ده‌سڵات هووز ماڵیمان فه‌یلى

شفق نيوز

دویه‌م)پیكهاتگه‌و دامه‌زرنه‌رى(شه‌فى كوڕ قه‌مه‌ر كوڕ سڵانویس كوڕ هومان)ك ناسریا وه‌(شه‌فى به‌یرى). بنه‌ڕه‌ت ناو ماڵیمان، له‌(ماڵ هومان)ه‌و هاتگه‌ ك چووده‌و ئه‌را هومان باپیره‌گه‌وراو دامه‌زرنه‌ر.

له‌یوا دیاره‌ ك هومان له‌وه‌خت ژیانى، ئه‌و ناوچه‌یل ژیر ده‌سڵاتیه‌ به‌شبه‌شه‌و كردگه‌ له‌بان هه‌رسێ كوڕه‌گه‌ى(یوسف و مرادوه‌یس و ئه‌لاوه‌یس)، ئمجا ناوچه‌یل به‌دره‌و شیروان و كنار ئاو سه‌یمه‌ره‌ كه‌فته‌ به‌ش ئه‌لاوه‌یس ك دو كوڕ داشت وه‌ناو (سڵانویس و قوباد). له‌شوون مردن ئه‌لاوه‌یس كوڕه‌ گه‌وراگه‌ى شوونى گرت و قوباد براى كرده‌ جیگر خوه‌ى ئه‌را وه‌ڕیه‌وبردن كاروبار ناوچه‌گه‌.

سڵانویس له‌شوون مردنى(قه‌مه‌ر) كوڕى شوونى گرت و قوبادیش(قه‌یتاس)كوڕى جینشینى بوى، ئمجا قوباد وه‌رجه‌ سڵانویس مرد. قه‌یتاس له‌وه‌ر ئه‌وه‌ك عومرى گه‌وراتر بوى حوكمه‌گه‌ گرته‌ده‌س و قه‌مه‌ر كرده‌ جیگر خوه‌ى، دى وه‌و بوونه‌ مه‌سه‌له‌ى ته‌ماح په‌یا بوى ئه‌را روحڵڵا كوڕ قه‌یتاس و هویر له‌وه‌ كرد ئه‌و باو یا ته‌قلیده‌ بشكنێد له‌باوه‌ت ده‌س وه‌ده‌سكردن ده‌سڵات پشتاوپشت، هه‌ر له‌وه‌ر ئه‌وه‌یش ناوچه‌گه‌ له‌ژیر ده‌سڵات تاتگى ده‌ركرد و هه‌وڵ ئه‌وه‌دا خوه‌ى بچه‌سپنێد و یه‌یش ئه‌ڕاى دروس بوى و جویر میر دامه‌زریا له‌شوون مردن باوگى وه‌ بڕیاریگ له‌ حكوومه‌ت، ئمجا بویه‌ هوكار په‌یابوین كیشمه‌كیش له‌ناونى ئامووزایه‌یلى، ك ئه‌وه‌ بوى شه‌نشاى كوڕ قه‌مه‌ر لایه‌نگره‌یلى جه‌مه‌وكردو په‌لامار باره‌گا یا مه‌قه‌ڕ روحڵڵا داو ناچارى كرد بوایگ  ئه‌را شار خوڕه‌م ئاباد.

وه‌ختى روحڵڵا فه‌رمانڕه‌وا بوى له‌لایه‌ن ده‌وڵه‌ته‌و له‌بان ناوچه‌گه‌، شانشاى جوور یاخى هساو كرد، وه‌ هه‌ر حاڵ روحڵڵا هاته‌و ئه‌را بان پۆست خوه‌ى و له‌شوون ئه‌وه‌ك چه‌ن ساڵیگ زندانى كریا له‌لایه‌ن والى و دویاخر تویه‌نست له‌زندان بوایگ و هاته‌و ئه‌را ماڵ خوه‌ى له‌ كونجه‌، ئمجا والى فه‌رمان دا روحڵڵا وه‌ سزاداین و كوشتنى، له‌و ماوه‌یشه‌ حكوومه‌ت ناوچه‌ى شیروان له‌ژیر ده‌سڵات روحڵڵا داوڕى و له‌ڕى حاكمیگ توركیه‌و بریا ڕێیه‌و. دى ئه‌وه‌ بوى شه‌فى ك براى شه‌نشاى بوى له‌ڕى حاكم توركیه‌و هات ئه‌را لاى میر هووز ره‌بیعه‌ له‌ناو عراق، ك ئه‌و وه‌خته‌ عومرى 18 ساڵان بوى و قسه‌ى راس كرد له‌لاى میر، شه‌فى شوون روحڵڵا گرت وه‌بى كیشمه‌كیش، وه‌لى وه‌شیوه‌یگ ناڕاسه‌وخۆ و براژنه‌گه‌ى خوه‌ى خوازى و هووزه‌گه‌ سه‌ر ئه‌ڕاى چه‌مانن و دیارى ئه‌ڕاى بردن، وه‌لى میر تایفه‌ى سوره‌مه‌یرى(كیان)وه‌پى رازى نه‌وى و باج ساڵانه‌ وه‌پى نه‌یا. هه‌وڵ شه‌فى كزه‌و بوى و بڕیاردا زاڵ بووده‌ بانى، ئمجا میر سوره‌مه‌یرى ده‌رچى ئه‌را ڕاوكردن له‌ كویه‌ى كه‌وه‌ركوو، له‌و وه‌خته‌ شه‌فى و بڕیگ له‌ پیاوه‌یلى كه‌فتنه‌ شوونى وه‌ مه‌هانه‌ى ڕاوكردن، ئمجا وه‌ختى ره‌سینه‌ نزیك یه‌كترى شه‌فى قه‌یرى گوشت شكار راوكریاگ ئه‌راى كلكرد وه‌ل یه‌كیگ له‌ پیاوه‌یلى و وته‌پى شه‌ى تواێد سه‌رداند بكا جویر ره‌فیقیگ، میریش ئسراحه‌ت نه‌كرد ئه‌را شه‌فى و گومان له‌لاى په‌یا بوى و دیاریه‌گه‌ى كله‌وكرد.

خورگه‌ى كوڕ شه‌نشاى له‌و ڕویداگه‌ وه‌ل شه‌فى تاتگى نه‌وى، وه‌لى لایه‌نگره‌یلى جه‌مه‌و كرد په‌لامار قه‌یتویل داو كوڕه‌گه‌ى ڕوحڵڵا كوشت و ناچار بڕیگ له‌لیان كرد بوان ئه‌را خوڕه‌م ئاباد. دویاخریش ئه‌وه‌ بوى كاكى كوڕ شه‌فى كوڕ قه‌مه‌ر كریا فه‌رمانڕه‌واى ناوچه‌گه‌و هووز ماڵیمان خوه‌یان بوینه‌ ده‌سڵاتدار و زاڵ بوین له‌بان گشت ناكووكى و كیشمه‌كیشیگ.