سیاسه‌تباز، سیاسه‌تمه‌دار و رابه‌ر نه‌ته‌وه‌یى

شفق نيوز

 

سیاسه‌تبازه‌یل ژیرده‌سه‌ى به‌رژه‌وه‌ندى كه‌سى خوه‌یانن، سیاسه‌تمه‌داره‌یل چه‌واشه‌ى ئه‌وانن، سیاسه‌تمه‌داره‌یل گشت كه‌ره‌سه‌یل وه‌رده‌سیان هه‌ر له‌ده‌سڵات و پویل و ره‌سانن بگر تاره‌سیده‌ نیازپاكى مه‌ردم و به‌ژه‌وه‌ندى گشتى ته‌نیا ئه‌را به‌رژه‌وه‌ندى خوه‌یان تیه‌رنه‌ى كار، ئه‌وانه‌ كه‌سه‌یل بیوه‌فان، ته‌نیا وه‌فا ئه‌را ئه‌و كه‌سه‌یله‌ دیرن ك ریخوه‌شكه‌رن ئه‌را دابینكردن به‌رژه‌وه‌ندیه‌یل.

سیاسه‌تباز مه‌رج نیه‌ زاناو دانا بوود، هه‌ر له‌وه‌ر ئه‌وه‌یش بۆشایى ماریفه‌ت و زانستى خوه‌ى وه‌ فه‌ن وفیڵ پڕه‌و ئه‌كا، ئه‌نجا ئه‌گه‌ر كه‌میگ زانستییش داشتوود له‌وه‌ر خودپه‌رسى و نه‌یاشتن نیازپاكى ئه‌و زانستیه‌ هویچ قیمه‌تیگ نه‌یرید، وه‌لى سیاسه‌تمه‌دار بایه‌سه‌ زاناو داناو هوشیار بوود ئه‌را ئه‌وه‌ك فه‌ن وفیڵ له‌لى نه‌كریه‌ید، نه‌ك ئه‌را ئه‌وه‌ك فه‌ن وفیڵ له‌ مه‌ردم بكاو هه‌ر له‌وه‌ر ئه‌وه‌یش دوینید وه‌فادارى له‌وه‌رچه‌و گرید.

سیاسه‌تمه‌دار ئه‌گه‌ر خوه‌شى له‌ به‌رژه‌وه‌ندى باید، تا ئه‌و راده‌ خودپه‌رس نیه‌ ك به‌رژه‌وه‌ندى گشتى بكاده‌ قوربان به‌رژه‌وه‌ندى خوه‌ى، مه‌ترسى سیاسه‌تبازه‌یل له‌ پایه‌ى سیاسى وڵاتیگ چشت كه‌میگ نیه‌و ته‌نیا هوشیارى مه‌ردمه‌ ئى مه‌ترسیه‌ دروس كه‌ن، گشت ئاده‌میزادیگ خاوه‌ن به‌هره‌ى له‌یه‌ك جیاكردنه‌وه‌ى چشت خاس و خراوه‌، هه‌ر له‌وه‌ر ئه‌وه‌یش هاووڵاتیه‌یل تویه‌نن گفت و كرده‌وه‌ى سیاسه‌تبازه‌یل و سیاسه‌تمه‌داره‌یل له‌یه‌ك جیاوه‌ بكه‌ن، ئنحا هه‌رچه‌نى فره‌جار سیاسه‌تبازه‌یل توان مه‌ردم بخه‌ڵه‌تنن، وه‌لى له‌وه‌ر ئه‌وه‌ك جارجاریگ خوه‌یان باوه‌ڕ وه‌ قسه‌یل خوه‌یان نه‌یرن دوینید كرده‌وه‌یلیان وه‌ل قسه‌یلیانا جوور یه‌ك نیه‌و هه‌ر وه‌و خاتریشه‌ زوورم مه‌ردم متمانه‌ وه‌پیان ناكه‌ن.

سیاسه‌تباز ناتویه‌نید تا ماوه‌ى دریژیگ متمانه‌ى مه‌ردم ئه‌را خوه‌ى مسۆگه‌ر بكا، وه‌ چه‌واشه‌ى سیاسه‌تمه‌دار راسكانى ك قسه‌یلیان له‌ قویلایى دڵیان وه‌ راسگووییه‌و ده‌رچوود و كاریگه‌رى ئه‌كاده‌ بان مه‌ردم. ئنجا رابه‌ر نه‌ته‌وه‌یگ ك ئه‌را رزگارى نه‌ته‌وه‌گه‌ى خه‌بات كردگه‌و ئه‌كا و كیشه‌ى نه‌ته‌وه‌گه‌ى وه‌ره‌و نوا بردگه‌، سیاسه‌تمه‌دار فره‌ راسكانیه‌و كار ئه‌را دابینكردن گه‌وراترین به‌رژه‌وه‌ندى گشتى ئه‌كا ك ئه‌ویش ئازادى ملله‌ته‌گه‌یه‌و هه‌ر وه‌و خاتریشه‌ ئاماده‌س قوربانى وه‌گشت به‌رژه‌وه‌ندیه‌یل خوه‌ى بیه‌ید. رابه‌ر نه‌ته‌وه‌یى ئه‌و كه‌سه‌سه‌ ك كه‌س ناتویه‌نید متمانه‌ى زوورمینه‌ى ملله‌ته‌گه‌ى له‌لى بسینیده‌و، چوینكه‌ ته‌نیا یه‌ك به‌رژه‌وه‌ندى سه‌ره‌كى هه‌س ك ئه‌ویش رزگارى و به‌خته‌وه‌رى و خوه‌شگوزرانى ملله‌ته‌گه‌یه‌.

رابه‌ر هه‌میشه‌ ها له‌ژیر هه‌ڕه‌شه‌ى ناوخوه‌یى و ده‌ره‌كى، له‌ ناوخوه‌یى ها له‌ژیر هه‌ڕه‌شه‌ى سیاسه‌تبازه‌یل و به‌رژه‌وه‌ندپه‌رسه‌یل، سیاسه‌تبازه‌یل ناخوازن به‌رنامه‌ى رابه‌ر سه‌ربگریدو به‌رژه‌وه‌ندپه‌رسه‌یلیش ك فره‌جار له‌وه‌رچه‌و مه‌ردم خوه‌یان وه‌ دڵسووز رابه‌ر زانن، دوینید وه‌ كاره‌یل خراویان ده‌س له‌ پایه‌ى رابه‌ر وه‌شنن. له‌ كوردستان جوور گشت وڵاته‌یل تر، سیاسه‌تباز و سیاسه‌تمه‌دار هه‌ن، وه‌لى ته‌نیا یه‌ك رابه‌ر نه‌ته‌وه‌یى سیاسه‌تمه‌دار دیریم ك وه‌ دڵ و گیان ها وه‌ل ملله‌ته‌گه‌ى ك ئه‌ویش سه‌رۆك مه‌سعود بارزانیه‌. سیاسه‌تمه‌داره‌یل راسكانى هویچ وه‌ختى هه‌وڵ سه‌رنه‌خستن رابه‌ر نیه‌ن، ئه‌وان له‌ڕوى سیاسیه‌و كه‌س ره‌سى و فامیده‌ن، هه‌ر له‌وه‌ر ئه‌وه‌یش دوینید فره‌ وه‌جوانى ره‌سنه‌و له‌ پایه‌و گرنگى رابه‌ر.

رابه‌ر له‌ قه‌یرانه‌یل بڕیار دروس ده‌ید ك شایه‌ت له‌ سه‌ره‌تاوه‌ مه‌ردمانیگ وه‌ غه‌ڵه‌ت بزاننه‌ى، وه‌لى له‌ ئه‌نجام زانن ك ئه‌وان غه‌ڵه‌ت بوینه‌و بڕیار رابه‌ر له‌ به‌رژه‌وه‌ندى گشتى بویه‌، ئنجا ئه‌را ئیمه‌ى كوردیش بارزانى رابه‌ر نه‌ته‌وه‌س، بایه‌سه‌ دڵنیا بویمن له‌وه‌ك له‌ قه‌یرانه‌یل سیاسى قورتارمان ئه‌كا، وه‌مه‌رجیگ گشتمان وه‌ تایبه‌ت سیاسه‌تمه‌دار و رووشنهویره‌یلمان ڕى نه‌یه‌ن سیاسه‌تبازه‌یل و به‌رژه‌وه‌ندپه‌رسه‌یل ناوخوه‌یى و دوشمنه‌یل ده‌ره‌كیمان پیلانه‌یلیان جیوه‌جى بكه‌ن.

نه‌زهه‌ت حالى

ج . أ