مه‌رگ فه‌يلی بی پشووه‌

شفق نيوز

هه‌ر وه‌و خاتريشه‌ هووكاره‌ بويم ڕی فريه‌يگ بكه‌م تا ره‌سيه‌ ئه‌وه‌گ پايه‌يلم له‌ده‌س بيه‌م و جوور وسياگيگ وه‌پيم هات ته‌كان نه‌يه‌م له‌شوون خوه‌م، ئمجا دڵته‌نگيه‌يل فريه‌يگ هيشته‌م پير بووم و ئه‌وه‌سه‌ هه‌وڵ ئه‌وه‌ ئه‌يه‌م ته‌نياييم له‌ نه‌خشه‌يلم بشارمه‌وه‌و له‌ بيده‌نگييم ئه‌و چشته‌يله‌ ده‌رنه‌خه‌م ك ناخوام بويمشمه‌يان، وه‌لێ ژانه‌يلم له‌ناو‌ زه‌رده‌خه‌نگه‌يلم شارمه‌و، دی سه‌رمايه‌گه‌يشی گيرستن كه‌يل تر نيه‌.

من له‌ناو دڵه‌يليان ژيه‌م جوور دڵ مناڵه‌، ئاسايين له‌ ديد و خه‌نستنه‌يليان و ته‌نانه‌ت له‌ جنگه‌يليانيش، وه‌ ئاسانی شكيه‌ن و فريه‌يش وه‌ئاسانتر ئه‌مرن، هه‌ر وه‌و خاتريشه‌ ژانه‌يليان ئه‌وه‌نه‌ ژير خاك و مه‌ردميش باوه‌ڕيان ئه‌وه‌سه‌ بی ژانن و چه‌وديری ئحساسه‌يليان ئه‌كه‌ن ته‌نات ئه‌گه‌ريش تاڵ بدێ وه‌ بوونه‌ی يه‌كگرتگييان.

گه‌شت ئێڵه‌گه‌م هه‌وه‌جه‌ وه‌ مه‌هانه‌ ناكا، هه‌گبه‌يگ به‌سيه‌، جارجاريگيش بی هه‌گبه‌ جوور ئه‌وه‌گ روێدا له‌ ته‌سفيركردن كورده‌يل فه‌يلی.

هه‌نای ك شريت زامه‌يل قويلمان خريه‌نه‌ وه‌رچه‌و و ياد ئه‌كريه‌ن وه‌ شرينی كه‌ميگ و تيه‌ڵيه‌يل وه‌سه‌رچگنی، چه‌ روی ئه‌ياد له‌وه‌ختيگ مه‌رگ ته‌نگ وه‌ كه‌سيگ فه‌يلی هه‌ڵچنێد؟ جواوه‌گه‌ی، هويچ چشتيگ روی نايه‌ێد، نه‌ پشوو ئه‌دريه‌ێد و نه‌يش له‌ هه‌واڵه‌يل ئاماژه‌ وه‌پيان ئه‌كريه‌ێد، جاده‌يش له‌وه‌ر خاتری ناوه‌سيه‌ێد، يه‌ك خه‌تيش له‌ مفكه‌ره‌يگ وه‌ناويه‌و نيه‌، ته‌نيا كووچكردنی له‌ ئحساس داڵگی دياره‌و فيشتر چه‌رمگه‌و ئه‌دێ و له‌ پشت باوگه‌ دڵته‌نگه‌ی ده‌رئه‌كه‌فێد ك فيشتر ئه‌چه‌ميه‌ێد.

وه‌لێ خيشه‌يلێ ته‌نيا كه‌ميگ له‌ كار وچان ئه‌يه‌ن و دی وه‌ل گوزه‌ركردن رووژگاريش برايه‌يلی يادگاريه‌يلی له‌ هويريان ئه‌چێد له‌وه‌رده‌م نمايشگه‌ی شيشه‌يی زه‌ڕنگه‌ر و هاوڕيه‌يليشی له‌وه‌خت خواردن سواو دويای وه‌خاك سپاردنی تووزو تووزه‌يگ ده‌س ئه‌كه‌نه‌ زه‌ده‌خه‌نگ و دی وه‌ی جووريشه‌ ژيان وه‌رده‌وام ئه‌دێ.

ئمجا مه‌رگ ئاده‌ميزاد فه‌يلی شه‌كه‌ت هويچ كه‌سيگ ناكا له‌ی وڵاته‌ ته‌نيا وه‌قه‌ورنه‌ره‌گه‌ی نه‌ود، دی هويچ كه‌سيگيش خوه‌ی خه‌ريك ناكا وه‌ زانسن ئايا ئی پياوه‌ عراقيه‌ مردگه‌ يا تابه‌عيه‌ ها وه‌ليا له‌ دويا مه‌نزڵی؟

دوياخريش ئه‌گه‌ريش له‌ بيسه‌روشوونه‌يلمان نه‌ود، له‌بان كێله‌ی قه‌وره‌گه‌ی نويسنن زوی وه‌خته‌يل مناڵی و جوانی وه‌سه‌ر برد و مرد و كيشه‌و مه‌ينه‌تيه‌يلی زوی سه‌رهه‌ڵداو وه‌ليا جيگير بوی تا دويا ويسيتگه‌ی ژيان، وه‌و خاتريشه‌ واز له‌ دوير و نزيك بارن تا ده‌س بكه‌نه‌ زهايمه‌ر گورج له‌وه‌ر ئه‌وه‌گ زوی له‌ هويريانه‌و بچێد.

سوندس ميرزا