بارزانى و 50 ناوه‌ند ره‌سانن ته‌مويل ناديار

شفق نيوز

قه‌وڵ درووييگ نيه‌ ك عراق له‌ڕوى ره‌ساننه‌و داگير كرياگه‌و له‌لايه‌ن چين و لايه‌نه‌يليگ ناديار و لايه‌نه‌يليگ ناسرياگ هه‌رێميه‌و ته‌مويل ئه‌كريه‌ن ئه‌را خزمه‌ت مه‌رامه‌يليان و فريه‌يگيش له‌ليان نه‌يزه‌يل ژه‌هراوييان وه‌ره‌و روى مافه‌يل ملله‌ت كورد وه‌شنن له‌ بريار چاره‌نويسى و دژ يه‌كيگ له‌ كه‌سايه‌تيه‌يل دياريى ك ئه‌ويش سه‌رۆك بارزانى سه‌رۆك هه‌رێمه‌.

ناخوازيم ياد ئه‌وه‌ بكه‌يم ك له‌ خراوترين حاڵه‌ته‌يل ئاسايشى له‌ ناوچه‌گه‌و عراق و خراوترين وه‌خته‌يل سه‌خت له‌ڕوى ئابوورى له‌ كوردستان وه‌ل مليۆنه‌ها كووچكه‌ر ك له‌تاو زوڵم رووڵه‌يل هاوڕه‌گه‌ز و هاوئايين و هاونه‌ته‌وه‌يان واينه‌، بارزانى وه‌ سينگ فراوانه‌و باوه‌ش ئه‌رايان واز كرد.

دياره‌ بڕيگ له‌و ره‌ساننه‌يله‌‌ خه‌بات هه‌فت ده‌يه‌ى كه‌سايه‌تييگ جوور بارزانى له‌ هويريان چيه‌ ك هويچ وه‌ختيگ له‌ باوه‌ڕ و ريڕه‌و خوه‌ى لانه‌ياگه‌و گشت ئه‌وه‌يش له‌وه‌ر خاتر جيوه‌جيكرن ئوميد له‌ ئاينده‌ى ملله‌ت كورد له‌چوارچيوه‌ى خه‌ريته‌ى تازه‌ له‌ خوه‌رهه‌ڵات ناوين بويه‌، وه‌لێ جى داخه‌ حكومه‌ت به‌غدا كار له‌بان داناين گرفت ئه‌كا له‌وه‌رده‌م ئى پرووژه‌ى شايسته‌ييه‌.

مه‌سه‌له‌يگ ك دقه‌ت بكريه‌ێد ئه‌وه‌سه‌ ك كوردستان خه‌ڵوه‌ته‌ له‌ ته‌نيا بنگه‌يگ ره‌سانن گرينگيده‌ر وه‌ مه‌سه‌له‌ى ته‌شهير و ناوزڕانن سه‌ركرده‌يل عه‌ره‌ب عراقى، له‌ وه‌رانوه‌ر ئه‌وه‌يش وه‌ گووره‌ى ئه‌و زانياريه‌يله‌ ك هانه‌ وه‌رده‌س و به‌ڵگه‌داره‌ فيشتر له‌ 50 ناوه‌ند ره‌سانن ته‌مويل ناديار له‌ به‌غداو پاريزگايه‌يل تر هه‌ن ك شه‌و و رووژ قسه‌يل ژه‌هراوى بڵاو ئه‌كه‌ن و رينمايه‌يل دژايه‌تى تايبه‌ت چه‌سپنن.

جى داخه هيمان بريگ له‌ سه‌ركرده‌يل عه‌ره‌ب ئه‌قڵه‌يه‌ت شوفێنى زاڵه‌ له‌بان ره‌وشتيان و وه‌رگه‌ى ئه‌وه‌ ناگرێد سه‌ركرده‌يگ بوێر و راسگوو كار له‌وه‌ر خاتر جيوه‌جيكردن ئاره‌زوو ملله‌ته‌ كورده‌گه‌ى بكا له‌ ده‌وڵه‌تيگ سه‌روه‌خوه‌ى ك ده‌سميه‌ت سه‌قامگيرى و هه‌ڵسيانه‌وه‌ى ناوچه‌گه‌ بيه‌ێد له‌ڕوى سياسى و ئاسايشى و ئابوورى و بڕيگيش له‌ هووكاره‌يل ره‌سانن عراقى خراوى فريه‌يگ ده‌رهه‌ق ملله‌ت كورد ئه‌نجام دانه‌، هه‌ر له‌ پرووژه‌ى به‌دناو "سايكس بيكۆ" و په‌يماننامه‌ى "لۆزان" و ريككه‌فتنه‌يل تر ئمزاكرياگ وه‌ل حكومه‌ت عراقى تا رووژ ئمڕوو و له‌ى دوياخريشه‌ لايه‌ن ره‌سانن عراقى و بڕيگ له‌ سياسيه‌يل ده‌سكردنه‌ دژايه‌تى ملله‌ته‌گه‌مان و سه‌ركردايه‌تيه‌گه‌ى ك رووژيگ له‌ رووژان هان ترۆر نه‌ياگه‌ يا خوين بيتاوانه‌يل له‌ عراق نه‌ڕشانگه‌.

وه‌لێ وه‌گشت داخيگه‌و ره‌سانن عراقى له‌جياى ده‌رخستن راسيه‌يل ئه‌را راى گشتى جوور خوه‌ى و ده‌رخستن رينمايه‌يل ئاشتى و برايانه‌ له‌ يه‌كلاكردنه‌وه‌ى شه‌راكه‌ت زووره‌ملى، دوينێد ته‌له‌يل خوسه‌و كينه‌ت ئه‌ژه‌نێد.

ئه‌ڵلاجه‌وى ئه‌وه‌سه‌ فريه‌يگ له‌ ناوه‌نده‌يل ره‌سانن ئه‌ركه‌يل دامه‌زراننى ته‌نيا 6 مانگه‌و ژينگه‌يگ تر ژه‌هراوى شوونى ئه‌گرێد، ك تومه‌ت ئه‌خه‌نه‌ پاڵ ملله‌ت كورد و بارزانى سه‌رۆكى ك سه‌بردارترين سه‌ركرده‌يل عراقيه‌و خاوه‌ن قوربانيه‌ له‌وه‌رانوه‌ر قه‌واره‌ى ئه‌و په‌لاماره‌يله‌ ك ئه‌ياده‌ تويشى.

ئمجا گشت جه‌هان هان له‌و باوه‌ڕه‌ ك ئى كه‌سايه‌تيه‌ خاوه‌ن مافه‌يل ره‌وايگه‌و تويه‌نست ديد مه‌ردمان فريه‌يگ ئاڵشت بكاو تا دويه‌گه‌ له‌ناو جه‌رگه‌ى توركيا وه‌ ئاڵاى كورستانه‌و ك نرياوێده‌ شانى داواى ماف كورد كرد. يه‌يش له‌هوير ناوه‌يم ك كورد چه‌وه‌ڕى ئوميدن و هساو ئه‌را ئه‌و ئه‌و ساڵه‌يله‌ ناكه‌ن ك خێر له‌لى نه‌ينه‌، ئمجا ريككه‌فتن سايكس بيكۆ ماوه‌ى ته‌مام بوى و خوه‌رهه‌ڵات ناوينيش هه‌وه‌جه‌ وه‌ ريككه‌فتنه‌يل تازه‌ ديرێد و جوور ئه‌وه‌گ رێزدار بارزانى وت "ده‌وڵه‌ت كوردستان ئه‌دێده‌ مه‌ڵوه‌نێگ ئه‌مان و سه‌قامگير" و ئويشێد "من ناچم ئه‌را ته‌هران جوور ئه‌وه‌گ ئه‌وان ئه‌خوازن قسه‌ بكه‌م، يا ئه‌را ئه‌نقه‌ره‌و له‌بان مه‌يل ئه‌وان ره‌فتار بكه‌م، من باوه‌ڕ وه‌ هه‌ر چشتيگ بياشتووم وه‌ئاشكرا باسى ئه‌كه‌م ته‌نانه‌ت له‌ ئه‌مريكايش" ئيمه‌ خاوه‌ن كيشه‌و مافيگ ره‌وايم.

ئى ره‌ساننه‌ ك ئاماژه‌ وه‌پى كرديم، باس له‌وه‌ ناكا ك كورد جوور نه‌ته‌وه‌يگ وه‌ دريژايى مێژوو ترۆر نه‌وينه‌، يا وه‌رپرسن له‌بان جه‌نگه‌يل ناوچه‌گه‌و كيشه‌يلى، به‌ڵكوو قوربانيده‌ر بوينه‌، جوور گامه‌يل بارزانى وه‌ ئارام ئه‌را ئامانجه‌ گه‌وراگه‌ى، ئمجا له‌ قوناغ يه‌كه‌م لامه‌ركه‌زى و دوياى ئه‌وه‌يش خوه‌يموختارى و تا رسيه‌ فيدراڵى و ئمڕوويش داواى دامه‌زرانن ده‌وڵه‌ت كورستان ئه‌كا تا زوڵم 100 ساڵ لاوه‌ێد، وه‌ل ئه‌وه‌يشا كومه‌ڵگاى ناوده‌وڵه‌تييش له‌وه‌ ره‌سيه‌سه‌و ك ژيان ناچارى ئه‌زموونيگ سه‌ركه‌فتگ نيه‌.

ئى ره‌ساننه‌ گاڵ سه‌ركرده‌يل عراقى ئه‌ياد و هيليده‌يان دوباره‌ى ئه‌وه‌ بكه‌ن ك ره‌ساننه‌يل وه‌رجه‌ خوه‌يان وتنه‌سه‌ى له‌ به‌عسيه‌يل ك ئويشێد"خوه‌رهه‌ڵات و خوه‌رئاوا ريككه‌فتنيگ نه‌كردن مه‌گه‌ر له‌بان مه‌سه‌له‌ى كورى نه‌ود".

ئى ره‌ساننه‌ ئاماژه‌ وه‌ رينمايگ كورستان و ملله‌ته‌گه‌ى يا بارزانى سه‌ركرده‌ ئه‌را بريار چاره‌نويس ئاشتيانه‌ ناكاو باس له‌وه‌ ناكا ك بارزانى مه‌يل ئه‌زموون يوغسلافى نه‌يرێد ك جه‌نگ ناوخوه‌يى له‌لى كه‌فته‌و، به‌ڵكوو ئه‌زموون تشيكوسلۆفاكى وه‌خاستر زانێد ك ئاشتى هاورده‌ كار له‌ مه‌سه‌له‌ى دابه‌شكردن، ك يه‌يش باوه‌ڕى بوى‌ له‌ دويا هه‌ڵويستى له‌ كيشه‌ى كورد له‌ توركياو وت "ده‌ ساڵ چه‌وه‌ڕى له‌ دووسى و ئاشتى خاستره‌ له‌ ده‌ ده‌قه‌ له‌جه‌نگ ".

وه‌گشت داخيگه‌و ئى ره‌سانن عراقيه‌و بڕيگ دويچگه‌يلى له‌ سياسيه‌يل چه‌رمگ ئه‌كه‌نه‌ سيه‌و سيه‌يش ئه‌كه‌ن چه‌رمگ، له‌ كورستانيش ئويشن ئه‌گه‌ر ئيمه‌ كورد موحيبه‌تيش بوارنيم دوينێده‌يان ئه‌وان وه‌ ئه‌نقه‌ز خوه‌يان له‌لى دوير ئه‌خه‌ن.

عه‌لى حسێن فه‌يلى