ئه‌و وه‌خته‌ ك له‌ى دونیا ده‌رچیم

شفق نيوز

پڕه‌ له‌ دز و تونڕه‌وه‌یل و سیاسى و مچبڕ و خوینمژ، ك رووح له‌ جه‌سه‌د وه‌ ئیراده‌ى خودا كیشریه‌یدو له‌و شوونه‌ ك وجوود داشت و جموجویل و تاقه‌ت دا ژیان ده‌رچوودو نیه‌مینێد.

 

كى وت ك داگیركارى هه‌میشه‌ چشت خراویگه‌؟ ئى رووح داگیركاریه‌ وه‌ دریژى ملیۆنه‌ها ساڵ به‌شدار بویه‌ له‌ بنیاتناین لاشه‌ى ئاده‌میزاد له‌ژن و پیاو، وه‌ل ئه‌وه‌یشا گشت توناییگ دا پیان ئه‌را كرده‌وه‌و دروسكردن چشته‌یل جوان ك له‌خوه‌یان زیاتر دروسكریاگیگ تر تواناى نه‌یرێد، وه‌لى دونیا نه‌ورده‌ ڕیه‌وه‌و ئاینده‌یگیش ئه‌را خوه‌ى دروس نه‌كرد.

 

قانجاز مه‌ندن و ژیان له‌ى گووشه‌ى دونیا چه‌س ئه‌گه‌ر ئیراده‌ى خودا له‌تى نه‌ود؟ خودا هه‌میشه‌ له‌به‌رزه‌و ته‌ماشاى به‌نه‌ى خوه‌ى ئه‌كا ك چوین زیاى كه‌ن و جویلیه‌ن و خوه‌ن و چشته‌یل دروس كه‌ن و مرن، وه‌ل ئه‌وه‌یشا بڕیگ له‌لیان ده‌س كه‌نه‌ كوشتن مه‌ردم و زوڵم له‌یه‌كترى كه‌ن و ماڵ ییه‌كترى دزن و ده‌سدریژى له‌ژنه‌یل كه‌ن و ماڵ و موڵك داگیر كه‌ن و گووچ زووره‌ملى وه‌پیان كه‌ن و له‌وڵات خوه‌یان ده‌ركریه‌ن و كرده‌وه‌ى خراو تیه‌رنه‌ سه‌ریان، ك گشت ئى كرده‌وه‌یلیشه‌ له‌وه‌رچه‌و خوداو له‌ژیر ده‌سڵات ئاده‌میزاد ئه‌نجام دریه‌ێد، له‌جه‌هان گیانله‌وه‌ریش ك بى ئه‌قڵن دوینید گورگ هاریگ ژیان میه‌یگ له‌ناو ده‌ێد ك چه‌وه‌ڕیه‌ شه‌وه‌كى شیر به‌یده‌ به‌چكه‌یلى وه‌بى ئه‌وه‌ك بزانید گورگه‌یل ژیانى فه‌وتنن.

 

له‌هه‌مان وه‌خت رووى فه‌نبازیگ تویه‌نید ده‌مه‌و شه‌وه‌كى تیه‌ریكیگ بچووده‌ ناو كولانه‌ى مامره‌یل و له‌وه‌خت خه‌و زه‌فه‌ر له‌لیان باریدو له‌لیان بدزیدو له‌شوونیگ بخواده‌ى وه‌بى ئه‌وه‌ك هویر له‌وه‌ بكا ئى ئه‌و مامره‌ كڕ بویه‌ له‌بان خا، یا جویجگ بویچگ داشتگه‌و چه‌وه‌ڕى كه‌ن خواردن ئه‌ڕایان بارێد.!

 

له‌ى دونیا دوینید فره‌كه‌س وه‌ ده‌رده‌یل جواروجوور تویش هاتنه‌و ئومید خاسه‌وبوین نه‌یرن و هه‌ر وه‌بى چاره‌سه‌ر له‌ى دونیا ده‌رچن، وه‌لى دویاخریش دوینید ك رووح له‌ لاشه‌یان كیشریه‌یدو ڕوى كه‌نه‌ جه‌هانیگ تر و لاشه‌یان له‌ناو چاڵیگ داڕزیه‌ێدو خریه‌نه‌ ژیر خاك و دویاى چه‌ن سه‌عاتیگ مه‌ل وموور له‌گشت لایگه‌و په‌لامارى ده‌ن و هویچ له‌و لاشه‌ نیه‌لنه‌و ته‌نیا سوقانه‌یلى نه‌ود.

 

دویاى ساڵه‌یل فره‌یگ له‌وه‌ختیگ دكتاتۆر به‌غدا فه‌رمان دا وه‌ ڕمانن قه‌وره‌یل له‌ نه‌جه‌ف یه‌كسه‌ر روى كردیمنه‌ نه‌جه‌ف ئه‌را جیوازكردن باقى ته‌رمه‌یل مردگه‌یلمان و هه‌ر خیزانیگ و ته‌رم ئه‌زیز خوه‌ى ده‌ركرد، نه‌نگمیش له‌قه‌وره‌گه‌ى خه‌فتویدو، وه‌لى لاشه‌ى هویچ وه‌پى ناتویدو مه‌ل وموور نزیكیه‌و نه‌وین، وه‌لى باقى مردگه‌یل تر ده‌وروه‌رى ته‌نیا سوقانه‌یلیان مه‌ندوید، شایه‌ت نه‌نگم له‌ره‌گه‌ز فریشته‌یل بوى، چوینكه‌ ئاده‌میزاد خاسیگ بوى و خوه‌نه‌وارى نه‌یاشت و نه‌زانست بنویسید، وه‌لى وه‌ل ئه‌وه‌یشا فره‌ فامیده‌و زانا بوى، هه‌ر له‌وه‌ر ئه‌وه‌یش ئویشم: بیلا له‌ى دونیا هویچ پویچه‌ ده‌رچیم ك هویچ دڵخوه‌شییگ نه‌ریرێد.

 

هادى جلو مه‌رعى

ج