ئه‌نجام ته‌ماكارى

شفق نيوز

و په‌ند و مه‌سڵه‌ته‌یل فره‌یگیش له‌ى باوه‌ته‌ له‌ ناو گشت كوومه‌ڵگایه‌یل جه‌هانى وه‌ گشتى و كوومه‌ڵگاى كورده‌واریمان وتریایه‌ و هه‌میشه‌ ئویشریه‌ید.
وه‌لى، ئه‌وه‌گ مایه‌ى سه‌رسوڕمانه‌ ئه‌وه‌سه‌ ك هه‌میشه‌ گشت كه‌سى نیه‌تویه‌نى واز له‌ى خسڵه‌ت گه‌نه‌ بارید؛ هه‌رچه‌نى ك، وه‌دریژى تاریخ ئاده‌میزاد، تاوانه‌یل گه‌ورایگ ئه‌نجام دریاس، له‌ ئاكام ته‌ماكارى، و له‌ى مه‌ورده‌ یادگارى و خه‌یاڵ ملله‌ته‌یل و كوومه‌ڵگایه‌یل جه‌هان هه‌وڵ دانه‌ وه‌ په‌ند و مه‌سڵه‌ت و وه‌سه‌رهات مانادار سنوور یا حه‌دیگ ئه‌را ئى خسڵه‌ته‌ دابنه‌ن. ئیمه‌ له‌یرا نیه‌توایم له‌ى گووشه‌ى بویچگه‌ فره‌ وه‌سه‌رى بچیمن و كوڵ و كوڵبڕ به‌یمنه‌دان ئه‌را وڵات هندوستان ك مه‌ته‌ڵ و وه‌سه‌رهات پڕمانایگ له‌ى باوه‌ته‌ بویه‌سه‌ قسه‌ى سه‌ر زووان مه‌ردم... وه‌لى ئایا تا چه‌نى مه‌ردم گووش ده‌نه‌ ئه‌و مانا و واز له‌ى خسڵه‌ت گه‌نه‌ تیه‌رن؛ به‌ون بیلا وه‌یه‌كه‌و ئى وه‌سارهاته‌ بخوه‌نیم ك ئویشى: یه‌ى بازرگانیگ هندوستانى له‌ یه‌كیگ له‌ ئاواییه‌یل نزیكه‌و شاریگ  جاڕ ئه‌وه‌ كیشا ك له‌ یه‌كیگ له‌ وڵاته‌یل داواكارییگ ئه‌راى هاتیه‌ ك مه‌یموون له‌لایان پویل خاسیگ كه‌ید، و ئه‌ویش وه‌ى بوونه‌ ئاماده‌یه‌ هه‌ركه‌سى مه‌یموونیگ ئه‌راى بگرى 100 ڕوپیه‌ به‌یده‌ پى، وه‌ى جووره‌ خه‌وه‌ر له‌و ئاواییه‌ و ئاواییه‌یل ده‌وروگردى په‌رش وبڵاوه‌و بوى و مه‌ردمیش گشتى ده‌س له‌ كاروبار سه‌ره‌كى خوه‌یان هه‌ڵگردن ك كشت و كاڵ بوى و ده‌س كردنه‌ ڕاوه‌ مه‌یموون و بازرگانه‌گه‌یش هه‌ر خه‌ریك بوى مه‌یموون وه‌ 100 ڕوپیه‌ له‌لیان سه‌نیاد... تا ماوه‌یگ وه‌پى چوى، شماره‌ى مه‌یموونه‌یل له‌و ناوچه‌ كه‌مه‌وبوى و مه‌ردم دوباره‌ چوینه‌ په‌ى كار خوه‌یان ك كشتوكاڵ بوى .. له‌یرایش كابراى بازرگان دوباره‌ جاڕدا ك هه‌ر مه‌یموونیگ وه‌ 200 روپیه‌ سینید، وه‌ى جووره‌ هیشت مه‌ردم دوباره‌ واز له‌ كار خوه‌یان بارن و ده‌س بكه‌نه‌ ڕاوه‌ مه‌یموون تا ڕه‌سیه‌ ئه‌و ڕاده‌ ك وه‌ ده‌گمه‌ن و سه‌ختى فره‌یگ مه‌یموونیگ له‌و ناوچه‌ كه‌فتیاده‌ گیر مه‌ردم؛ ك دوباره‌ ده‌س كردنه‌ كار كشتوكاڵ خوه‌یان... وه‌ختى بازرگانه‌گه‌ وه‌ى كاره‌ زانست، فه‌رمان دا شاگرده‌گه‌ى ك ئاماده‌س ئه‌را سه‌نین هه‌ر مه‌یموونیگ وه‌ 500 ڕوپیه‌، وه‌لى چوینكه‌ سه‌فه‌ریگ ئه‌را شار ها نواى؛ ئه‌رك سه‌نین مه‌یموونه‌یل دایه‌سه‌ ده‌س شاگرده‌گه‌یه‌و.. وه‌ختى كابراى بازرگان له‌و ناوه‌ نه‌ماره‌ى و سه‌رخوه‌ى هه‌ڵگرد، كابراى شاگردیش ك زانست دى مه‌یموون وه‌ سه‌ختى گیر تیه‌ید فچانه‌ گووش مه‌ردمه‌گه‌و وته‌ پیان ك كابراى بازرگان ئه‌وقه‌ره‌ مه‌یموونى فره‌س ك شوماره‌یان نیه‌زانى؛ و وته‌ پیان ك ئه‌وى ئاماده‌س هه‌ر مه‌یموونیگ وه‌ 400 ڕوپیه‌ بفرووشیده‌ پیان و وه‌ختى بازرگانه‌گه‌ تیه‌یده‌و ئه‌را خوه‌یان وه‌ 500 ڕوپیه‌ بفرووشنه‌ى پى و وه‌بى مانى بوین له‌ هه‌ر مه‌یموونیگ بسیننه‌ى 100 روپیه‌ نه‌ف بكه‌ن، وه‌ى جووره‌ مه‌ردم دارا و نه‌داراى خوه‌یان گرده‌و كردن، و ئه‌یاكه‌یان چویه‌ زگ ئه‌واكه‌یان ئه‌را مه‌یموون سه‌نین؛ وه‌و ئومیده‌ ك نه‌ف بى مانى بوینیگ بكه‌ن، و فره‌كه‌سیش چوى له‌ى لا و ئه‌ولا قه‌رز و فه‌رز كرد، هه‌ر وه‌ هه‌مان ئومید... وه‌ى جووره‌ كابراى شاگرد هه‌رچى مه‌یموونه‌ فرووشته‌ مه‌ردمه‌گه‌ و له‌و ڕووژه‌وه‌ دى كه‌س نه‌ بازرگان وه‌چه‌و دى و نه‌ شاگرد؛ و له‌و ئاواییه‌یله‌ ته‌نیا مه‌ردمه‌گه‌ مه‌نن و له‌خوه‌یان زیاتر مه‌یموون... و گشتمان ئه‌و په‌ند كوردیه‌ ها هویرمان ك باس ته‌ماكار و موفڵس كه‌ید!!.

ماجد سوره‌مێری