سه‌ركه‌فتن له‌ دید مامۆستایه‌یله‌و

شفق نيوز

  ئه‌گه‌ر وه‌نیاز سه‌ركه‌فتن بویم، ئه‌وه‌ بایه‌سه‌ فیشتر گام بنه‌یم و مكوڕتر بویم له‌بان وه‌ده‌سهاوردن سه‌ركه‌فتن. له‌ئاكام شه‌كه‌تى و شه‌ونه‌خه‌فى نیازه‌یل فریه‌یگمان ئه‌یه‌نه‌ دى، ئه‌را نموونه‌ وه‌ختى خوه‌ندكار مه‌یل سه‌ركه‌فتن داشتوود ئه‌وه‌ بایه‌سه‌ خوه‌ى شه‌كه‌ت بكاو شه‌ونه‌خه‌فى بكاو گووش له‌ مامۆستایه‌یلى بگرید.

ماناى ئه‌وه‌سه‌ كه‌سانیگ هه‌ن خه‌و وه‌ سه‌ركه‌فتنه‌و دوینن، وه‌لى كه‌سه‌یلیگ تر هه‌ن شه‌وه‌كیان زوى هه‌ڵست وه‌خاتر وه‌دیهاوردن سه‌ركه‌فتن، به‌ڵى ئه‌یه‌سه‌ ك متمانه‌ ئه‌یاده‌ كه‌سه‌یل زینگ و ئه‌وانه‌كیش دڵنیان له‌ تواناى خوه‌یان ئه‌را سه‌ركه‌فتن هویچ وه‌ختیگ په‌شیمانه‌و نیه‌ون له‌ هه‌وڵه‌یلیان.

له‌لایگ تریشه‌و جۆرج ئه‌لیوت ئویشید: سه‌ركه‌فتن جوور پله‌كانه‌یگه‌، ناتویه‌نید وه‌پیا بچیده‌ بان ئه‌گه‌ر ده‌سه‌یلید له‌ناو گیرفاند بوود، ئنجا وه‌بى هه‌وڵ و ته‌قلاكردن مه‌حاڵه‌ خواست و ئاره‌زووه‌یل بانه‌ دى، ژیانیش وه‌ختیگ خوه‌شه‌ ك مه‌ردم له‌ به‌ر شه‌كه‌تى و ره‌نج خوه‌یان بخوه‌ن.

مامۆستا ئه‌گه‌ر بخوازید سه‌ركه‌فتگ بوود و ناودارى په‌روه‌رده‌یى داشتوود، ئه‌وه‌ بایه‌سه‌ سه‌ره‌تا ریژ و خوه‌شه‌ویستى بڕه‌سیده‌ بنه‌ڕه‌ت په‌یوه‌ندیه‌یل وه‌ل خوه‌ندكاره‌یلیا، دى ئه‌و وه‌ختیشه‌ په‌یوه‌ندى ناونى مامۆستاو خوه‌ندكار په‌یوه‌ندى خاس و برایانه‌و دڵسووزانه‌س، هه‌ر وه‌و خاتریشه‌ مامۆستا دویر له‌ كیشه‌و گرفت و ترس و تویڕه‌یى تویه‌نید ئه‌ركیل خوه‌ى جیوه‌جى بكا، تا ده‌رئه‌نجام خوه‌ندكار له‌ مامۆستاو خوه‌ندنگا نه‌ڕه‌نجیه‌یگ و مامۆستا ناڕه‌حه‌ت و ناسه‌ركه‌فتگ نه‌ود.

مامۆستا وه‌رجه‌ ئه‌وه‌ك زانست بڕه‌سنیده‌ مه‌ژگ خوه‌ندكار، بایه‌سه‌ خوه‌نكار په‌روه‌رده‌ بكا، مامۆستا وه‌رجه‌ ئه‌وه‌ك ره‌سانن زانست و زانیارى و یایگرتن ئه‌را هویر ئاده‌میزاد بكاده‌ ئامانج سه‌ره‌كى خوه‌ى بایه‌سه‌ خوه‌ندكار له‌بان بنه‌ماى خاسیگ په‌وه‌رده‌ بكریه‌ید.

یه‌كیگ له‌خاڵه‌یل تر سه‌ركه‌فتن مامۆستا، خوه‌ندن وه‌رده‌وامه‌ له‌ باوه‌ت و شاره‌زایى خوه‌ى، چوینكه‌ خوه‌ندنه‌وه‌ ئه‌را چالاككردن هویر و هووشه‌و ئه‌را په‌ره‌ وه‌پیداین تواناى ئاده‌میزاده‌و ئه‌را دروسكردن مامۆستایگ سه‌ركه‌فتگه‌.

مامۆستاى سه‌ركه‌فتگ په‌یوه‌ندیه‌یلى وه‌ل خوه‌ندكاره‌یلیا له‌بان بنه‌ڕه‌ت هاورێتیه‌، خوه‌ندكاره‌یل له‌ مامۆستا نزیك بوون و خوه‌شه‌ویسى ناونیانن مسۆگه‌ر بوود، بیگومان هه‌ر خوه‌ندكاریگیش خوه‌شى له‌ مامۆستاگه‌ى خوه‌ى باید، ئه‌وه‌ بیگومان باوه‌ته‌یلیشى خوه‌ش تواید و حه‌ز ئه‌كا له‌ ده‌ره‌سه‌یلى دابنیشیدو گووش له‌لى بگرید، ماناى ئه‌وه‌سه‌ هه‌ر یه‌یش بووده‌ هووكار سه‌ركه‌فتن له‌ كاره‌گه‌ى.

به‌كر كه‌ریم حه‌سه‌ن

ج . أ