چه‌ك و تون وتیژى

شفق نيوز

  تون و تیژى وه‌رانوه‌ر ئاده‌میزاد وه‌تایبه‌ت له‌وه‌رانوه‌ر ژن له‌چوارچیوه‌ى خیزان یا له‌ده‌یشت خیزان ك كوومه‌ڵگاس وه‌گشتى، وه‌ دیارده‌یگ خراو كوومه‌ڵایه‌تى دانریه‌ید ك پیاوه‌یل له‌وه‌رانوه‌ر ژنه‌یل ئه‌یه‌رنه‌ى كار، ئنجا چ له‌وه‌رانوه‌ر هاوسه‌ر یا دایگ یا خوه‌یشگ ، ته‌نیا له‌وه‌ر ئه‌وه‌ك ژنه‌!!

ئى دیارده‌یشه‌ فریه‌جار جیاواز نیه‌ وه‌ل دیارده‌یل تر خراو كوومه‌ڵایه‌تى دوشمنكارانه‌ ك چه‌نه‌ها تایبه‌تمه‌ندى خوه‌ى دیرید، ك یه‌یش وجوود دیرید و دیارده‌یگ باوه‌تیه‌و له‌ ده‌یشت هس تاكه‌یل كوومه‌ڵگا دوینریه‌ید، چوینكه‌ له‌ ژینگه‌یگ ك له‌تى ژیانه‌ هووكاره‌ى بوینه‌و مه‌شقى كردنه‌ ك پیاوه‌یل له‌تى هیز و ده‌سڵات بارنه‌ كار ئه‌را ئه‌وه‌ك ژنه‌یل سه‌ر ئه‌رایان بچه‌منن و له‌ خزمه‌ت خواست پیاوه‌یل بوون.

وه‌لى ئه‌وه‌ك جاروباریگ دوینریه‌ید ئه‌وه‌سه‌، ك بڕیگ له‌و تون وتیژیه‌یله‌ ك دژ ژنه‌یل ئه‌نجام دریاگه‌، فیشتر چه‌ك وه‌كار هاوریاگه‌، ئنجا ئایا له‌وه‌رچه‌ پیاوه‌یل فیشتر چه‌ك وه‌كار ئه‌یه‌رن جوور وه‌سیله‌یگ تون وتیژى دژ ژنه‌یل؟

جواو ئى پرسیاره‌ به‌یده‌مانه‌و ئه‌را هویروڕاگه‌ى"ئه‌میل دوركهایم"و هه‌ڵه‌وداین لاپه‌ڕه‌یل تاریخ كورد و كوردستان ك دوینیم كوومه‌ڵگاى كورده‌وارى وه‌تایبه‌ت و كوومه‌ڵگاى عراقى وه‌گشتى وه‌ باریگ سیاسى و كوومه‌ڵایه‌تى و ئابوورى فریه‌ سه‌ختیگ گوزه‌ر كردیاد ك پڕ بویه‌ له‌ تون وتیژى و جه‌نگ و كاولكارى و كوشتن و ئه‌نفال و وه‌كارهاوردن چه‌ك وه‌رانوه‌ر گشت تاكه‌یل كوومه‌ڵگا، ك رژیمه‌یل یه‌ك له‌شوون یه‌ك هاوردیانه‌ى كار و شوونه‌وار فریه‌ خراویگ هیشته‌جى، وه‌ جووریگ ك فریه‌ وه‌خراوى ره‌نگه‌ودا له‌بان تاك كورد وه‌تایبه‌ت و تاك عراقى وه‌گشتى.

ئنجا دوینید له‌وه‌رانوه‌ر ئه‌وه‌یش مه‌سه‌له‌ى وه‌كارهاوردن چه‌ك ته‌نیا وه‌سیله‌یگ سه‌ره‌كى وه‌رگریكردن بویه‌ له‌لایه‌ن تاكه‌یل كوومه‌ڵگاو له‌هه‌مان وه‌خت پیاوه‌یلیش وه‌ل ئه‌و تون و تیژیه‌ ك ده‌سڵات وه‌كار هاورده‌سه‌ى له‌وه‌رانوه‌ریان، ئه‌واتیش هه‌مان تون وتیژى هاوردنه‌سه‌ كار له‌وه‌رانوه‌ر ژن.

بیگومان ئى بار خراویشه‌ كاریگه‌رى داشتگه‌ له‌بان خود ئمایه‌تكردن مناڵه‌یمانیش وه‌تایبه‌ت كوڕ ك هه‌ر له‌ مناڵیه‌و په‌روه‌رده‌ كریانه‌ له‌بان چشته‌یل وه‌كارهاوردن جه‌نگ جوور كه‌ره‌سه‌یل جه‌نگ وه‌ چه‌واشه‌ى دویه‌ته‌یل هه‌ر له‌وه‌ر ئه‌وه‌ك ئه‌وان له‌ ره‌گه‌ز نیرینه‌ن. هه‌ر له‌وه‌ر ئه‌وه‌یش تویه‌نیم بویشیم تون وتیژى له‌ كوومه‌ڵگا دیارده‌یگ كوومه‌ڵایه‌تیه‌و تاكه‌یلیشى په‌یڕه‌وكار ئه‌و تون وتیژیه‌نه‌، چوینكه‌ له‌ناو وژدان كوومه‌ڵگا وجوود دیریدو پیاوه‌یل ناتویه‌نن ده‌روه‌ردارى بوون، چوینكه‌ له‌تى په‌روه‌رده‌ بوینه‌و خومه‌ت وه‌ ئامانجه‌یلیان ئه‌كاو هه‌وه‌جه‌یلیان ئه‌رایان جیوه‌جى ئه‌كا.

هه‌تاو كه‌ریم

ج . أ