كۆنفرانس ژنه‌يل و كه‌مپێن حاجی لەقلەق!

شفق نيوز

پرس هاوڕاو كووك بوون. فێشتر كۆنفرانس و گرده‌وبوينه‌يل كوردى وه‌ ناكووكى ته‌مام ئه‌دێ. ئه‌را دويره‌و كه‌فيم، كۆنفرانس ئستالينيترين حزب كورديش هه‌م بێ گله‌ى و لچه‌ قورتى نه‌ويه‌و نێشه‌.

 

پياو كورد ك ئه‌زموونێگ دويرودرێژ له‌ وه‌پا كردن كۆنفرانس ديرێد، هه‌ ئيرنگه‌يش كۆنفرانسێ وه‌ بێ گێچه‌ڵ ئه‌نجام نيايه‌. خوو مه‌رجيش نيه‌، ئه‌ى كۆنفراسه‌ له‌ بان ده‌وڵه‌ت كوردى يا يه‌كه‌و گرتن دو رێخرياى سايكۆلوژى هه‌ولێر و سلێمانى بوود ك تا يانه‌ يه‌كه‌و گرتن، فره‌ كه‌س هه‌ نه‌زانسن ئه‌ى دو چشته‌ هه‌ هه‌ن!. ناكووكى و ئه‌ى له‌ دژ يه‌ك وسانه‌و به‌ياننامه‌كارييه‌، هه‌ميشه‌‌  ئه‌نجام گرده‌وبوينه‌يل كورد بويه‌و هه‌سيش.

خوه‌ش خوه‌شيش ئه‌ى كولتوور وه‌ گژيه‌كاچينه‌ ره‌سيه‌ ژن كوردو كۆنفرانس نه‌ته‌وه‌يى ژنه‌يل كورديش، وه‌ر له‌ يه‌ ده‌س وه‌پێ بكا، دو سێ به‌ره‌ كه‌فته‌ تێ.

جارێ هويچ نه‌وى، ژنه‌يل خوه‌رهه‌ڵات له‌ ناو خوه‌يان بوينه‌ دو به‌شه‌و، له‌تێ له‌ليان به‌شدار بوى و له‌ت تريش له‌ليان توريان.

وه‌ل سه‌لاموعه‌له‌يكوم، له‌ ناو ژنه‌يل ناو قه‌دردار عه‌بدوڵڵا ئوجه‌لان بويه‌ گێچه‌يله‌و نه‌ر. ئه‌ى ژنه‌يل ئه‌وچنه‌ سه‌ر له‌ خوه‌يان و مه‌ردم شێوانن ك رووژنامه‌ هه‌ولير ئمجا چ وه راسى يا ئه‌را ته‌زك وه‌شانيش بوود، له‌ مانشێتێ نويسا:"ژنه‌يل هه‌ر سێ پارچه‌ى كوردستان"، جارێگيش ديار نيه‌ ئه‌و پارچه‌گه‌ هاله‌ كوو!. ئمجا ئيچنه‌ ئه‌نجامێ ديار نيه‌ له‌ ژاوه‌ژاوه‌ گفتوگو ژنه‌يله‌ يا خو به‌رهاورياى مانشێت نويس ده‌س پێس رووژنامه‌ هه‌ولێره‌!.

پرسێ نه‌ته‌وه‌يى نه‌تويه‌نست، چنه‌ حاجى له‌قله‌قێگ ده‌نگ گرده‌و بكا. ئاخريش كۆمه‌ڵه‌ى كه‌سيش ك ژماره‌يان له‌ نيمه‌ى ئه‌ندام كۆنفرانس نه‌ته‌وه‌يى ژنه‌يل كورد فێشتر بوى، هاووه‌خت وه‌ل ئه‌ى كۆنفرانسه‌، بێ ئه‌وگ هويچ كۆنفرانسێگيش بگرن، كه‌مپينێ پڕمانادار ئه‌را حاجى له‌قله‌ق شه‌هيد بوى سه‌رمناره‌ى مه‌سجد خانه‌قاى هه‌ولێر سازدان. ئه‌و حاجى له‌ق‌له‌قه‌ ك وه‌ ده‌س قاره‌مانێگ جه‌نگ ناوخوه‌ى هه‌ناسێ سه‌رد بوى. سه‌ڵام له‌ ژنه‌يل كورد، سه‌ڵام له‌ پرس نه‌ته‌وه‌يى، سه‌ڵام له‌ حاجى له‌ق‌له‌ق./ش

گۆران محەممەد