سه‌بر به‌ره‌گه‌ى شرینه‌ ... ئه‌ى سه‌بر (كورده‌یل فه‌یلى) چوین بوود؟

شفق نيوز

ده‌رده‌سه‌رى وه‌پى ره‌سیه‌و ، وه‌سه‌ڵامه‌ت له‌لى ده‌رنه‌چیه‌ ، چوینكه‌ جویر ئه‌وه‌ك دیمنه‌و ژنه‌فتیمنه‌ ، ئاگر دڕنده‌یى و دكتاتۆریه‌ت و زوڵمكردن و ته‌كڕه‌وى و تایفه‌گه‌رى و خودپه‌رسى هویچ وه‌ختى له‌ى وڵاته‌ نه‌وڕیاگه‌و  له‌ناونى ماوه‌یگ  و ماوه‌یگ  تر كاره‌سات تازه‌یگ  رویداگه‌و مه‌ردمانیگ  بى گوناه‌ و  بیتاوان كریانه‌سه‌ چیلگ  ئاگره‌گه‌و سزیانه‌ . یه‌كیگ  له‌و  پیكهاته‌و  مه‌ردمانیشه‌ ك گه‌وراترین و  سه‌ختترین كاره‌سات له‌ دژیان ئه‌نجام دریاو  بیوژدانى فره‌یگ  ده‌رهه‌قیان كریا (كورده‌یل فه‌یلى) بوین ك فره‌ وه‌داخه‌وه‌ سه‌دام دكتاتۆر  و  خوینمژ بویه‌ ئاگر و رویكرده‌ گیانیان هه‌ر  له‌سه‌ره‌تاى ده‌سڵاتیه‌وه‌ تا دویارووژ  ده‌سڵاتى ، وه‌لى مه‌سه‌ڵه‌ت كورده‌وارى خوه‌مان ئویشیگ  (هه‌ر زاڵمیگ  و زه‌واڵیگ  دیریگ ) و  داروده‌سه‌یل به‌عسیش وه‌خوه‌یان و سه‌ركرده‌یان له‌ ئه‌نجام ئه‌و زوڵم و دڕنده‌ییه‌ له‌خودا وه‌زیاى ملیان شكیاو  ناویان چیه‌ ناو  زبڵدان تاریخ و  سه‌ربه‌رزى و گه‌ورایى ئه‌را ملله‌ت مه‌نده‌وه‌ .

بیگومان كورده‌یل فه‌یلى له‌ى وڵاته‌ شان وه‌شان پیكهاته‌یل تر له‌ى عراق تازه‌ به‌شدارى له‌ بنیاتناین و پرووسه‌ى دیموكراسى كردنه‌و  سه‌قامگیرى و ئه‌من و ئاسایش وڵاته‌گه‌یان له‌لایان فره‌ گرینگ ه‌و خه‌مخوه‌ر راسه‌قینه‌ى ئى وڵات كاولبویه‌نه‌ ك هیمان ده‌س به‌زه‌یى خاسیگ  وه‌پى نه‌ڕه‌سیه‌و چه‌وه‌ڕى وژدان پاك و ڕه‌حمه‌ت ده‌سڵاتداره‌یله‌ زه‌خمى ساڕیژ بكه‌ن . كورده‌یل فه‌یلى شایه‌تى نیه‌توان و ، وه‌خوین قرمز روڵه‌یلیان وه‌سه‌رهات خوه‌یان له‌ناو لاپه‌ڕه‌ى تاریخ نویسانه‌و تاریخیش شایه‌تیده‌ر ئه‌و راسیه‌سه‌ ك چه‌نیگ  زوڵم و جه‌ور دینه‌و چه‌نیگ  دژایه‌تى كریانه‌ له‌لایه‌ن فاشست و شۆڤینیه‌یله‌وه‌ ، ئه‌یه‌ بیجگه‌ دروه‌ده‌رى و ئاواره‌یى و زه‌فتكردن ماڵ و موڵك وته‌هجیر و ته‌سفیر و بى سه‌روشوونكردن روڵه‌یلیان و كوشتنیان له‌زیندان و نقومكردن و زنگ  وه‌چاڵكردنیان له‌ قه‌وره‌یل وه‌جه‌م و فره‌یگیش له‌لیان له‌تاقیگایه‌یل كیمیاوى و له‌بان مین یا لوغم كردنه‌ (كبش الفدا‌و) .

كورده‌یل فه‌یلى سه‌بر فره‌یگ  كردن و  كه‌سیگ  دڵسووز و خه‌مخوه‌ر نه‌وى تائیسه‌ بڕه‌سیگه‌ ته‌نگیان و له‌لیان بپرسیگ  چ قه‌رزیگ  دیرین له‌لاى حكوومه‌ت و په‌یوه‌نداره‌یل ئى وڵاته‌وه‌ ؟ ئایا داواكاریدان چه‌س و چه‌ بایه‌سه‌ ئه‌ڕادان بكریه‌یگ  ؟ چوینكه‌ جویر ئه‌وه‌ك ئاشكراس و گشتمان زانیم فره‌یگ  له‌ خیزانه‌یل كورد فه‌یلى تائیسه‌یش چه‌وه‌ڕى جگه‌رگووشه‌یلیان كه‌ن و نیه‌زانن له‌كوورا زنگ  وه‌چاڵ كریان و تا ئیسه‌یش ماڵ و موڵكیان ناته‌سه‌ دویاوه‌ ئه‌ڕایان و ده‌سڵاتداره‌یل به‌غدا خوه‌یان له‌ى مه‌سه‌له‌ كه‌ڕ كردنه‌و فه‌یلیه‌یلیش سه‌بر فره‌یگ  كردن ، ك هه‌رچه‌نى سه‌بر به‌ره‌گه‌ى شرینه‌ ، وه‌لى سه‌بر كورده‌یل فه‌یلى چوین بووگ و ره‌سیگه‌ كوورا ؟ چوینكه‌ گووشیگ  نیه‌ ده‌نگ  پڕ له‌ئازار و شه‌كه‌تیان بژنه‌فیگ  و چه‌ویگ  نیه‌ ئه‌و هه‌مگه‌ ده‌رده‌سه‌رى و مه‌ینه‌ت و ماڵویرانى و به‌دبه‌ختییانه‌ بوینیگ  و ده‌سیگیش نیه‌ بڕه‌سیگه‌ هانایان و له‌ى ره‌نج بیوه‌رى و كیشه‌و گرفته‌ باریگه‌یانه‌ ده‌یشت ك ساڵه‌هاى ساڵه‌ وه‌ده‌سیه‌وه‌ ناڵنن و هاوار كه‌ن . دى گشتمان چه‌وه‌ڕى ئه‌وه‌ كه‌یم له‌ حكوومه‌ت ئاینده‌ لایگ  له‌ى پیكهاته‌ى خاوه‌ن كه‌رامه‌ت و قوربانیده‌ره‌ بكه‌نه‌وه‌و هه‌ق هویچ پیكهاته‌و چین و لایه‌نیگ  ژیرپا نه‌كه‌ن.