نه‌فت و ئاوه‌دانكردن كوردستان

شفق نيوز

وه‌ل ئه‌وه‌يشا هه‌رچه‌نى وه‌زاره‌ت نه‌فت حكوومه‌ت فيدراڵ بيجگه‌ ئه‌و هه‌ق ده‌ستوورى هه‌رێم كوردستانه‌ وه‌ سه‌به‌ب ئه‌وه‌ك وه‌زيره‌گه‌ى په‌يڕه‌و سياسه‌ت سه‌رنه‌كه‌فتگيگ كردياگ و بيجگه‌ ئه‌و بڕ پويل فره‌ ك ئه‌راى ته‌رخان كرياويگ ، وه‌لى نه‌تويه‌نست به‌رهه‌م زياى بكه‌يگ ، له‌لايگ تريشه‌وه‌ كيشه‌و گرفت ئه‌را هه‌رێم كوردستانيش دروس كردياگ وه‌بى ئه‌وه‌ك هويچ قانوونيگ وه‌ليا بووگ . وه‌لى جه‌ختكردن و هه‌وڵه‌يل حكوومه‌ت كوردستان له‌وه‌ر ئه‌وه‌ك كاره‌يلى قانوونى و ده‌ستوورى بوين سه‌ركه‌فتن وه‌ده‌س هاورد .

وه‌زاره‌ى نه‌فت حكوومه‌ت فيدراڵ له‌ 2 كتاو يا نويسرياگ ك رووژ 10 / 5 / 2009 ره‌سيه‌سه‌ وه‌زاره‌ى سامانه‌يل سروشتى توايگ هه‌ڵه‌په‌ڵه‌ له‌كلكردن نه‌فت خام (تاوكى و ته‌قته‌ق)بكه‌يگ ، له‌وه‌ر ئه‌وه‌ له‌لايگه‌وه‌ قانوونين و له‌لايگ تره‌وه‌ له‌به‌رژه‌وه‌ندى ملله‌ته‌يل عيراقه‌ . يه‌يش وه‌ مه‌عناى ئه‌وه‌سه‌ ك وه هه‌ه‌وڵ و ته‌قلاو ئارامگرى سه‌ركردايه‌تى سياسى و ئيدارى كوردستان گرفتيگ تر له‌وه‌رده‌م ئاوه‌دانكردنه‌وه‌ى زياتر كوردستان لاوريا ، ك يه‌يش له‌ به‌رژه‌وه‌ندى و خوه‌شگوزرانى زياتر مه‌ردم كوردستانه‌.

وه‌رجه‌ ماوه‌ى كه‌ميگ وه‌زاره‌ت سامانه‌يل سروشتى ئاشكراى ئه‌وه‌ كرد ك له‌سه‌ره‌تاى مانگ حوزه‌يران ئاينده‌ رووژانه‌ (60) هه‌زار به‌رميل نه‌فت خام له‌ سه‌رچه‌وه‌ى نه‌فت (تاوكى) و (40) هه‌زار به‌رميليش له‌ سه‌رچه‌وه‌ى نه‌فت (ته‌قته‌ق)ه‌وه‌ ره‌وانه‌ى ده‌يشت كريه‌يگ . يه‌يش سه‌ركه‌فتنيگ تر حكوومه‌ت كوردستانه‌ له‌ باوه‌ت په‌ياكردن سه‌رچه‌وه‌ى دارايى زياتر ئه‌را ئاوه‌دانكردنه‌وه‌ى كوردستان و خزمه‌تگوزارى ئه‌را هاوولاتيه‌يل .

ريزدار نێچيرڤان بارزانى سه‌رۆك حكوومه‌ت هه‌رێم كوردستان له‌ ديدار و كۆنگره‌ى رووژنامه‌گه‌ريه‌يل فره‌يگ ئسپات هه‌وڵه‌يل ده‌ستوورى و قانوونى حكوومه‌ت كوردستان له‌و مه‌يدانه‌وه‌ كردگه‌ ، ك دوياخر هه‌وڵه‌يلى سه‌ركه‌فتن وه‌ده‌س هاوردن و له‌ئاينده‌ى نزيكيگ وه‌ ره‌سمى نه‌فت كوردستان ره‌وانه‌ى ده‌يشت كريه‌يگ . بيگومان يه‌يش راسه‌وخۆ كاريگه‌رى ديريگ له‌ بان خاستربوين گوزران هاوولاتيه‌يل هه‌رێمه‌گه‌مان ، وه‌ل ئه‌وه‌يشا مه‌يدان سياسى و بازرگانى هه‌رێم كوردستان له‌بان ئاست هه‌رێمى و ناوده‌وڵه‌تييش بته‌وتر كه‌يگ و يه‌يش وه‌ به‌رژه‌وه‌ندى مه‌ردم كوردستان شكيه‌يگه‌وه‌. ئمجا ئه‌گه‌ر تا دويه‌كه‌ نه‌فت هووكاريگ بويه‌ ئه‌را ده‌رده‌سه‌رى و مه‌ينه‌تيه‌يل كوردستان ، ئه‌وه‌ بيگومان له‌يه‌ودويا له‌سايه‌ى ئه‌و سه‌ركردايه‌تيه‌و تواناى خاس سه‌رۆك حكوومه‌ت كوردستانه‌ نه‌فت كوردستانيش وه‌ك نه‌فت ولاته‌يل تر بووگه‌ سه‌رچه‌وه‌ى خوه‌شگوزرانى هاوولاتيه‌يل كوردستان و بته‌وبوين پايه‌ى كوردستان له‌ جه هان . له‌وه‌ر ئه‌وه‌ ئه‌و ده‌سكه‌فت حكوومه‌ت كوردستانه‌ جيگه‌ى شانازى گشت كوردستانييگه‌و شايسته‌ى پشتگيريكردن زياتره‌ ، چوينكه‌ حكوومه‌تيگ له هه‌وڵ په‌ياكردن سه‌رچه‌وه‌ى دارايى زياتر بووگ ، هويچ گومانيگ له‌تى نيه‌ هه‌ر وه‌و شاره‌زايى و تواناييه‌وه‌ تويه‌نيگ گشت ئه‌و هه‌قه‌يله‌ باريگه‌دى ك هيمان هه‌ر له‌يوا مه‌ندنه‌.