سه‌روه‌خوه‌یى له‌لاى كورده‌یل فه‌یلى

شفق نيوز

 

نزیكه‌ى 200 ده‌وڵه‌ت له‌ جه‌هان وه‌پیان ئویشن"سه‌روه‌خوه‌ى"، ئیمه‌یش له‌ڕاسى له‌یرا ناخوازیم باس له‌ ریژه‌ى سه‌روه‌خوه‌یى ئه‌و ده‌وڵه‌ته‌یله‌ بكه‌یم، به‌ڵكوو ئویشیم یاساو ریككه‌فتنه‌یلیگ هه‌ن ك كار له‌بان ریكخستن ئاست و جورایه‌تى په‌یوه‌ندى ناونى ئه‌و ده‌وڵه‌ته‌یله‌ ئه‌كه‌ن، یا وه‌ مانایگ تر ئه‌تویه‌نیم بویشیم گشت ئه‌و ده‌وڵه‌ته‌یله‌ فه‌خر و شانازى وه‌و سه‌روه‌خوه‌ییه‌ ئه‌كه‌ن له‌ساى ئامانجیگ باڵاتر، ك ئه‌ویش دابینكردن به‌رژه‌وه‌ندى وڵاته‌ له‌ڕوى سیاسى و ئابوورى و رووشنهویرى و ئاسایشى...هتد.

له‌ى ماوه‌ى دویاخریشه‌ وه‌ بوونه‌ى ئه‌و گرفت و كیشه‌یله‌ ك له‌ بى ئاكامى پیكهاته‌گه‌مان ده‌ركه‌فت له‌ ره‌سین وه‌ چاره‌سه‌ریگ بنه‌ڕه‌تى ئه‌را كیشه‌گه‌مان و شكه‌ستى له‌ هاوردنه‌وه‌ى مافه‌یل زه‌فتكریاگ و هاوردنه‌وه‌ى پایه‌ى مێژوویى له‌ هه‌ڵكه‌فت عراقى جوور ئه‌وساى گوزه‌يشته‌ی له‌وه‌ر هووكاره‌يليگ تايبه‌ت وه‌خوه‌ی و هووكاره‌يليگ له‌ ده‌يشت ئيراده‌ی و هه‌میش له‌وه‌ر نه‌وین دید ئاشكرایگ له‌لایه‌ن ئه‌و حزبه‌یله‌ ك په‌یوه‌سن وه‌ وه‌رپرسیارێتى وه‌رگرى له‌ كیشه‌یل كورد فه‌لى(جوور ئه‌وه‌ك وه‌ ده‌م باسى ئه‌كه‌ن و له‌ كرده‌وه‌ گومه‌)، دى هه‌ر وه‌و خاتریشه‌ بایه‌سه‌ جه‌خت له‌ خواست داین بڕیار و هه‌ڵویسته‌یل تازه‌تریگ بكه‌یم وه‌ چه‌واشه‌ى رووژگاره‌یل گوزه‌یشت.

ئمجا له‌ساى بار ئیسه‌و هه‌ڵوژاردنه‌یل په‌رله‌مانى ئاینده‌یش، دوینیم ك ئیسه‌ مه‌یدان سیاسى به‌رزه‌وبوینیگ له‌ بوار جموجویل مه‌یلكیشان و هه‌وڵ رازیكردن ده‌نگده‌ر و شكه‌ستهاوردن وه‌ ركابه‌ره‌یل وه‌ خوه‌یه‌و دوینید وه‌ گشت شیوازیگ و له‌وانه‌یش پشتبه‌سانن وه‌ شیوه‌زار سه‌روه‌خوه‌یى، ك هه‌ر له‌وه‌ر ئه‌وه‌یش دوینیم ئى حاڵه‌تیشه‌ له‌لاى ئیمه‌ جوور كورده‌یل فه‌یلى نیه‌ویشیم راسه‌، وه‌لى وجوود دیرید.

وه‌لى له‌باوه‌ت ئه‌وه‌گ كه‌سه‌یلیگ تر دقه‌ت له‌بان خراویه‌یل ئه‌كه‌ن، بایه‌سه‌ ئه‌وه‌ ده‌رخه‌یم ك له‌ حاڵه‌ته‌یلیگ مه‌سه‌له‌گه‌ په‌یوه‌س نیه‌ وه‌ هه‌ڵوژارنه‌یل، به‌ڵكوو ئامانج له‌لى شكه‌ستكردنه‌ له‌ روى خودى یا چینایه‌تى و ته‌نانه‌ت له‌یه‌یش فیشتر.

ئیمه‌ زانیم ك شماره‌ى كاندیده‌یلمان كه‌م نیین، وه‌لى له‌ هه‌مان وه‌خت شماره‌ى فریه‌ى كاندیده‌یلیش زه‌مانه‌تیگ نیه‌ ئه‌را سه‌ركه‌فتن گه‌وراتر، به‌ڵكوو دویاجار بڕیار هالاى خود ده‌نگده‌ر وه‌ گووره‌ى ئه‌زموونه‌یل گوزه‌یشته‌ى، ك بڵاوكرنه‌وه‌ى تومه‌ت یه‌كیگه‌ له‌ گرنگترین هووكاره‌یل چویچیان ده‌نگه‌یل و سه‌رگه‌ردانى ده‌نگده‌ر له‌ داین بڕیار دروس، ئمجا دوینید ته‌نیا كه‌سیگ یا لایه‌نیگ دروشم سه‌روه‌خوه‌یى به‌رزه‌و ئه‌كاو نایلیده‌ى وه‌ شیوه‌یگ به‌رهه‌مده‌ر ئه‌و دروشمه‌ سه‌روه‌خوه‌ى بوود، ك له‌وه‌ر ئه‌وه‌یش دوينيم ئه‌و حزب و قه‌واره‌يل سه‌ركه‌فتگه‌ حكوومه‌ته‌یل سه‌روه‌خوه‌ى دامه‌زراننه‌ وه‌ گووره‌ى ئه‌و یاسایه‌یله‌ ره‌فتار و هه‌ڵسووكه‌فت ئه‌كه‌ن ك شیواز و كاروبار ژیان ریكخه‌ن له‌ كومه‌ڵگا.

ئه‌وانه‌گ پابه‌ندن وه‌ ئایدۆلۆجیا یا ریڕه‌و یا پرووژه‌یگ دیاریكریاگ، مادام خاوه‌ن راى و هه‌ڵویست و موور ئاشكرایگن له‌ بوار خزمه‌تكردن وه‌ مه‌ردم، دى ئیمه‌ هه‌ق نه‌یریم وه‌پیان بویشیم سه‌روه‌خوه‌یان نیین، به‌ڵكوو ئویشیم ئه‌وانه‌ راى و ریڕه‌و شیوازیگ تر دیرن له‌وه‌ر ئنتمايان ئه‌را حزب و ريڕه‌ويگ تر، ئمجا  ئاكام هه‌ڵواژردنه‌یلیش ده‌رئه‌كه‌فید و ناو سه‌ركه‌فتگه‌یلیش ئاشكرا بوودو بایه‌سیشه‌ له‌بان ئه‌وانه‌كیش زه‌ره‌دمه‌نه‌يليش دقه‌ت هساو خوه‌یان بكه‌ن، وه‌لى له‌ گشت حاڵه‌تیگ هه‌ر بایه‌سه‌ ئه‌وه‌ له‌ هویر نه‌كه‌یم ك دریژه‌وكردن په‌نجه‌ى تومه‌ت ئه‌را كه‌سه‌یل تر وه‌ تایبه‌ت ئه‌را روڵه‌یل پیكهاته‌گه‌مان له‌ ژیر ناویشانه‌یل سه‌روه‌خوه‌یى و ناسه‌روه‌خوه‌یى، ك جوور گوله‌یگ به‌زه‌ییه‌ ئه‌را ئه‌وانه‌گ هویره‌و ئه‌كه‌ن خزمه‌تیگ بڕه‌سننه‌ ئى پیكهاته‌ى زوڵملیكریاگه‌.

عه‌لى حسێن فه‌یلى

ج . أ