ديمه‌ن سياسی عراق له‌شوون هه‌ڵوژاردنه‌يل

شفق نيوز

قه‌يريگ له‌هيزه‌يل سياسی له‌وه‌رده‌م خوه‌ی لاورد ، ك داوای هه‌ق زياتر ئه‌را قه‌يريگ ناوچه‌و پاريزگا كردن ، وه‌تايبه‌ت ئه‌و پاريزگايه‌يله‌ ك وه‌ده‌س دوياكه‌فتن و نه‌وين خزمه‌تگوزاری بنه‌ڕه‌تيه‌وه‌ ناڵنن ، بيجگه‌ ئه‌وه‌ك قه‌يريگ هيز سياسی ده‌نگداين له‌بان بودجه‌ وه‌ كيشه‌ی سياسی زانستن وه‌ك ده‌نگداين له‌بان قانوون بنه‌مايه‌يل ئه‌نجام هه‌ڵوژاردن و مه‌سه‌له‌ی تر ك داواكاريه‌يل فره‌يگيش خستوينه‌ وه‌رده‌م ئه‌نجوومه‌ن نوێنه‌ره‌يل .

هه‌ڵوژاردنه‌يل ئاينده‌ی ئه‌نجوومه‌ن نوێنه‌ره‌يل له‌ هه‌فت ئادار ئه‌را عراق وه‌ك ده‌وڵه‌ت و ئه‌را عراقيه‌يل وه‌ك ملله‌ت هه‌ڵوژاردنيگ چاره‌نويسساز و يه‌كلاكه‌ره‌ ، له‌وه‌ر ئه‌وه‌ هه‌ڵوژاردنه‌يل ئی جاره‌ يه‌كلاكردنه‌وه‌ی هه‌ڵويست قوناغيگه‌ ك عراق بڕيه‌سه‌ی و پا ناسه‌ قوناغيگ تازه‌ ك بونياتناين ده‌وڵه‌ت قانوون و به‌رقه‌راربوين ئاسايش و چه‌سپانن قانوون و روی وه‌ڕوی بوينه‌وه‌ی تيرۆر ده‌س وه‌پی ئه‌كا .

هه‌ڵوژاردنه‌يل ئی جاره‌ يه‌كلاكه‌ر بووگ ، له‌وه‌ر ئه‌وه‌ ره‌سم و ديمه‌ن سياسی عراق ئه‌را قوناغيگ ئاينده‌ كيشيگ و چه‌سپنيگه‌ی و بنه‌مايه‌يل ده‌وڵه‌ت هاوچه‌رخ تازه‌ دروس ئه‌كاو له‌هه‌مان وه‌خت بونياتاين دام و ده‌زگايه‌يل ده‌ستووری ته‌واو كريه‌يگ و گه‌شه‌وه‌پيداين ئابووری و كوومه‌ڵايه‌تی له‌لی كه‌فيگه‌وه‌و عراق جوير جاران به‌يگه‌وه‌ ئه‌را رز وڵاته‌يل وه‌هيز . ئمجا هه‌رچه‌نی له‌ده‌شت و له‌ناو چشته‌يل فره‌يگ ژنه‌فيه‌يگ و باس له‌چشته‌يليگ كريه‌يگ ئه‌را نه‌خشه‌ی ديمه‌ن سياسی ئاينده‌ی عراق ، وه‌لی ئه‌و وه‌زعه‌ ك له‌ماوه‌ی هه‌فت ساڵ گوزه‌يشت كه‌فته‌ وه‌رچه‌و چه‌نه‌ها هيز سياسی ك خاوه‌ن ريشه‌ی تاريخی و كوومه‌ڵايه‌تيين له‌عراق ئاشكرا كردگه‌و نيه‌وگ ئه‌و هيزه‌يل سياسيه‌ له‌مه‌يدان سياسی دويره‌و بخريه‌ن يا وه‌ يه‌كجاری لاوريه‌ن ، له‌وه‌ر ئه‌وه‌ك له‌ماوه‌ی ئه‌و هه‌فت ساڵه‌ تويه‌نستنه‌ مه‌ردم فره‌يگ ئه‌را خوه‌يان په‌يا بكه‌ن و له‌چوار ده‌ور خوه‌يان گرديانه‌و بكه‌ن .

له‌لايگ تره‌وه‌ ملله‌ته‌يل عراق ك له‌تاوانه‌يل پڕ له‌كاره‌سات دڵته‌زن رژيم به‌عس بيزار بوينه‌ ، هه‌ميشه‌ ترس هاتنه‌وه‌ی شيوه‌ی ئه‌و تاوانه‌يله‌ ديرن و رخيان له‌وه‌ چووگ جاريگ تر ئه‌و وه‌زعه‌ بايگه‌وه‌ ، چوينكه‌ ئه‌گه‌ر ئه‌و رووژه‌يله‌ بايگه‌وه‌ زياتر له‌جاران وه‌زعه‌گه‌ شيويه‌يگ ، هه‌ر له‌وه‌ر ئه‌وه‌ ملله‌ته‌يل عراق له‌فه‌رهه‌نگ خوه‌يان ئه‌و چشته‌ كوشاننه‌سه‌وه‌ ك جاريگ تر ئه‌و جووره‌ حوكميگ بايگه‌وه‌ ، ئمجا له‌وه‌ر ئه‌وه‌ هه‌ڵوژاردنه‌يل ئاينده‌ هيز تازه‌ نياريگه‌ بان كورسی ده‌سڵات و هه‌ر هيزه‌يل سه‌ره‌كی ئيسه‌ ده‌سڵات گرنه‌ ده‌س و ته‌نيا گويڕانكاری له‌شماره‌و پله‌و كورسيه‌يل ئه‌نجوومه‌ن نوينه‌ره‌يل كريه‌يگ . وه‌ل ئه‌وه‌يشا سه‌ردانه‌گه‌ی بايدن ئسپاتكردن پشتگيری ئه‌مريكا بوی ئه‌را عراق و ئيراده‌ی عراقيه‌يل و ئه‌وانيش وه‌پيان له‌يواسه‌ هويچ به‌رژه‌وه‌ندييگ له‌هاتنه‌وه‌ی به‌عسيه‌يل نيه‌ ئه‌را ناو پرووسه‌ی سياسی له‌عراق و ئه‌مريكا پشتگيری له‌ی پرووسه‌ی سياسيه‌ ئه‌كا وه‌گشت توانايگيه‌وه‌ .