ماف كورد له‌ به‌رازیله‌و ئه‌را جه‌هان

شفق نيوز

  جارجاریگ دوینید یه‌ك رسته‌ كاریگه‌رى گه‌ورایگ له‌ گوزارشكردن ئه‌كا له‌ كیشه‌ى ملله‌تیگ یا ئاینده‌ى نه‌ته‌وه‌یگ . ئمجا له‌بان ئه‌و بنه‌ما وه‌رجه‌ ده‌ ساڵ قسه‌یگ ره‌وان له‌ رۆمانیگ خوه‌نیم، ك له‌لایه‌ن ناودارترین ئه‌دیب هاوچه‌رخ جه‌هان نویسریاوید.

ئه‌و رۆماننویس ناوداره‌ ناسریاگه‌ وه‌"پاولۆ كویلۆ " ك خه‌ڵك وڵات به‌رازیله‌و ئه‌و رۆمانیشه‌ ك نویساسه‌ى 160 ملیۆن تیراژ یا نوسخه‌ وه‌ گشت زووانه‌یل له‌لى فرووشیاگه‌.

ئمجا له‌ گفتگوویگ ساده‌ى ناو رۆمانه‌گه‌، ك یانزه‌ ده‌قه‌س، پاڵه‌وان رۆمانه‌گه‌ له‌ خوه‌ینیشانداینیگ له‌ وڵاته‌یل بیگانه‌ به‌شداره‌، ك ئه‌ویش خوه‌ینیشانداینیگ كورده‌یله‌. له‌ رۆمانه‌گه‌ ماریا له‌لى پرسیار ئه‌كا ئایا كورد كیین؟ ئه‌ویش وه‌ چه‌ن وشه‌یگ جواوی ئه‌ياد و ئویشید: كورد ملله‌تیگه‌ ده‌وڵه‌ت نه‌یرید، نیشتمانه‌گه‌یان كوردستانه‌ دابه‌ش كریاگه‌ له‌بان عراق و توركیا.

ئه‌و رسته‌ گه‌نجینه‌یگه‌ ك هه‌ركه‌سیگ قه‌درى بزانید ئه‌تویه‌نید رووشنایى بخه‌یده‌ بانى و له‌یه‌كیه‌و بیه‌ید له‌بان ئاست جه‌هانى، ك ئیسه‌ ها له‌ناو وژدان 20 ملیۆن ئاده‌میزاد، وه‌ل چه‌نه‌ها تیراژ چاپكریاگ ئه‌را 26 زووان زینگ .

ئومیده‌وارم ك ده‌سڵات بیاشتام و بتویه‌نستام كۆنگره‌و سیمینار ناوده‌وڵه‌تى ریك بخستیام له‌و باوه‌ته‌و، تا له‌و دید ساده‌وه‌ گوزارش له‌ كیشه‌ى كورد بكردیام، ك هه‌رچه‌نى وه‌ دریژایى تاریخ وه‌ گشت جووریگه‌و دژایه‌تى ئه‌و ملله‌ته‌ كریاگه‌، وه‌لى كیشه‌ى وژدان و وجوود و ئاشتى هه‌ر وه‌ نه‌مرى مه‌ند و سه‌ركه‌فت.

ئه‌و وشه‌یل نویسه‌ر به‌رازیلیه‌ ك له‌ گشت دونیا خوه‌نریه‌یده‌و، شایسته‌ى ئه‌وه‌سه‌ له‌ ناو به‌رنامه‌یل خوه‌نین خوه‌ندكاره‌یل كورد دابنریه‌ید، هه‌ڵبه‌ته‌ نه‌ك له‌جیاى په‌روه‌رده‌ى نیشتمانى كوردى، به‌ڵكوو جوور باوه‌ت ئه‌ده‌ب له‌بان ئه‌و بنه‌ما ك كلیلیگه‌ ئه‌را چاره‌سه‌ر فكرى و ئنسانى، تا له‌وه‌رچه‌و مناڵه‌یل بویچگ له‌ خوه‌ندنگایه‌یل بمینیدو له‌ فكر خوه‌ندكاره‌یل زانكۆ هه‌ر بمینید.

هه‌ر له‌وه‌ر ئه‌وه‌یش ئویشیم بيگومان ئه‌و تاريف و ئاماژه‌ى قویل جه‌هانیه‌ ئه‌را ئه‌وه‌سه‌ تا شیه‌وكردن له‌لى بكریه‌ید وه‌بى ئه‌وه‌ك گرژى سیاسى له‌شوون خوه‌ى بارید، چوینكه‌ كاریگه‌رى له‌ دڵ و ده‌روین دیریدو گفتگوو وه‌ل زووانیگ جه‌هانى ئه‌كا ك گشت جه‌هان وه‌بى سه‌ختى له‌لى ره‌سیده‌و، ك ئه‌ویش زووان وژدان و هونه‌ر و داهینانه‌ جوور كانیاو پاك له‌ كانیه‌یل كوردستان نه‌مر.

د. فاتح عه‌بدولسه‌لام

ج . أ