ژنيگ پيشه‌نگ له‌ كاروان گورانيچڕين كوردى

شفق نيوز

1904 له ئاوايی "دێرگول" جزیره‌ی بۆتان له كوردستان باكوور هاتگه‌سه‌ دونيا.

 

ژیان مناڵیی له شار دیاربه‌كر برديه‌سه سه‌ر، وه‌ختيگ جه‌نگ یه‌كه‌م جه‌هانی له پاییز 1914 ده‌س وه‌پی كرد ژیان ناوچه‌گه‌یان له‌ڕوی سياسى و كومه‌ڵایه‌تییه‌و ئاڵۆزبويه‌ و تويش كاره‌سات ژیان و گوزه‌ران بوين، وه‌يخاتره‌ فره‌تر مه‌ردم ئه‌و ناوچه‌يله ڕووى كردنه‌سه‌ پارچه‌یل تر كوردستان، وه‌تایبه‌تی وه‌ره‌و كوردستان باشوور و وڵات شام چين و موڵك و ماواى خوه‌یان هيشتنه‌‌جى،‌ خاتوو "مه‌ریه‌م خان" دويه‌ته ده‌نگخوه‌ش و شه‌یدای هونه‌رو ئاواز كوردى له‌ سه‌ره‌تا وه‌ره‌و سوریا ‌چوود و ماوه‌یگ له دیمه‌شق ژيه‌ی و مه‌ریه‌م خان له ساڵ 1924 تيه‌ێده كوردستان باشوور و له زاخۆ ماوه‌یگ نیشته‌جى ‌بوود و دوياخر، وه‌ختيگ ژنه‌فێ له به‌غدا كۆمپانیای گورانی تۆماركردن له‌بان قه‌وان دامه‌زرياس، ڕوى ئه‌كاده پایته‌خت و ماڵيگ له "باب الشرقی" وه‌كرا ‌گرێ و ماڵێگ خنج و منج ئه‌را خوه‌ی نه‌ێده‌ يه‌ك و له ساڵ 1930 چه‌ن لاوك و به‌سته‌یگ ‌سۆزدار له‌بان قه‌وان له كۆمپانیایل "ئۆدین" و "به‌یزافۆن" تومار ئه‌كا و ئه‌ى گورانيه‌يليشه‌ بڕێگن له لاوك و به‌سته‌يل تۆمار كرياگی له‌بان قه‌وان:

 

1- لۆركێ لۆركێ

2- گولێ وه‌ی نار وه‌ی نارێ

3- هه‌ی به‌رده به‌رده

4- لێلێ وه‌سۆ

5- گوڵ شێنی شێنی

6- یار حه‌لیمێ

7- محه‌مه‌دێ ڕۆمی

8- لێلێ ئێمۆ

9- لێ داێ

10- لێلێ سوارۆ

11- ئه‌ی ده‌لال

 

بيجگه له گورانيه‌يل بان قه‌وانی، وه‌ده‌یان لاوك و به‌سته‌ی كوردی له ئاهه‌نگ گورانی ڕاسه‌وخوه‌ی له ڕادیۆی كوردی به‌غدا چڕيه‌و چه‌پكێگ گورانیيش وه‌شيوه‌ی دوێتۆ وه‌ل هونه‌رمه‌نده‌یل گورانيچڕ كورد، محه‌مه‌د عارف جزیری، حه‌سه‌ن جه‌زراوی و ئه‌ڵماس محه‌مه‌د وتيه.

 

مه‌ریه‌م خان له ساڵ 1949 تويش نه‌خوه‌شییگ كوشنده بويه، هه‌رچه‌ن خريا نه‌خوه‌شخانه‌ی تایبه‌تى و ته‌قالا ئه‌را چاره‌سه‌ركردن نه‌خوه‌شییه‌گه‌ی دريا، وه‌لی بێ سوود بوى و له‌ ئه‌نجام ژان و ئازار له كووتاييه‌يل مانگ ته‌ممووز ئه‌و ساڵه 1949 له شار به‌‌غدا كووچ دويایین كرد و تومار ژیان ژنيگ پيشه‌نگ له‌ كاروان گورانيچڕين كوردى ئه‌را هه‌ميشه‌ پێچريا‌وه.