پێشمه‌رگه‌ بويه‌سه‌ مقه‌يه‌تيكه‌ر جه‌هان

شفق نيوز

قاره‌مانێتی و ئازايی پێشمه‌رگه‌ له‌يوا كرد ك كورد بڕه‌سيده‌ مافه‌يل خوه‌ی، پێشمه‌رگه‌ سه‌ر ئه‌را دوشمن نه‌چه‌مان له‌ هه‌ر سه‌رده‌ميگ و له‌هه‌ر شوونيگ كوردستان، دوشمنه‌يل كورد فريه‌ خوازيار بوين ناو ئه‌را پێشمه‌رگه‌ بنه‌ن جوور"مته‌مه‌ڕد، خائين، چه‌ته‌، موخه‌ڕيب، جێبولعه‌ميل"...هتد.

دوشمن هه‌رچه‌نی كرد نه‌توه‌ينست وشه‌ی پێشمه‌رگه‌ له‌ گووش مناڵه‌يل كورد و تاك كورد له‌نگ بكه‌ن. پێشمه‌رگه‌يش رووژ وه‌ڕووژ له‌ سه‌نگه‌ر شه‌ره‌ف خه‌بات كرديادو چه‌پڵه‌ كوتياد و گوله‌ی سه‌ركه‌فتن ته‌قانياد. به‌رهه‌مه‌يل پێشمه‌رگه‌ بويه‌ ئازادی ملله‌تيگ چه‌وسياگ، بويه‌ سه‌ربه‌رزی و سه‌رفرازی ملله‌ت كورد و دروسبوين قه‌واره‌ی كورد له‌ باشوور كوردستان، بويه‌ نيشانه‌ی خه‌بات و سه‌ربه‌رزی ٤٠ مليۆن كورد و بنياتناين ده‌وڵه‌ت كوردی.

ئيسه‌يش پێشمه‌رگه‌ بويه‌سه‌ مقه‌يه‌تيكه‌ر گشت جه‌هان، ناو و ناوداری پێشمه‌رگه‌ سه‌رانسه‌ر ده‌هان پووشاگه‌ له‌ قاره‌مانێتی و خه‌بات و ئازايه‌تی، پێشمه‌رگه‌يل گيانفيدای كوردستان ئيسه‌يش گه‌وراترين و سه‌ختترين شووڕش و خه‌بات ئه‌كه‌ن ئه‌را وه‌رگری له‌ خاك پيرووز كوردستان.

وه‌ دريژايی هه‌زار كيلۆمه‌تر وه‌رگری له‌ ده‌سكه‌فته‌يل و به‌رهه‌مه‌يل خوين شه‌هيده‌يل ئه‌كه‌ن، وه‌رگری له‌ كه‌رامه‌ت و شه‌ره‌ف تاك كورد ئه‌كه‌ن و مقه‌يه‌تی له‌ سه‌روه‌ريه‌يل ئه‌كه‌ن، پێشمه‌رگه‌ له‌ جيای گشت جه‌هان جه‌نگ ترۆريسته‌يل ئه‌كه‌ن. جه‌نگ داعش ئه‌كا، له‌ی جه‌نگ سه‌خته‌ پێشمه‌رگه‌ له‌ سه‌ركه‌فتنه‌و زه‌ره‌د فريه‌يگ وه‌ دوشمن ره‌سانگه‌، هه‌ر وه‌و خاتريشه‌ رووژانه‌ وڵاته‌يل ئه‌را هاوكاری و ده‌سميه‌ت فيشتر و خودنزيكه‌وكردن له‌ هه‌رێم كوردستان پشتگيری له‌ پێشمه‌رگه‌ ئه‌كه‌ن، يه‌يش مايه‌ی دڵخوه‌شيه‌ ئه‌را پێشمه‌رگه‌و هه‌رێمه‌گه‌مان.

هه‌ر له‌وه‌ر ئه‌وه‌يش تاك كورد بايه‌سه‌ فيشتر هاوكار و ده‌سميه‌تده‌ر پێشمه‌رگه‌ بدێ و بايه‌سه‌ ئه‌وه‌يش له‌ هويرمان نه‌چوود ك جه‌ناب سه‌رۆك مه‌سعود بارزانی هه‌ميشه‌ له‌گشت بوونه‌و ياديگ وتياد: پله‌ی پێشمه‌رگايه‌تی له‌لام له‌گشت پله‌يگ گه‌وراتره‌، ك وه‌ڕاسی وه‌ ديد دويريگه‌و هوير له‌لی كردياد، بيگومان ئيسه‌يش پله‌ی پێشمه‌رگه‌ له‌گشت پله‌وپايه‌يگ گه‌وراتره‌و هه‌ر ئه‌و سه‌رۆك و پێشمه‌رگه‌يش بوی ك تويه‌نست گشت جه‌هان باريده‌ بان خه‌ت و سياسه‌ت ناوده‌وڵه‌تی بكيشيد ئه‌را پشتگيريكردن هه‌رێم كوردستان و مقه‌يه‌تيكردن ئه‌زموون حوكمڕانی كوردو پشتگيری هيز پێشمه‌رگه‌ی كوردستان وپشتگيری جه‌هان ئه‌را سه‌رۆك و هه‌رێمه‌گه‌ی و بچه‌سپنيد و پێشمه‌رگه‌ وه‌ مقه‌يه‌تيكه‌ر گشت جه‌هان بناسيد.

ئاری فاروق نانه‌كه‌لی

ج . أ