كورده‌یل فه‌یلى له‌ناونى خوه‌یان هه‌وه‌جه‌ وه‌ متمانه‌ و هاوكارى دیرن

شفق نيوز

پێكهاته‌یل ملله‌ت عراقیه‌، ك له‌ى رووژه‌یله‌ سه‌ختتره‌و بویه‌ وه‌تایبه‌ت هه‌رچه‌نى نزیكه‌و بویمن له‌ هه‌ڵوژاردنه‌یل ئه‌نجوومه‌ن پارێزگایه‌یل و ئه‌نجوومه‌ن نوێنه‌ره‌یل و دویاى ئه‌وه‌یش له‌ مه‌سه‌له‌ى دامه‌زارانن حكوومه‌ت ئاینده‌، ك ئایا پایه‌ى كورده‌یل فه‌یلى ها كووره‌ له‌ هه‌ڵوژاردنه‌یل ئاینده‌؟ تایبه‌تمه‌ندى كاندیكریاگیان چه‌س؟ ئایا كه‌سیگه‌ سه‌روه‌خوه‌ى یا كه‌سیگه‌ وه‌رجله‌ یه‌ وه‌ل حزبه‌یل تر كار كردگه‌و ئمڕوو خوازیاره‌ خزمه‌ت وه‌ پێكهاته‌گه‌ى بكا، یا كه‌سیگه‌ ك هێمان ها وه‌ل حزبیگ و خوازیاره‌ له‌ به‌رژه‌وه‌ندى پێكهاته‌گه‌ى كار بكا له‌ڕێ ئه‌و حزبه‌ ك له‌تى كار ئه‌كا؟چوین هه‌قه‌یلیان دابین كه‌ن؟ ئایا كورده‌یل فه‌یلى رێككه‌فن له‌بان كه‌سه‌یل چالاك له‌ رێكخریاگه‌یل ئمڕوو فه‌یلى؟ مه‌ردمانیگیش ئویشن ئى مه‌سه‌له‌ى دامه‌زرانن میلیشیایه‌یل چه‌كداره‌ چه‌س؟

 

ئه‌یه‌ ئه‌و پرسیاره‌یله‌سه‌ ك له‌ى رووژه‌یله‌ ئه‌یه‌یده‌ هویر وخه‌یاڵ ئه‌وانه‌ك گرنگى ئه‌یه‌نه‌ چاره‌نویس كورده‌یل فه‌یلى، ئمجا له‌یره‌ ته‌قالا كه‌یم رووشنایى بخه‌یمنه‌ بان ئى پرسیاره‌یله‌و كاردانه‌وه‌ى جووراوجوور گشت كورده‌یل فه‌یلى و سه‌ره‌تا وه‌ كه‌سایه‌تییگ سه‌روه‌خوه‌ى ده‌س وه‌پى كه‌یم!

 

كه‌سایه‌تى سه‌روه‌خوه‌ى كییه‌و سفه‌ت و تواناو ئه‌زموونى له‌ كار سیاسى چه‌س؟ كه‌س سه‌روه‌خوه‌ى ئه‌و كه‌سه‌سه‌ ك ئنتماى حزبى و رێڕه‌ویگ دیاریكریاگ نه‌یرید ك وه‌ گووره‌ى بتویه‌نید بڕیار بیه‌ێد له‌ وه‌خت و شوون گونجیاگ، ئمجا وه‌ باوه‌ڕ مه‌ردمانیگیش ئى كه‌س سه‌روه‌خوه‌یه‌ وه‌ى جووره‌ سفه‌ته‌یله‌ ئاگادارى خاس و شاره‌زایى خواستیگ له‌ كار سیاسى و به‌رنامه‌ى هه‌ڵوژاردن نه‌یریدو دویاخریش گومان له‌ تواناو ئه‌ركه‌یلى كریه‌ید وه‌ ئه‌وه‌ك مه‌حاڵه‌ بتویه‌نید ده‌نگ كورد فه‌یلى بڕه‌سنێد و بتویه‌نێد وه‌رگرى له‌ هه‌قه‌یلیان بكا له‌وه‌ردم ئه‌و رویوه‌ڕوى بوینه‌وه‌ ك ئه‌یه‌یده‌ تویش ئاینده‌و چاره‌نویسیان.

 

وه‌لى ئى كه‌سایه‌تیه‌ له‌ باوه‌ڕ مه‌ردمان تر ئه‌وسا وه‌ل حزبه‌یل تر كار كردگه‌و ئمڕوو ئه‌خوازێد له‌ خزمه‌ت كورده‌یل فه‌یلى كار بكا، وه‌ل ئه‌وه‌یشا بڕێگ مه‌ردم گومان له‌ تواناى پێشكه‌شكردن كاره‌یل ئى كه‌سایه‌تیه‌ كه‌ن ئه‌را ئى پێكهاته‌ى چه‌وسیاگه‌و بڕێگ تریش ئویشن: هه‌رچه‌نى ئى كه‌سایه‌تیه‌ شاره‌زایى له‌ سیاسه‌ت دیرێد له‌ ئاكام كاركردنى وه‌ل حزبه‌یلا، وه‌لى هه‌ر بایه‌د ئنتماو دڵسووزى ئه‌را ئه‌و حزب وه‌رینیه‌ داشتوود و ئه‌را به‌رژه‌وه‌ندیه‌یلى كار بكا نه‌ك ئه‌را به‌رژه‌وه‌ندى كورد فه‌یلى، وه‌لى مه‌ردمانیگیش وه‌ شیوه‌یگ تر هویره‌و كه‌ن و ئویشن: شایه‌ت ئى كه‌سایه‌تیه‌ وه‌گووره‌ى ئه‌زموون و شاره‌زایى ئه‌وساى له‌كار سیاسى خوه‌ى له‌ى هه‌له‌ بوینیده‌وه‌و كار ئه‌را قانجاز خوه‌ى بكاو وه‌تایبه‌ت ئى جووره‌ كاریگیش ئه‌وسا وه‌ى پله‌و پایه‌ نه‌كه‌فتگه‌سه‌ ده‌سى.

 

له‌باوه‌ت ئه‌و كه‌سیشه‌ ك هیمان ئنتما دیرید وه‌ل حزبیگاو كار ئه‌ڕاى ئه‌كا چ نه‌ته‌وه‌یى یا نیشتمانى یا دینى، یه‌یش هه‌ر مایه‌ى گومانه‌ له‌لاى مه‌ردمانیگ  له‌باوه‌ت تواناى كاركردنى له‌وه‌ر خاتر به‌رژه‌وه‌ندى كورده‌یل فه‌یلى، چوینكه‌ هه‌ر جووریگ بوود هه‌ر به‌رژه‌وه‌ندى حزبه‌گه‌ى ئه‌خاده‌ بان به‌رژه‌وه‌ندى كورده‌یل فه‌یلى و مه‌ردمانیگیش ئویشن: ده‌رفه‌ت له‌ ده‌نگه‌یل فه‌یلى وه‌رگرید له‌ هه‌ڵوژاردنه‌یل و دویاخریش هویچ قانجازیگ نه‌یرید ئه‌را فه‌یلى.

 

له‌باوه‌ت میلیشیایه‌یل چه‌كداریش، كه‌سه‌یلیگ ئویشن: كورد فه‌یلى ئه‌گه‌ر هێز خوه‌یان جوور پێكهاته‌یل تر نارنه‌ كار و خوه‌یان نیشان نه‌یه‌ن مه‌حاڵه‌ ده‌سكه‌فتیگ بارنه‌ ده‌س له‌ى حكوومه‌ته‌و مه‌حاڵه‌ ئه‌و هه‌قه‌یلیانه‌ بارنه‌و ك وه‌ غه‌در زه‌فت گریا، به‌ڵكوو ته‌نیا وه‌ هێز تویه‌نن ئى كاره‌ ئه‌نجام بیه‌ن، وه‌لى كه‌سه‌یلیگ هه‌ن دژ ئى هویره‌ وسیه‌ن و ئویشن لایه‌ق وه‌ كورده‌یل فه‌یلى نییه‌، چوینكه‌ كورد فه‌یلى وه‌ دریژایى مێژوو ئاشتیخواز بویه‌.

 

ئمجا له‌یره‌ قه‌یران متمانه‌و گومان ئه‌رامان ده‌ركه‌فێد له‌باوه‌ت ئه‌وه‌ك كى تواناى نوێنه‌رایه‌تیكردن ئى پێكهاته‌ دیرێد تا وه‌رگرى له‌لیان بكاو مقه‌یه‌تى به‌رژه‌وه‌ندیه‌یل و وجوودیان بكا له‌ عراق.

 

له‌باوه‌ت ئه‌و كه‌سایه‌تیه‌یل كورد فه‌یلییشه‌ وه‌تایبه‌ت ئه‌وانه‌ك له‌لیان كاركه‌ن و ئنتما ئه‌را رێكخریاگه‌یل پاك كورد فه‌یلى دیرن و نه‌كه‌فتنه‌سه‌ ژێر حزبه‌یل مه‌زه‌وى و كوردستانى و دژایه‌تیانیش ناكاو په‌یوه‌ندى خاس وه‌ل گشت لایه‌نیگا دیرن و كونیه‌تیان له‌لاى مه‌رد پاكه‌، بیگومان ئى جووره‌ كه‌سه‌یله‌ تا ڕاده‌یگ په‌سه‌نن ئه‌را نوێنه‌رایه‌تى كورده‌یل فه‌یلى.

 

له‌یره‌یش جووریگ تر له‌ نگه‌رانى هه‌س، ك شایه‌ت ئى نگه‌رانیه‌ چه‌واشه‌ بوود، ئه‌ویش ئه‌وه‌سه‌ ئى رێكخریاگ و كه‌سایه‌تیه‌یله‌ شایه‌ت خوه‌یان گومان له‌ تواناى پشتگیریكردن كورد فه‌یلى بكه‌ن ئه‌را هه‌ڵوژاردن ئى جوره‌ كه‌سه‌یلیگ ك خوه‌یان له‌ مه‌یدان سیاسى عراقى ده‌رخه‌ن، ئى گومانه‌یلیشه‌ شایه‌ت له‌جى خوه‌ى  بوود، چوینكه‌ ئى جووره‌ كه‌سایه‌تى و ریكخریاگه‌یل كورد فه‌یلیه‌ یارمه‌تى و پشتگیرى دارایى نه‌یرن له‌ حز ب و ده‌وڵه‌ته‌یل و ئمڕوویش جى داخه‌ پشتگیرى دارایى بنه‌ڕه‌ت كار سیاسیه‌ له‌ى عراق تازه‌.

 

له‌یه‌ ئویشیم: خود كورده‌یل فه‌یلى بایه‌د خوه‌یان ئى كاره‌یله‌ یه‌كلاوه‌ بكه‌ن، هه‌ر له‌وه‌ر ئه‌وه‌یش هه‌وه‌جه‌ وه‌ كرده‌وه‌ى خاسیگ كریه‌ید ئه‌را كاڵین ئومیدو متمانه‌و  هاوكارى له‌ ده‌روین كورد فه‌یلى له‌ڕێ سمینار و كۆنگره‌و هووكاره‌یل ره‌سانن، ك وه‌ل ئه‌وه‌یشا پشتگیرى هه‌ركه‌سیگ بكریه‌ێد ك خوازیاره‌ ئه‌را ئى پێكهاته‌ى ره‌سه‌نه‌ كار بكا وه‌تایبه‌ت كه‌سه‌یل رووشنهویر و شاره‌زا، وه‌ل ئه‌وه‌یشا كورده‌یل فه‌یلى خاوه‌ن كه‌سایه‌تیه‌یل فره‌یگن له‌ئاست به‌رز ئه‌كادیمى و پیشه‌یى و له‌ گشت بواریگ و ته‌نیا هه‌وه‌جه‌ وه‌ متمانه‌و هاوكارى دیرن له‌ناونى خوه‌یان و مه‌رجیش نییه‌ یه‌كه‌و بگرن وه‌لى بایه‌د هاوكارى یه‌كترى بكه‌ن.

 

زیا كه‌ریم

ج. ا