ئه‌كره‌م كه‌وكى.. له‌ كورده‌يه‌ل فه‌يلى

شفق نيوز

ئه‌تويه‌نيم بويشيم ئه‌كره‌م كه‌وكى، يه‌كيگ بوى له‌و كه‌سه‌يله‌ ك گشت وه‌ختيگ چه‌ونه‌ترس بوى و هويچ وه‌ختيگيش له‌ پيشڕه‌وى په‌شيمانه‌و نه‌ويه‌و ئازايه‌تى و قاره‌مانێتى ئه‌كره‌م تا ئه‌و راده‌ بوى ك گوله‌ بناتاێده‌ سينگيه‌و سڵ له‌لى نه‌كردياد.

ئه‌كره‌م له‌ رووڵه‌يل عه‌گد ئه‌لئه‌كراده‌ و هه‌ميشه‌ ناو و ناودارييشى وجوود داشت له‌ ناوچه‌يل سه‌دريه‌و عوێنه‌و باب شيخ و كولات و زوورم ناوچه‌يل هه‌ردوگ ديم جاده‌ى كفاح و جاده‌ى جمهورى.

ئه‌كره‌م كه‌وكى شه‌قاوه‌ نه‌وى و هويچ وه‌ختيگيش حه‌ز وه‌ جه‌نگ و مرافه‌و كيشمه‌كيش نه‌كردياد، وه‌لێ وه‌ل ئه‌وه‌يشا غيره‌تدار و ئازاو چه‌ونه‌ترس بوى و گشت وه‌خت وسه‌عاتيگ خوه‌سه‌ى له‌ رژيم به‌عس و به‌عسه‌يليش هاتياد و هه‌ميشه‌ مينه‌ى ئه‌وه‌ كردياد زه‌فه‌ر له‌ليان بارێد و هه‌ر وه‌ ئاشكرايش دژايه‌تييان كردياد.

ئى ئاده‌ميزاد وه‌غيره‌ته‌ هه‌ر وه‌ختى بژنه‌فتياد يه‌كيگ له‌ به‌عسيه‌يل راپۆرت له‌بان جايه‌ڵ جوانيگ ناوچه‌گه‌ نويساگه‌، شه‌وانه‌ زه‌فه‌ر له‌لى هاوردياد و تازيانه‌يگى دياد ك وه‌دريژايى ژيانى له‌هويره‌و نه‌چێد و له‌يوا وه‌پى كردێاد جاريگتر نه‌ويرى راپۆرت له‌بان كه‌سيگ تر بنويسێد.

جوور ئه‌وه‌گ مه‌ردم ناوچه‌گه‌ى باس ئه‌كه‌ن، ئه‌كره‌م لايه‌نگر زه‌عيم عه‌بدولكه‌ريم قاسم بويه‌و يه‌كيگيش بويه‌ له‌و كه‌سه‌يله‌ ك هه‌ميشه‌ لايه‌نگر جموجويل رزگاريخواز كورد بويه‌ و ريز و حورمه‌ت له‌ گه‌وراو بويچگيش ناگه‌و مه‌ردم ناوچه‌گه‌و هاوڕيه‌يلى وه‌پى وتيان(ئه‌بو حاته‌م) ئه‌ويش وه‌بوونه‌ى ئه‌و كه‌ره‌مه‌و ك داشته‌سه‌ى و له‌ كه‌ره‌م حاته‌م ته‌ى ته‌شبيهى كرديان، ئمجا هه‌ناى ژيان هاوسه‌رگيرى پيكهاورد خوداوه‌ند گه‌ورا دو مناڵ لفانه‌ وه‌پى به‌خشى و ناويان نا (حاتم) و (نه‌سير).

ئه‌كره‌م هه‌ميشه‌ وتياد من حه‌ز له‌و كه‌سه‌يل رووشنهوير و نيشتمان په‌روه‌ره‌ ئه‌كه‌م ك وه‌ كه‌رامه‌ته‌و بگه‌ردنه‌ شوون مافه‌يليان، وه‌ل ئه‌وه‌يشا فريه‌ كاريگه‌ر بوى وه‌ ئبراهيم عه‌بدگه‌ى شه‌قاوه‌ى ناودار.

وه‌لێ جى داخه‌ ئه‌كره‌م كه‌وكى جوور باقى مه‌ردمان تر كورد فه‌يلى كووچ زووره‌ملى وه‌پى كريا ئه‌را ئيران و دوياخريش جاريگتر گله‌وخوارد ئه‌را عراق، وه‌لێ ئيجاره‌ ماڵئاوايى يه‌كجارى كرد و دڵى پڕ بوى له‌ ئشق و خوه‌شه‌ويسى به‌غداو هه‌ر وه‌و خاتريشه‌ وه‌پى ئويشيم خودا وه‌ به‌هه‌يشت به‌رين خوه‌ى رووحد شاد بكا ئه‌ى ئه‌بو حاته‌م غيره‌تدار و ئازا و چه‌ونه‌ترس.

مونير ئه‌ڵماس فه‌يلى