چوین مامڵه‌ وه‌ل به‌هره‌داره‌یل بكه‌یم؟

شفق نيوز

  له‌وه‌ر ئه‌وه‌ك خاوه‌ن به‌هره‌یل جیاوازن له‌ كه‌سه‌یل تر ئاسایى، ماناى ئه‌وه‌سه‌ بایه‌د ئه‌وه‌نه‌ى ئه‌و جیاوازیه‌یلیانه‌ زه‌مینه‌سازى ئه‌را گه‌شه‌ وه‌پیداین به‌هره‌یلیان بكریه‌ید.

گرینگترین قوناغ، قوناغ مناڵیه‌، یه‌یش وه‌و مانا ك ئه‌رك یه‌كه‌م ئه‌كه‌فیده‌ بان بان خیزان ك چوین بتویه‌نید په‌ى وه‌ به‌هره‌ى مناڵه‌ به‌هره‌داره‌گه‌ى بووه‌یدو بتویه‌نید ده‌سنیشانى بكا تا مامڵه‌ى گونجیاگ وه‌لیا بكریه‌یدو زه‌مینه‌سازى ئه‌راى دابین بكریه‌ید.

ئیمه‌ ئه‌گه‌ر بایم و له‌ عومر دیریگ ئاشناى به‌هره‌ى روڵه‌یلمان بویم، ئه‌وه‌ بیگومان ئه‌و وه‌خته‌ شایه‌ت جوور خواستیگ نه‌تویه‌نیم بویمنه‌ هاوڕى وه‌ل هه‌وه‌جه‌یلیا.

خیزان بایه‌سه‌ دویره‌و بكه‌فید له‌ وه‌كارهاوردن گشت جووره‌ تون وتیژییگ لاشه‌یى و ده‌روینى مناڵه‌ به‌هره‌داره‌گه‌ى و نیه‌ود كزیان بكه‌یم و خوه‌مان بكه‌یمنه‌ سه‌رچه‌وه‌یگ فشار، هه‌ر له‌وه‌ر ئه‌وه‌یش بایه‌سه‌ پشتگیرى له‌لیان بكه‌یم له‌ داناین خشته‌یگ دروس ئه‌را دابه‌شكردن وه‌خته‌یلى.

ئه‌ویش وه‌ جووریگ ك وه‌خته‌یلى دابه‌ش بوود له‌ ناونى خوه‌ندن و جیوه‌جیكردن ئه‌ركه‌یل خوه‌ندن و مه‌سه‌له‌ى وه‌سه‌ربردن وه‌خت و ئه‌نجامداین ئاره‌زووه‌یلى و موڵه‌ت و وچانداینى. چوینكه‌ نیه‌ود وه‌خته‌یلى پڕ له‌ شپرزى بوود.

بایه‌سه‌ خیزان به‌هره‌ى مناڵه‌گه‌ى جوور خاڵیگ بته‌و باس بكاو شانازى وه‌پیه‌و بكادو زووان دیالۆگ و گفتگوو وه‌لیا باریده‌ كار. جارجاریگ له‌وه‌ر نه‌وین هوشیارى خاسیگ یا ره‌فتاریگ نادروس خیزانى نوڕید گووش وه‌ به‌هره‌ى مناڵ نیه‌دریه‌یدو ئه‌و مناڵه‌ كریه‌یده‌ قوربانى.

هه‌ر له‌وه‌ر ئه‌وه‌یش بایه‌سه‌ باخچه‌ى ساوایه‌یل و خوه‌ندنگایه‌یل بنه‌ڕه‌تى هه‌ر له‌ سه‌ره‌تاوه‌ پیشبینى تواناو به‌هره‌ى ئه‌و مناڵه‌یله‌ بكه‌ن و توێژه‌ره‌یل ده‌روینییش بایه‌سه‌ نه‌خش ئاشكرایگ داشتوون له‌ى بواره‌ تا مناڵه‌یل به‌هره‌دار زوى ده‌سنیشان بكریه‌ن و خیزانیان ئاگاداره‌و بكه‌ن له‌لیان و كار خواست ئه‌ڕایان ئه‌نجام بدریه‌ید.

ریبوار سوه‌یلى

ج . أ