له‌ ساڵياد شه‌هيده‌يل فه‌يلى.. با كووچ وه‌ بيده‌نگى بكه‌يم

شفق نيوز

ئيمه‌ى فه‌يليه‌يل له‌ گشت ساڵێگ وه‌گووره‌ى شماره‌ى رووژه‌يل و مانگه‌يل وشه‌يل گرده‌و ئه‌كه‌يم و رووژگ له‌بان قسه‌كردن ئه‌گرێم تا گشت ئه‌و قسه‌يله‌ له‌ ساڵێاد شه‌هيده‌يلمان كووتايى وه‌پى باريم ك له‌تى كووچ وه‌ بيده‌نگى ئه‌كه‌يم و وه‌ل ئه‌وه‌يشا سه‌رگه‌ردان مينيم له‌ كاملاوه‌ ده‌س بكه‌يمنه‌ قسه‌، ك ئايا ترس وسنێده‌مان يا ئيمه‌ ڕى هه‌ڵه‌ گرتيمنه‌سه‌ وه‌ر؟

ئويشن ساده‌يى ئاقبه‌تى زه‌ره‌ده‌، ئه‌ى له‌وه‌رچه‌ قه‌بول وه‌و ساده‌ييه‌ كرديم؟ ئيمه‌ى فه‌يليه‌يل گشت ده‌فه‌يگ بنيات و بنياتسازى ئه‌كه‌يم، ئه‌ى ئاكامه‌گه‌ى چه‌ بوى هه‌ناى ك مه‌ردمان تر كاولكارى ئه‌كه‌ن؟

ئاژاوه‌ى ژيان له‌ى وڵاته‌ هوكاره‌ى مه‌حدوديه‌ت و پاپه‌سيانمان كردو يه‌يش وسانه‌مان، ئمجا دڵته‌نگيه‌يل فريه‌يگ هه‌ر مه‌ندنه‌و تا نيشانه‌ى پيرى كه‌فته‌ سه‌رمان، ئيمه‌يش له‌ ژيانمان وه‌ گووره‌ى توانا دڵته‌نگى له‌ دڵه‌يلمان هيليمن و ئه‌و زه‌رده‌خه‌نه‌يليشه‌ ك جاروباريگ په‌يا ئه‌دى له‌لامان گوزاره‌ له‌ خه‌مه‌يل ئه‌كا.

ئيمى جوور مناڵ وه‌پيمان هاتگه‌ وه‌ چه‌رمگى و بيگه‌ردى دڵى و خه‌نستن ساده‌و هوير و پووشاكى، ك وه‌ ساده‌ييش كه‌فێد و شكيه‌ێد و گوزران ئه‌كا، دى وه‌و خاتريشه‌ باس خه‌مه‌يلمانيش لاى كه‌س ناكه‌يم و له‌ رويخوه‌شى ده‌سكردمان شاريمنه‌وه‌ى تا گشت كه‌سيگ باوه‌ڕان ئه‌وه‌ بدێ هويچ ژان و گرفتيگ نه‌يريم.

ئمساڵيش وه‌ بوونه‌ى دڵته‌نگيمان و چاره‌نويسى نوسينيم وه‌ ئه‌وه‌گ جوور باقى ساڵه‌يل گوزه‌يشت گوزه‌ر بدێ، وه‌لێ ئمساڵ وه‌ل گشت تيه‌ڵييگ هه‌ر بايه‌سه‌ دگان وه‌ ئه‌وه‌ بنه‌يم و و بويشيم سوپاسگوزاردانيم هه‌رچى له‌ليدان ده‌رئه‌چێ وه‌ى بوونه‌ى ساڵياده‌و، ئيوه‌ هووكاره‌مان كردين په‌نا وه‌كه‌س نه‌وه‌يم، ئيمه‌ له‌و كه‌سه‌يله‌ نييم وه‌ده‌نگ به‌رز هاوار ئه‌كه‌ن و ده‌سيان وه‌ ئاساره‌يل ناڕه‌سێد.

ئيمه‌ى كورده‌يل فه‌يلى دوياى زوڵم و مه‌ينه‌تى و يه‌كگرتى و كووچكردن وه‌بيده‌نگ ده‌س نزا ئه‌را خودا به‌رزه‌و ئه‌كه‌يم، چوينكه‌ وه‌رجه‌ ئه‌وه‌ ئه‌را خوه‌مان دوعا كرديم ئارامى و ئه‌مان له‌گشت ئه‌و ته‌وه‌فانه‌يله‌ وه‌پيمان بيه‌ێد ك هاته‌ تويشمان، ئمڕوويش ته‌نيا ئه‌خوازيم مقه‌يه‌تى له‌ ئاسايشمان بكه‌يم ك خوه‌ى له‌وه‌ دوينێده‌و ئارامى ده‌رخه‌يم تا ئه‌و ته‌وه‌فانه‌ ئارامه‌و بدێ، دوعا كرديم سه‌بردار بويمن تا ڕاده‌يگ ئه‌ور سيه‌ نه‌مينێد و نوير خوه‌ر ده‌ربكه‌فێد، وه‌و جووره‌ دوعاو نزا كرديم مانگ سه‌ردان شه‌وه‌يلمان بكا، ناخوازيم زوڵم و كينه‌ت ڕيه‌يلمان بگرن و زه‌حمه‌تى بيه‌ن.

ئى"36"ه‌مين ساڵێاد له‌ناوبردن كورده‌يل فه‌يليه‌، يه‌كه‌مجار ياديگه‌ ئه‌را زينگه‌يلمان نه‌ك مردگه‌يلمان، چوينكه‌ گشت وه‌ختيگ ئيمه‌ مه‌رگ ئه‌ياده‌ ريمان، دى بيلا ئمڕوو وه‌ى بوونه‌ بژيه‌يم ك ساڵياد شه‌هيده‌يل و بيسه‌روشوونكرياگه‌يله‌و له‌تى بنويسيم و باس بكه‌يم، تا بزانيم تا چ راده‌يگ فه‌رامووشمان ئه‌كه‌ن و حاشا له‌ليمان ئه‌كه‌ن و دويرمانه‌و ئه‌خه‌ن، با بيلمنه‌يان تا راده‌ى فريه‌يگ وه‌ غروور و لويتبه‌رزييان ته‌مسيل بكه‌ن و خوه‌يان له‌ به‌زه‌يى دويره‌و بخه‌ن.

سوندس ميرزا