كورده‌یل فه‌یلى له‌ناونى دو پرسكارى

شفق نيوز

رویداگیگ ك نیه‌تویه‌نیم له‌شانیه‌تى كه‌مه‌و بكه‌یم له‌وه‌ختیگ ناوى نه‌یم"كاره‌سات"و چنگڕ خوه‌ى له‌ كوچگ و ئاده‌میزاد گیر كردگه‌.

 

تا دویه‌كه‌ دامه‌زرنه‌ر ده‌وڵه‌ت زه‌یتوونى هه‌وره‌ تریشقه‌ دیاد و هه‌ڕه‌شه‌ى ئه‌و كه‌سه‌یله‌ كردیاد ك ئسپات پاكى خوین خوه‌ى وه‌ عوسمانى نه‌كریاتاد، ئه‌ویش له‌ناو بازنه‌ى تاوانبارى و پرس وپرسكارى، وه‌ل ئه‌وه‌یشا(ملوانك مه‌ینه‌تى)كردیاده‌ گه‌ردن ئه‌وانه‌ك بیبه‌ش بوین له‌به‌ره‌كات عوسمانى و گشت عراقییگ تا ئسپات عوسمانیه‌ت خوه‌ى نه‌كردیاد تاوانبار بوى وه‌ ته‌به‌عیه‌، یه‌یش حاڵ كورد فه‌یلى بوى ك ئمڕوو دویاى ده‌یه‌ها هه‌زار بى سه‌روشوونه‌یلیان له‌ ڕوڵه‌و برایه‌یلیان داواى فه‌رامووشكردنیان كریه‌یگ و ده‌س له‌گشت هه‌قه‌یل گیانى و ماددییان هه‌ڵگیریه‌یگ  تا جه‌لاده‌یل له‌عراق له‌خه‌یر بژیه‌ن له‌سایه‌ى حوكم میره‌یل چین و تایفه‌یل.

ئنجا ئایا ئه‌وانه‌ك سزاو مه‌ینه‌تى زندانه‌یل و ئاواره‌یى وڵاته‌یل تر كیشا، چوین تویه‌نیگ  ئه‌و هه‌مگه‌ به‌دبه‌ختیه‌ له‌هویره‌و بووه‌یگ  له‌حزوور دادوه‌ریگ ك گومان ئه‌كا له‌ كوشتن و بى سه‌روشوونبوین هه‌زاره‌ها جایه‌ڵ جوان ك ته‌نیا ئه‌وه‌ زانستن عراق نیشتمانیگ بوى ئه‌ڕایان، دادوه‌ریگ كویه‌ن له‌عراق تازه‌ داوا له‌ ڕوڵه‌ى قوربانیه‌یل ئه‌كا یه‌ڵگه‌ له‌ گیرفان جه‌لاده‌یل بارن ئسپات ئه‌وه‌ بكا وه‌ فه‌رمان ئه‌وان كوشیانه‌و بى سه‌روشوون بوینه‌؟!

مه‌سه‌له‌ هویچ وه‌ختیگ ئه‌ڵڵاجه‌وى نیه‌ له‌وه‌ختیگ ئاده‌میزاد له‌وڵات خوه‌ى بژیه‌یگ  و پیاوه‌یل قانوون له‌تى ده‌ركریاگ بوون تا وه‌ختیگ حاشا له‌خوین ئه‌و جه‌لاده‌یله‌ بكه‌ن، ك داده‌وه‌ر ئیسه‌ له‌بان ده‌سڵات دادوه‌رى سه‌روه‌خوه‌یى)نیشتگه‌و گومان له‌ به‌ڵگه‌یل تاریخى كه‌ن و شمشیر دادگه‌رى گرتنه‌سه‌ ده‌س و هه‌میشه‌ گرفت ئه‌را ده‌وڵه‌ت دروس كه‌ن و نیه‌یلن ئى وڵاتیشه‌ جویر باقى وڵاته‌یل تر له‌سه‌ده‌م تیه‌ریكى ده‌رچوود وه‌ره‌و رووشنایى و پیشكه‌فتن.

شاعر و ڕۆماننویس نسه‌یف فه‌له‌ك ئویشیگ :(داوا له‌ئیمه‌ كه‌ن له‌هویره‌و بووه‌یمه‌ى، تا هه‌لیگ ئه‌ڕایان هه‌ڵكه‌فیگ به‌رهه‌م دكتاتۆریه‌ت دوباره‌وه‌ بكه‌ن، ئیمه‌یش بایه‌سه‌ ئه‌و مه‌ینه‌تیه‌یله‌ بخه‌یمنه‌ وه‌رچه‌ومان تا هه‌میشه‌ ئه‌و بكوشه‌یله‌ بخه‌یگه‌ هویرمان).

ئنجا ئه‌گه‌ر دادگه‌رى بنه‌ڕه‌ت موڵك بوود، ئایا ئه‌وه‌ دادگه‌ریه‌ ك داواى(هه‌رچوار سه‌دامیه‌گه‌)بكریه‌یگ له‌وانه‌ك ده‌ركریان و گشت ئه‌و به‌ڵگه‌یله‌ ك ئسپات عراقیه‌تیان ئه‌كا له‌لیان سه‌نیاوه‌.

ئمڕوو وه‌تایبه‌ت له‌شوون رمانن بته‌گه‌ى به‌غدا له‌مه‌یدان فرده‌وس، گشت ئاواره‌یل هاتنه‌و تا بگه‌ردنه‌ شوون نیشتمانیگ گومكریاگ، ئنجا وتنه‌ پیان شماره‌ى پویل بن گیرفان خوه‌دان بكه‌ن له‌وه‌ك وه‌پیان مه‌ندگه‌ له‌(تومه‌ن یا دۆلار، یا جنه‌یه ئه‌سترلینى) ك هویچ فه‌رقیگ نه‌یرن، چوینكه‌ وه‌ڕیخستن كاروبار وه‌هویچ ئه‌نجام نیه‌دریه‌یگ ته‌نیا وه‌ پویل نه‌ود، ئمڕوویش بڕیگ له‌ ده‌ركیاگه‌یل كورد فه‌یلى هاتنه‌سه‌و تا بگه‌ردنه‌ شوون ئه‌و ماڵه‌ ك له‌وه‌خت ناته‌به‌عیه‌ وتنه‌ پیان بچن ئه‌را(لژنه‌ى دادگه‌رى و پرسكارى) تا ئسپات بكه‌ین ئیوه‌ قوربانى بوینه‌و حاشا كه‌ین له‌خوین جه‌لاده‌یل...!

 

كفاح هادى