په‌يامبه‌ره‌يل عراق و"جورئه‌تدار"يش خاوه‌ن گه‌وراترين دزييه‌

شفق نيوز

بيگومان ئه‌و وه‌رپرس و ده‌سداره‌يله‌ له‌ گه‌ناته‌كارى عراق، گه‌وراترين روێداين گه‌ناته‌كارى دارايى له‌ مێژوو عراق تۆمار كردن له‌ جه‌هان وه‌ تايبه‌ت له‌ى ساڵه‌يل دوياخره‌، به‌ڵێ ئه‌وانه‌ رۆڵ داشتن، به‌ڵكوو وه‌رپرسيش بوين له‌ وه‌تاڵانداين سه‌دان مليار دۆلار، جوور ئه‌وه‌گ مشعان جبورى ئه‌ندام وت: گشت ئه‌وانه‌ رشپه‌تخوه‌رن، ئيمه‌يش ئويشيم ئى داراييه‌ رشپه‌ت و دزى و تاوانه‌و بايه‌سه‌ ئه‌وانه‌ بخريه‌نه‌ وه‌ر پرسكارى، ئه‌وانه‌ تاوانبارن و ده‌س ديرن له‌ بردن دارايى، ئه‌وانه‌ دارايى حكومه‌ت دزينه‌،، ته‌نانه‌ت به‌شدارنيش له‌ كوشتن و ته‌قينه‌وه‌يليش، وه‌لێ نه‌بايه‌د باس له‌ گشت چشتيگيش بكريه‌ێد.

دوياى رميان رژيم سه‌دام حسێن تا رووژ ئمڕوو، په‌يامبه‌ره‌يل فريه‌يگ ئه‌را ناكووكى و ته‌كڕه‌وى له‌ ده‌سڵات و جه‌رده‌يليگ ئه‌را وه‌تاڵانبردن دارايى و ده‌سخستن پرووژه‌يل وه‌شيوه‌ى چه‌فتيگ ده‌ركه‌فتنه‌، ئه‌وانه‌ وه‌ گشت ئاساييگ و وه‌چه‌واشه‌ى دزيكه‌ره‌يل جانتاو گيرفانه‌يل گشت كرده‌وه‌يگ ئه‌نجام دانه‌.

بيگومان ئى مافيايه‌يله‌ ته‌سه‌لسوليگ هه‌ره‌مى ديرن له‌ كاولكردن عراق، ئه‌را نموونه‌ يه‌كيگ له‌ليان پيشنياريگ ئه‌كا ئه‌را دزين بانك ناوه‌ندى، يه‌كيگ تريش له‌ليان له‌يوا دوينێد ك خاستر ئه‌وه‌سه‌ باقى شوونه‌واره‌يل بدزريه‌ێد، وه‌لێ يه‌كيگ تريان دزيكردن پويل و ته‌ڵا وه‌ خاستر دوينێد، ئمجا جورئه‌تدارترين كاريگ له‌لاى ئه‌و باقييان دزيكردن عراق و فرووشتنيه‌.

له‌يرا وه‌شيوه‌يگ ئاشكرا دوينيم له‌ هه‌ر وه‌ختيگ باس له‌ خاسسازيه‌يل و دوسيه‌يل گه‌ناته‌كارى ئه‌كريه‌ێد و ئه‌وانه‌گ فيشتر گه‌ناته‌كارن پيشكه‌ش وه‌ حكومه‌ت ئه‌كريه‌ن، ئمجا كابينه‌ ‌ حكوميه‌گه‌ى ريزدار عبادييش له‌ گومان خه‌ڵوه‌ت نيه‌ و تومه‌تباره‌يل گه‌ناته‌كارييش له‌وه‌ختيگ ك بايه‌سه‌ بكه‌فنه‌ تيه‌ريكى زيندانه‌يل، دوينێد خوه‌يان له‌ هه‌واى سازگار جوانترين هه‌وارگه‌يل ديار ئه‌يه‌ن.

بايه‌سه‌ ئه‌وه‌يش له‌ هوير نه‌وه‌يم ك زوورم دز و جه‌رده‌يليش له‌ جه‌هان له‌ كه‌سه‌يل ديكتاتۆرن، ته‌نانه‌ت كه‌سه‌يليگيش جوور هتله‌ر و ستالينيش له‌هه‌مان وه‌خت هه‌م زيره‌ك و هه‌ميش نه‌فاميش بوينه‌، چوينكه‌ فريه‌ پشت وه‌خوه‌يان به‌سيان و جورئه‌ت له‌بان گشت چشتگ كرديان و هه‌ر چشتيگيش وه‌ دڵيان نه‌وياتاد وه‌ ده‌نگ به‌رز روى وه‌ڕوى بويانه‌و‌.

ئيمه‌يش، حكومه‌ته‌يل يه‌ك له‌شوون هاتن وچين، جوور نه‌فامييگ تواناى موحاسبه‌كردن گه‌ناته‌كاره‌يل نه‌ياشتن، وه‌ك كه‌سيگ رازى بوود له‌بان سه‌ندن په‌يكه‌ر ئازادى له‌ به‌غداو دوياخريش بخوازێد هه‌وه‌جه‌ى خوه‌ى بچه‌سپنێد و وه‌و خاتريشه‌ به‌ڵگه‌و نيشانه‌ بارێده‌و، وه‌لێ باقى مه‌ردم وه‌پى خه‌نن، هه‌ر له‌وه‌ر ئه‌وه‌يش ئه‌و تومه‌تباره‌يله‌ ك تومه‌ت گه‌ناته‌كارى ديرن ترس له‌ مه‌سه‌له‌ى دادگاييكردن نه‌يرن و باسيش ئه‌كه‌ن و ئويشن چشته‌يل گه‌وراتر له‌يه‌ بويه‌و دوياخريش ئه‌وه‌سه‌ ك ئمڕوو ئه‌يه‌ن و ئويشن نازانيم ئى پويله‌ ك برديمنه‌سه‌ى حه‌رامه‌؟ چوينكه‌ دارايى حه‌ڵاڵ يا حه‌رام له‌ليمان شارياوه‌و ئه‌گه‌ر ئيمه‌ پويل له‌ بانك ناوه‌ندى يا له‌ بودجه‌ يا پرووژه‌يليگ بورديايم ته‌نيا له‌وه‌ر ئه‌وه‌ بويه‌ هه‌وه‌جه‌يلمان وه‌پى جيوه‌جى بكه‌يم.

دى دوياى رميان رژيم سه‌دام حسێن بڕێگ له‌و وه‌رپرسه‌يل به‌شداره‌ له‌ حكومه‌ت و بڕێگ تر له‌ دزه‌يل په‌يا بوين و ئه‌نجومه‌ن نوێنه‌ره‌يليش مينه‌ى ته‌وافق ئه‌كا له‌ مه‌سه‌له‌ى خراوى و خاسيه‌يل.

يه‌يش حاڵمانه‌ وه‌ ده‌س ئه‌وه‌گ ئيمه‌ ده‌وڵه‌ت مليۆنه‌ها يه‌تيم و بيوه‌ژن و بيكار و كووچ وه‌پيكرياگ و كووچكردگيم، ئيمه‌ ده‌وڵه‌ت سنى مه‌وه‌زه‌و كورد وه‌كراگيرياگ ئسرائيل و شيعه‌ى سه‌فه‌وى رافزى!! ئه‌يه‌ قسه‌ى ئيوه‌ نيه‌ له‌ گشت حاڵه‌تيگ؟ منيش ئويشم باقى ئايينه‌يل و مه‌زه‌وه‌يل خستينه‌يانه‌ ده‌يشت باسكردن، هه‌ر وه‌و خاتريشه‌ ئاقڵمه‌نه‌يل وڵاته‌گه‌ هويچ قسه‌يگ ئه‌رايان نه‌مه‌ند و وجوود ئه‌رايان نه‌يشتن، چوينكه‌ ئيمه‌ هايمنه‌ ده‌وڵه‌تيگ دوياى رميان رژيم خوينمژ تا رووژ ئمڕوو نازانيم له‌لايه‌ن كييه‌و بريه‌ێده‌ ڕييه‌و، ئمجا ئى باريشه‌ هه‌وه‌جه‌ وه‌ مه‌وجزه‌يگ ديرێد ئه‌را ئه‌وه‌گ قورتار بويمن له‌لى و هه‌ناس ئووخه‌ى بيه‌يم.

عه‌لى حسێن فه‌يلى