ته‌ڵا بیجگه‌ جوانى و گرانیه‌گه‌ى

شفق نيوز

 

عه‌لائه‌دین سه‌جادى له‌كتاو "زینده‌وه‌ر"باس له‌ى مادده‌یشه‌ كردگه‌و ئویشید: ته‌ڵا ته‌بیعه‌تى گه‌رمه‌، ئنجا له‌وه‌ر جووشخواردن فریه‌ى به‌شه‌ خاكیه‌گه‌ى وه‌ به‌شه‌ ئاویه‌گه‌ى نه‌ وه‌ئاگر سزیه‌یدو نه‌یش له‌ناو خاك ڕزیه‌ید، ته‌نانه‌ت ئه‌گه‌ر هه‌زاران ساڵیش بمینید له‌كه‌دار نادێ.

له‌ هه‌مان وه‌خت شاره‌زایه‌یلیش ئویشن: ئه‌و شوونه‌یله‌ ك "كان" ئاڵتوینه‌، وه‌ هه‌زار و هه‌یشتا ساڵ ئه‌و ئاڵتوینه‌ له‌تیان دروس بوود.

ته‌ڵا ئه‌و ماده‌ى نه‌رم و زه‌رد و بریقه‌داره‌سه‌ ك مه‌ردم حه‌یرانى بوینه‌ وه‌تایبه‌ت ژنه‌یل. وه‌لى با بزانیم بیجگه‌ جوانى و گرانیه‌گه‌ى قانجازى چه‌س ئه‌را ئاده‌میزاد؟

ئى قسه‌یله‌ هه‌ر له‌سه‌رده‌م كویه‌ن و له‌بان زووان پیشینه‌یلمان هاته‌سه‌ وجوود له‌باوه‌ت ئاڵتوین ك وتنه‌ "هه‌ركه‌سیگ ئاڵتوین وه‌پى بوود كوتان دڵى له‌كاركردن ریك و پیكه‌"، بیجگه‌ ئه‌وه‌یش ئه‌وه‌یش وتنه‌"هه‌ركه‌سیگ سه‌رى ژان بكا، ئاڵتوین بووه‌سیده‌ سه‌ریه‌و ژانه‌گه‌ى سه‌رى شكنید"، هه‌ر وه‌و خاتریشه‌ باس له‌وه‌ ئه‌كه‌ن ك ژنه‌یل فریه‌زان وه‌و جووره‌ وه‌كارى ئه‌یه‌رن.

له‌نه‌فه‌یل تر ته‌ڵا ئه‌وه‌سه‌ ك ئه‌گه‌ر بڕیگ له‌لى ڕیز و هویرده‌ بكریه‌یدو جوور كل و سورمه‌ و باریه‌یده‌ چه‌و ، ئه‌دێده‌ رووشناى ئه‌را چه‌وه‌یل و جوانیه‌و ئه‌كاو هیز دوینستنیشى تیژتره‌و ئه‌كا.

وه‌ل ئه‌وه‌یشا خاوه‌ن ئه‌زموونه‌یلیش وتنه‌: ئه‌گه‌ر هه‌ر گووشیگ وه‌ ده‌رزى ته‌ڵا كونا بكریه‌ید دى شوونه‌گه‌ى كووره‌و نادێ، ئه‌گه‌ریش هه‌ر شوونیگ وه‌ ته‌ڵا داخ بكریه‌ی ، دى ئه‌و شوونه‌ توقڵه‌ ناكا، یا هه‌ر شوونیگ له‌ له‌ش ئاده‌میزاد توقڵه‌ كردوید ئه‌گه‌ر وه‌ته‌ڵا داخ بكریه‌ید یه‌كسه‌ر ئه‌و شوونه‌ خاسه‌و ئه‌دێ. بیجگه‌ ئى قانجازه‌یلیشه‌ ك باسیان كردیم، ئه‌گه‌ر یه‌كیگ بوو ده‌میشى باید، ته‌ڵا بخه‌یده‌ ده‌مى بووه‌گه‌ى نامینید و له‌هه‌مان وه‌خت ئه‌را ته‌نگه‌نه‌فه‌سى ئاده‌میزادیش قانجاز فریه‌یگ دیرید.

هه‌ر له‌وه‌ر ئه‌وه‌یش ئویشیم: ته‌ڵا مادده‌ى نه‌فدار و كه‌ڵكداریگه‌ له‌ژیان ئاده‌میزاد، وه‌لى فره‌كه‌س هه‌ن نازانن قانجازى چه‌نیگه‌و ته‌نیا هه‌ر له‌وه‌ر ناوه‌گه‌ى یا جوانیه‌گه‌ى و په‌سه‌نیه‌گه‌ى ئه‌یه‌رنه‌ى كار.

كاروان غه‌فور

ج . أ