داعش دژ وه‌ هونه‌ر و شارستانيه‌ت

شفق نيوز

ترۆريسته‌يل داعش ده‌سيان وه‌ هه‌ر شوونه‌يليگ پيرووز ره‌سی رماننه‌ی و ته‌قاننه‌وه‌ی، دژ ئنسانيه‌ت بوين، تا كار ره‌سيه‌ ئه‌وه‌ك ده‌س وه‌ربيه‌نه‌ ناو هونه‌ر و شارستانيه‌ت، جوور ئه‌وه‌ك له‌ی دوياخره‌ ژنه‌فتيم و كه‌فته‌ وه‌رچه‌ومان ك چوين و وه‌ چ شيوازيگ خه‌ريك شيوانن و رمانن شوونه‌واره‌يل هونه‌ری و شارستانيه‌ته‌يلن.

چه‌ومان كه‌فته‌ ئه‌وه‌ ك چوين وه‌حش ئاسا ره‌سمه‌يل جوان و هونه‌ری عراق رمنن، يه‌يش له‌وه‌ختيگ ك وڵات عراق وه‌ يه‌كيگ له‌ وڵاته‌يل فريه‌ گرينگ دانريه‌يد له‌ڕوی وجوود مێژوو كلتوور هونه‌ری و شارستانی.

پرسيار گرينگ له‌يرا ئه‌وه‌سه‌، ئايا ئی ريكخرياگ ترۆريستيه‌ له‌وه‌ر چ هووكاريگ جوور پيشه‌ی هه‌ميشه‌يی ده‌سكرده‌سه‌ له‌يوا كاره‌يليگ دڕندانه‌؟ ئه‌راچه‌ داعش له‌ی وه‌خته‌يله‌ هويری خسه‌ته‌سه‌ لای له‌يوا كاره‌يليگ؟ ئايا داعش وه‌ی كرده‌وه‌يل قه‌يزه‌وه‌نه‌ پايه‌و سه‌نگ خوه‌ی له‌ جه‌هان قورستر و گه‌وراتر ئه‌كا يا وه‌چه‌واشه‌وه‌؟ من‌ باوه‌ڕم ئه‌وه‌سه دو ديد له‌بان ئی مه‌سه‌له‌ هه‌س:

يه‌كه‌م: ئی ريكخرياگ ترۆريستيه‌ كار له‌بان ئه‌وه‌ ئه‌كاو خوازياره‌ له‌ڕی نيشانداين و بڵاوبوينه‌وه‌ی ئه‌و كاره‌يله‌ ئه‌وه‌نه‌ی تر رای گشتی جه‌هانی وه‌ره‌و لای خوه‌ی و خه‌ليفه‌ به‌يعه‌ت وه‌پيدرياگه‌گه‌ی فيشتر بكيشيد و دی هويچ شوون و كه‌سيگ له‌ی دونيای پان و وه‌رينه‌ نادێ ناو ئی ريكخرياگ و خه‌ليفه‌يه‌ نه‌زانيد و له‌وه‌ری نه‌ود، جوور ئه‌وه‌ك دوينيم ك چوين ئيسه‌ ميديايه‌يل جه‌هانی وه‌ چ شيوه‌يگ خه‌ريكن وه‌ی كاره‌يله‌و.

دويه‌م: گومان له‌تی نيه‌ هه‌ر گرووپ و لايه‌ن و ريكخرياگيگ په‌نا بووه‌يد ئه‌را له‌يوا كاره‌يليگ دوياخر له‌ ئاينده‌ی خوه‌ی ئه‌ترسيه‌يد و گومان له‌ ئاينده‌ی خوه‌ی ئه‌كا، ك ئی ديديشه‌ فيشتر جی باوه‌ڕ و دقه‌تكردنه‌، چوينكه‌ رووژ له‌ دويای رووژ خوه‌ر هه‌ميشه‌يی ئی ريكخرياگ ترۆريستيه‌ وه‌ره‌و ئاوابوين يه‌كجاری ئه‌چێد.

ئه‌را نموونه‌: ستالين له‌ روسيا ده‌س كرده‌ رمانن كه‌نيسه‌يل، تا ئه‌وه‌ بوی وه‌ نابوودكردن خوه‌ی له‌ مێژوو كووتايی وه‌پيهات و نازيه‌يليش له‌ی جووره‌ كاره‌يله‌ كردن و ده‌سكردنه‌ له‌ناوبردن كاره‌يل هونه‌ری يه‌هووديه‌يل.

دانا نەقی

ج . أ