مام جه‌لال جوور فه‌يلييگ

يه‌دوڵڵا  كه‌ريم

شه‌فه‌ق نيوز/ له‌ باسكردن له‌بان مێژوو كورد فه‌يلى، ئه‌گه‌ر له‌ ده‌سڵات و نفوز ناوچه‌يى و به‌رژه‌وه‌نديه‌يل حزبى و ديد چينايه‌تى ده‌ربچيم و پێوه‌رمان ته‌نيا وه‌ره‌و ديد نه‌ته‌وه‌يى بكه‌يم جوور ئايدۆلۆجيايگ تايبه‌ت وه‌ ئاده‌ميزاد كورد، ئه‌وه‌ بايه‌سه‌ له‌و رويه‌و نزيكه‌و بويمن ك مامۆستا يه‌دوڵلا كه‌ريم فه‌يلى وه‌ره‌و پى چيه‌ ك دوياى نه‌وه‌ى دامه‌زرنه‌ر پارت ديموكرات كوردستان جوور نه‌وه‌يل يه‌كه‌مينه‌يل تاريف كريه‌ێد و ئه‌را (شه‌فه‌ق نيوز)باس ئه‌كاو ئويشێد: تاوه‌خت گله‌وخواردن بارزانى نه‌مر ساڵ 1958، قورسايى گه‌وراى پارتى له‌ به‌غدا بوى و جموجويلده‌ر سياسى كورد راسكانى له‌ به‌غدا و زوورم ريكخرياگه‌يل و جمشته‌يل له‌ى شاره‌ بوى و ئاساييش بوى ئه‌را كورده‌يل فه‌يلى رۆڵ سه‌ره‌كى بياشتوون له‌ چه‌ن روييگه‌و، يه‌كه‌م: له‌وه‌ر ئه‌وه‌گ فريه‌ بوين له‌ به‌غداو زوورم مه‌ردم ريكخرياگه‌يل حزبى له‌ ئه‌وان بوى و باقى كورده‌يليش ك وجوود داشتن له‌ به‌غدا خوه‌نكار و كارمه‌ند و چينه‌يل تر بوين، ك له‌ ماوه‌ى گوزه‌يشت بوينه‌ قامه‌ى شووڕش وه‌ شيوه‌يگ كه‌متر له‌ كورده‌يل فه‌يلى.

 

دويه‌م: هه‌ناى ك ناكووكى كه‌فته‌و له‌ناو هه‌ردوگ باڵه‌يل ئبراهيم ئه‌حمه‌د و هه‌مزه‌ عه‌بدوڵڵا، كورده‌يل فه‌يلى مقه‌يه‌تى له‌ بنيات حزب كردن و ڕى نه‌يان بڕه‌سێده‌ حاڵه‌تيگ خراوتر، ك وه‌و خاتريشه‌ مقه‌يه‌تى له‌و ئه‌مانه‌ته‌ كردن تا وه‌خت ره‌سين مه‌لا مسه‌ته‌فاى بارزانى ك له‌ساڵ 1958 گله‌وخوارد ئه‌را عراق.

 

سێيه‌م: له‌ڕوى داراييشه‌و، حزبه‌گه‌ خه‌رجى و داهات فريه‌يگ نه‌ياشت، وه‌لێ وه‌ل ئه‌وه‌يشا پشت وه‌ ده‌سميه‌ت و كوومه‌ك به‌ساوێد ك له‌ به‌غدا ئه‌راى جه‌مه‌و كريا، ئاشكرايشه‌ ك سه‌رچه‌وه‌ى ئه‌و ده‌سميته‌يليشه‌ زوورمى له‌ كورده‌يل فه‌يلى بوى ك ده‌س باڵايگيش داشتن له‌ى مه‌سه‌له‌ و له‌ ديد تازه‌و ئحساس نه‌ته‌وه‌يى و له‌ بازرگانى و كاره‌يل تر سياسى و كۆمه‌لايه‌تى و گشت توانايان خستنه‌ خزمه‌ت شووڕش.

 

مامۆستا يه‌دوڵڵا كه‌ريم ك ئه‌را ماوه‌ى ساڵه‌يل فريه‌يگ پۆست وه‌رپرس ريكخستنه‌يل پارتى له‌ به‌غدا وه‌ ده‌سيه‌و بوى، ئويشێد: وه‌رجه‌ گله‌وخواردن بارزانى، پارتى مه‌شق سياسه‌ت كردياد، وه‌لێ مه‌كته‌ب سياسى نه‌ياشت، چوينكه‌ له‌وه‌ر كيشه‌يل ناوخوه‌يى چالاك نه‌وى، وه‌لێ دوياى گله‌وخواردن بارزانى سازكردن كۆنگره‌ى چواره‌م له‌ساڵ 1959 كار پارتى پيشكه‌فتن له‌تى دوينرياو بويه‌ خاوه‌ن ليژنه‌ى ناوه‌ندى وه‌بى ئه‌وه‌گ كورده‌يل فه‌يلى پشتگووش بخريه‌ێد، به‌ڵكوو به‌ش شير له‌تى داشتن و هه‌ر يه‌ك له‌ حه‌بيب محه‌مه‌د كه‌ريم و زه‌كيه‌ ئسماعيل حه‌قى و يه‌دوڵڵا كه‌ريم و عه‌بدولحسێن فه‌يلى بوينه‌ ئه‌ندام ليژنه‌ى ناوه‌ندى، يه‌يش بيجگه‌ ئه‌و ليژنه‌يل ناوچه‌ييه‌ ك له‌ به‌غداوه‌ ده‌سوه‌پيكرد تا به‌سره‌ له‌ پاين باشوور، ك وه‌رپرسه‌يليانيش گشتيان له‌ كورده‌يل فه‌يلى بوين.

 

مامۆستا يه‌دوڵڵا كه‌ريم باس له‌وه‌يش كرد و وت: كى ئاگاداره‌ له‌وه‌گ له‌ سه‌ره‌تاى ساڵه‌يل په‌نجاى سه‌ده‌ى وه‌رين له‌ وه‌ختيگ ك بارزانى له‌ روسيا بوى و هه‌ردوگ جيگره‌گه‌ى شێخ له‌تيف شێخ مه‌حمود و كاك زياد كۆيى له‌ سلێمانى و كۆيسنجه‌ق بوين، گشت مه‌سه‌له‌يگ ك له‌و وه‌خته‌يله‌ په‌يوه‌س بوياتاد وه‌و گفتگووه‌يله‌ ك جموجويل كورد و ريكخستنه‌يل كورد و ناوه‌ند بڕيار سياسى كورد خواستياده‌ێ جوور پارت ديموكرات كوردستان جيگير بوى له‌ به‌غدا و گشت كاروباره‌يل پارته‌گه‌يش دكتۆر جه‌عفه‌ر محه‌مه‌د كه‌ريم بردياده‌ى ڕييه‌و، وه‌لێ ئى راسيه‌ باس نه‌كرياگه‌.

 

وه‌ل ئه‌وه‌يشا مامۆستا يه‌دوڵلا كه‌ريم ئويشێد: مه‌ردمان كه‌ميگ ئاگادارن له‌وه‌گ له‌ساڵ 1956 هه‌ناى ك مام جه‌لال گه‌شت وه‌ره‌و وارشۆ كرد جوور نوێنه‌ر يه‌كێتى شبيبه‌ى كوردستان و له‌واريشه‌و چى ئه‌را ديدار بارزانى له‌ روسيا، وه‌ پاسه‌پۆرتيگ كورد فه‌يلى چى وه‌ناو محه‌مه‌د حاجى مووسا و ته‌نانه‌ت گشت هه‌وه‌جه‌يليشى جوور جنگ و خه‌رج گه‌شتكردنيشى له‌لايه‌ن كورده‌يل فه‌يليه‌و دريا، چوينكه‌ له‌و وه‌خته‌يله‌ حزب كه‌مده‌س و كه‌مدارايى بوى، وه‌لێ پايه‌ى بارزه‌و خوه‌شه‌ويش بوى له‌لاى كورده‌يل فه‌يلى.