خودا رووزى ره‌سنه‌

شفق نيوز

وه‌یخاتره‌, شه‌وه‌كیان رووژیگ له‌ خاو هیز گرت و وه‌ره‌و مه‌سجد كه‌فته‌ڕێ و خه‌ریك رازونیاز وه‌ل خوداى خوه‌ى بوى وه‌ختیگ بویه‌ نیمه‌ڕوو, له‌ خودا داواى چاشت كرد,هه‌رچ چه‌وه‌ڕى كرد له‌ نان نیمه‌ڕوو خه‌وه‌ریگ نه‌وى تاشه‌وه‌و بوى و ئى جاره‌ له‌ خودا خواست ك شیو ئه‌راى كل بكاد و هه‌ر چه‌وه‌ڕى بوى و چه‌ن ساعه‌تیگ له‌ شه‌و كل دابوى وه‌لى هیچ خه‌وه‌ریگ له‌ نان و ئاو نه‌وى, له‌ دووكوت شه‌وگار ده‌وریشیگ هاته‌ ناو جامیه‌ و له‌ شان ستوینیگ ئه‌راى خوه‌ى ته‌كه‌و دا و نیشت و له‌ كیسه‌ى توشه‌گه‌ى نان خواردن دراورد و بنیاى خواردن كرد, پیاگ ساف وسایه‌ق و خوه‌شباوه‌ڕ ك له‌ بنیاى رووژ تا دووكوت شه‌وار وه‌ زگ وه‌رسیه‌تییه‌و بردیه‌وسه‌ر و له‌ خودا خواستوى روزیى بیا, نووڕست ك ده‌وریش نیمه‌ى نانى خواردگه‌ و نزیكه‌ ئه‌و نیمه‌ى تریش ته‌مام بكاد بى ئختیار قۆته‌یگ كرد و ده‌وریش له‌ ده‌نگ قۆته‌گه‌ى فامست ك ته‌نیا نیه‌ و وه‌ت: هه‌ركه‌ هه‌ید بفه‌رما بیه‌ وه‌ره‌و. پیاگ به‌دبه‌خت و خوه‌شباوه‌ر ك له‌ ورسیه‌تى گشت گیانى ئه‌له‌رزى هاته‌ وه‌ره‌و وه‌ هه‌ڵه‌په‌ڵه‌  ده‌س كرده‌ خواردن, وه‌ختیگ سیره‌و بوى ده‌وریش له‌ باره‌ى ورسیه‌تیى پرسیار كرد و ئه‌ویش گشت چشتیگ ئه‌راى باس و كرد.ده‌وریش به‌ر كرده‌ پیاگ و وه‌ته‌پى: هویره‌و بكه‌ ئه‌گه‌ر نه‌قۆتیاید من چوین ئه‌زانستم تو هایده‌ ئیره‌ و مكیسد بكه‌م و تۆنیش وه‌ رووزید بڕه‌سید؟ هیچ شه‌ك و گومان نیه‌ ك خوداوه‌ند رووزى ره‌سنه‌ وه‌لى بایه‌د قۆته‌یگیش بكریه‌ێد. هاو جووره‌ ك ئویشن: له‌ تو حه‌ره‌كه‌ت و له‌ من به‌ره‌كه‌ت.

 

ئا: سۆندۆس مێرزا