دڵشكانن

شفق نيوز

  لائوستى ك فكرمه‌نیگ كویه‌ن وڵات چینه‌، چه‌ن سه‌ده‌یگ وه‌رجه‌ زایین ژیاگه‌و دروسكه‌ر و رابه‌ر ریڕه‌و فه‌لسه‌فى و ئایینى "تائۆیزم" بویه‌ ك شیوازیگ تایبه‌ت دونیادیده‌نى و فكریه‌.

لائۆستى له‌باوه‌ت دووسایه‌تیه‌و قسه‌ى جوانیگ وتگه‌ ك له‌تى ئویشید: میهره‌بانى له‌ وشه‌ متمانه‌ ئه‌یه‌ریدو له‌هویره‌وكردنیش وه‌ره‌و قویلایى گام وه‌پید نه‌یدو له‌ به‌خشینیش خوه‌شى ئه‌یه‌رید.

وجوود میهره‌بانى وه‌رانوه‌ر وه‌ یه‌كترى، یه‌كیگه‌ له‌ مه‌رجه‌یل فریه‌ گرینگ وه‌یه‌كه‌وژیان مه‌ردمانیگه‌. ئنجا ئایا ئاده‌میزاده‌یل ئیمه‌ دڵ یه‌كترى شكنن؟ له‌وه‌رچه‌ و هووكاره‌یلى چه‌ن؟ ژان سه‌خت رووژگار ئیسه‌ى ئیمه‌، رووژگاریگه‌ پڕه‌ له‌ دڵشكانن، شایه‌ت ك هووكاره‌یلى په‌یوه‌ندى وه‌ گرژبوین بار سه‌خته‌و داشتوود، گرژبوینیگ ك له‌ ئاكام كه‌ڵه‌كه‌بوین جه‌نگه‌یل دریژماوه‌ سه‌رچه‌وه‌ گرتگه‌و ئه‌و جه‌نگ و كیشمه‌كیشه‌یل خویناویه‌ بوینه‌ سه‌رچه‌وه‌ى كیشه‌یل گه‌وراو تائیسه‌یش پلانیگ ئه‌رایان نه‌یریم ك خوه‌مان له‌ چگنگیان قورتار كه‌یم.

گرژبوین و تویڕه‌یى ك له‌یوا له‌ئاده‌میزاد ئه‌كه‌ن وه‌ ئاسانى دڵى وه‌رانوه‌ره‌گه‌ى بشكنید، دیارده‌یگه‌ ك تیكه‌ڵ ره‌فتار رووژانه‌ى ئیمه‌ بویه‌. له‌لاى ئیمه‌ دڵشكانن بویه‌سه‌ دیارده‌یگ رووژانه‌، له‌لاى ئیمه‌ دڵشكانن له‌سه‌ره‌تاى دیداره‌و ده‌ركه‌فید وه‌ گووره‌ى سڵام و هه‌واڵپرسى.

بیگومان وه‌ختى ك شیواز سڵامكردن نائاسایى بوود، ئاكام خراو له‌لى كه‌فیده‌و. ده‌سوه‌پیكردن دیدار و دوینستن یه‌كترى ناونى مه‌ردم له‌لاى ئیمه‌ وه‌ جووریگه‌ له‌جیاى متمانه‌ گومان دروس ئه‌كا! سڵام له‌جیاى خوه‌شه‌ویسى هه‌ڵگر چشته‌یلیگه‌ له‌ ناحه‌زى و گرژبوین.

قسه‌ى ره‌ق و گرژ دڵشكاننه‌، ئنجا بایه‌سه‌ ئاده‌میزاد له‌جیاى گشت ئه‌و چشته‌یل دڵشكنه‌ هه‌وڵ ئه‌وه‌ بیه‌ن میهره‌بانى دروس بكه‌ن و له‌ هیز دڵشكیان دویره‌و بكه‌فن، دى نازانیم ئیمه‌ له‌ چ رووژگاریگ ژیه‌یم! كه‌سمان له‌وه‌ نه‌فامستیمنه‌ ك دڵشكانن چ كاره‌ساتیگ ماڵویرانیه‌!

له‌ رۆمان نیكۆس كازانتزاكیس"1883- 1957"، له‌باوه‌ت مه‌سه‌له‌ى دڵشكاننه‌و كابرایگ له‌ ئامووژگارى كازانتزاكیش ئویشید: خوجاى میهره‌بان ئه‌وه‌نه‌ گه‌وراس له‌ هه‌فت ته‌به‌قه‌ى ئاسمان و له‌ هه‌فت ته‌به‌قه‌ى زه‌وى شوونى نیه‌وده‌و، وه‌لى له‌ دڵ بویچگ ئاده‌میزادیگ شوونى بووده‌و، هه‌ر وه‌و خاتریشه‌ ئومیده‌وارم دڵ ئاده‌میزاد نه‌شكنن، دڵ هویچ كه‌سیگ .

سیروان ره‌حیم

ج . أ