویسانن ك ئه‌ویش له‌و وه‌خته‌ فه‌رمانده‌ى هه‌ریمه‌یل قارس و ئه‌رزڕووم بوى و داواى ئه‌وه‌ له‌لى كردن له‌ڕى ئه‌وه‌و په‌نا بووه‌نه‌ وه‌ر ده‌وڵه‌ت عوسمانى.

ئى باسه‌ له‌و سه‌رده‌مه‌ رویدا ك نادر شا له‌ بان هه‌رێم كوردستانه‌و په‌لامار قه‌ڵاى شار موسڵ و ده‌ورگردى داوید، ئمجا وه‌ختیگ ئى هه‌واڵه‌ ژنه‌فت مه‌ترسى گرته‌ى و واز له‌ قه‌ڵاى موسڵ هاورد و گله‌و خوارد وه‌ره‌و ئیران و فه‌رماندا "محه‌مه‌د ره‌زا خان ئه‌فشارى" وه‌ هه‌ڵه‌په‌ڵه‌ بڕه‌سیده‌ هه‌رێم دونبولیه‌یل و سه‌ركوتیان بكا.

دى ئه‌وه‌ بوى ده‌رئه‌نجامیش له‌ جه‌نگ ناونى عوسمانى و ئه‌فشارى له‌شكر عوسمانى شكیاو مورته‌زا قولى خانیش له‌ جه‌نگ كوشیا. دى نادر شا نامه‌ى وه‌خشین و قورئانیگیش ده‌سنویس جوور متمانه‌ كلكرد ئه‌را نه‌جه‌ف قولى خان و ئه‌ویش وه‌ خوه‌ى و هووزه‌گه‌یه‌و هاتنه‌ پاڵ نادرشا و له‌ شار "خۆیى" نیشتمان خوه‌یان دامه‌زرانن و دویاخریش وه‌ل سه‌ران تر دونبولى پله‌و پایه‌ى به‌رز یش وه‌پیان دریاو وه‌ختیگیش نادر شا كوشیاو ئبراهیم پاشاى برارزاى شوونى گرت و تا سه‌رده‌م بنه‌ماڵه‌ى زه‌ندیه‌لیش هه‌ر ناودار بوین و نه‌خش خاس داشتن.

مه‌لا جه‌میل

ج . أ