به‌شدارى وه‌رزشكاره‌یل كورد فه‌یلى له‌وه‌رزش عراقى چوینه‌؟

شفق نيوز

له‌لى كه‌فته‌وه‌ له‌لایه‌ن بڕیگ له‌ وه‌رزشكاره‌یل وه‌رین و له‌وانه‌ك گرینگى یا ئه‌همیه‌ت دنه‌ مه‌سه‌له‌ى وه‌رزش. هه‌ر له‌وه‌ر ئوه‌یش وه‌رزش عراقى هه‌وه‌جه‌ وه‌ خاسسازى فراوانیگ دیریگ له‌وه‌ر خاتر ئامانجه‌یل جووراوجوور و دوباره‌ هاتنه‌وه‌ى كه‌سه‌یلیگ وه‌ره‌و ئى مه‌یدانه‌ ك ماوه‌ىه‌ فره‌یگه‌ وه‌رزشكاره‌یلمان له‌لى دوره‌و خریانه‌.

له‌باوه‌ت هه‌ڵكه‌فت یا واقع وه‌رزش له‌ى وه‌خته‌یله‌و چشته‌یل تر له‌هه‌مان باوه‌ت، له‌ دیداریگ چه‌ومان كه‌فته‌ وه‌رزشكاره‌یل وه‌رین كورد تایبه‌ت وه‌ وه‌رزش تووپ پا، له‌وانه‌یش وه‌رزشكار( عه‌بدلحسێن عه‌بدلمحسن جومعه‌) ك له‌ساڵ 1960 هاته‌سه‌ دونیاو ده‌رچگ  زانكۆ یا جامعه‌ى ته‌كنۆلۆجیه‌ له‌ به‌ش ئه‌ندازیارى كاره‌با، ك وه‌ى جووره‌ جواو بڕیگ له‌ پرسیاره‌یلمان دا:

* سه‌ره‌تا باس له‌ كاروان وه‌رزشى خوه‌د بكه‌.

- سه‌ره‌تا وه‌ل تیم یا فه‌ریقه‌یل مللى له‌ شار سه‌در ده‌س كردمه‌پى، دویاى ئه‌وه‌یش وازى ئه‌را یانه‌ى نه‌فت كردم له‌ خول یا ده‌وره‌ى پله‌ سێ له‌ساڵ 1977، دویاخریش جیواز بویمن ئه‌را پله‌ دوو، تا ره‌سیمنه‌ پله‌ى یه‌ك، منیش كابتن تیمه‌گه‌ بویم له‌ساڵ 1982 تا 1987، وه‌ل ئه‌وه‌یشا به‌شدارى داشتم وه‌ هه‌ڵوژارده‌ى زانكۆ یا جامعه‌ى ته‌كنۆلۆجى.

* خاسترین وازیزانه‌یل سه‌رده‌مد كى بوین؟

- فه‌لاح حه‌سه‌ن، عه‌دنان درجال، ئه‌حمه‌د رازى، حسێن سه‌عید.

* ئه‌و مه‌شقده‌ره‌یله‌ ك خاسى له‌باند داشتنه‌؟

- مه‌شقده‌ر(مدرب) وه‌رین كازم محه‌مه‌د سوڵتان ك ئیسه‌ پۆست سه‌رپه‌رشكار یانه‌ى نه‌فت وه‌رزشى دیرى، جواد كازم وازیزان ناوده‌وڵه‌تى وه‌رین و مه‌شقده‌ر زه‌رغام حه‌یده‌رى.

* جوانترین ئه‌و وازیه‌یله‌ ك له‌تى به‌شدار بوید؟

جوانترین وازى دژ یانه‌ى سڵێخ بوى، ك له‌لیان بردیمنه‌وه‌و له‌ئه‌نجام ئه‌و سه‌ركه‌فتنیشه‌ چیمنه‌ هه‌ڵوژارده‌ى پله‌ یه‌ك له‌ 1985 / 1986.

* جوانترین ئه‌و گۆڵه‌یله‌ ك تووماریان كرید له‌بان ئاست مللى و جه‌هانى له‌وه‌خت وه‌ازیكردند.

- گۆڵكردنم له‌بان یانه‌ى زه‌ورا بوى له‌ 1986 / 1987.

* چوین مه‌زه‌نه‌ى به‌شدارى كورده‌یل فه‌یلى كه‌ید له‌ وه‌رزش عراقى؟

- وه‌ باوه‌ڕم به‌شدارى كورده‌یل فه‌یلى له‌وه‌رزش عراقى له‌ى وه‌خته‌یله‌ فره‌ كزه‌، ئه‌ویش وه‌ سه‌به‌ب ئه‌و زوڵمكردنه‌ ك ده‌رهه‌ق وه‌ى چینه‌ ئه‌نجام دریا.

* هووكار كزى و كه‌مى مه‌ردم له‌ى مه‌یدانه‌وه‌ چه‌س؟

- بیگومان هووكاره‌یل فره‌یگ هه‌س، له‌وانه‌یش وه‌زع ئاسایش و له‌هه‌مان وه‌خت وجوود شماره‌ى فره‌یگ به‌شدار له‌تیمه‌یل، ك گشت ئه‌یانه‌ بوینه‌ هووكار كزه‌وبوین دیمه‌ن وازى و نه‌هیشتن تام و له‌زه‌ت وه‌رزش.

* خراوى واقع وه‌رزشى ئیسه‌ چه‌س؟

- واقع وه‌رزش ئیسه‌مان هس وه‌ كزى فره‌یگ ئه‌كا وه‌سه‌به‌ب نه‌وین وازیگاى ته‌واو، بیجگه‌ ئه‌وه‌یش گرینگى یا ئه‌همیه‌ت نه‌داین وه‌ نه‌وه‌یل وه‌رزشكار و له‌هه‌مان وه‌خت نه‌وین پشتگیرى خاسیگ له‌وه‌ر خاتر زنگه‌وبوین جموجویل وه‌رزشى له‌ عراق.

* ئه‌و ڕیه‌یله‌ چه‌ن ك بایه‌سه‌ بگریه‌نه‌ وه‌ر له‌وه‌ر خاتر گه‌شه‌داین وه‌ تووپ پا؟

- وه‌ باوه‌ڕ من هه‌وه‌جه‌ وه‌ ئه‌وه‌ كریه‌یگ گرینگى یا ئهتمام بدریه‌یگه‌ وه‌رزشكاره‌یل له‌گشت عومریگ ، وه‌تایبه‌ت جایه‌ڵ جوانه‌یل ئه‌را ئاینده‌ى خاسیگ ، وه‌ل ئه‌وه‌یشا هه‌وه‌جه‌ وه‌ پشتگیرى و فراوانكردن دامه‌زریاگه‌یل وه‌رزشى دیریم و دویاخریش بایه‌سه‌ گرینگى بدریه‌یگه‌ وه‌رزشكاره‌یل.

 

مشتاق ره‌مه‌زان