با له‌جیاى دروو نیسان سه‌یاره‌ى نیسان دروس بكه‌یم

شفق نيوز

 

دروو له‌ ئایین پیرووز ئسلام وه‌ كاریگ ناپه‌سه‌ن و خراو دانریاگه‌و خوداو په‌یغه‌مبه‌ر "س . خ" و گشت زانایه‌یل ئایینى وه‌ گشت شیوازیگ ئاگادار مه‌ردم كردنه‌ ك درووكردن وه‌ گشت شیوه‌یگ حه‌رام و قه‌یه‌غه‌كریاگه‌، چوینكه‌ درووكردن ده‌روازه‌ى گشت خراوى و تاوانیگه‌.

فریه‌كه‌س له‌ى رووژه‌ وه‌ ژنه‌فتن هه‌واڵ دروو تویش له‌خوه‌یچگن و فشار خوین و نه‌خوه‌شى دڵ و چه‌نه‌ها نه‌خوه‌شى تر هاتنه‌، هه‌ر وه‌و خاتریشه‌ دروو له‌ ئیسلام ڕى له‌لى گیریاگه‌ ته‌نیا له‌ چه‌ن شوونه‌یل كه‌میگ نه‌ود، ك ئه‌ویش له‌وه‌خته‌یلیگ دروسه‌ ئه‌و درووه‌یله‌ بكریه‌ید ك قورتاركردن گیان كه‌سیگ له‌تى بوود یا ئه‌را ئاشته‌وكردن دوكه‌س یا دولایه‌ن، یا له‌وه‌ر خوه‌شه‌ویسى ناونى ژن و پیاویگ بوود.

ئمجا بیجگه‌ ئه‌و ئه‌و درووه‌یله‌ ك باسیان كردیم، دى درووكردن ناپه‌سه‌ن و ناپوخته‌ و مایه‌ى قه‌بولكردن نیه‌، یه‌یش بیجگه‌ ئه‌وه‌ك له‌ هویچ چركه‌و سه‌عات و رووژیگ نیه‌ دروو له‌تى په‌سه‌ن بوود، به‌ڵكوو قه‌یه‌غه‌ كریاگه‌و ته‌نانه‌ت ئه‌گه‌ر وه‌ گه‌مه‌یشه‌و بوود.

هه‌ر له‌وه‌ر ئه‌وه‌یش خوداى گه‌ورا نه‌فره‌ت له‌ درووزن و درووزنه‌یل كردگه‌، دویاى ئه‌وه‌یش چشت فریه‌ ئه‌ڵڵاجه‌وییگه‌ ك رووژیگ دابنریه‌ید ئه‌را درووكردن، دى نازانیم وه‌ چ داب و نه‌ریتیگ و كام ئایین ده‌سكرد و زه‌وى و ئاسمانیگ ره‌وایى ئه‌دریه‌یده‌ ئیچنه‌ تاوان گه‌ورا، ك یه‌یش به‌شیگ له‌ كه‌ناڵه‌یل ره‌ساننیش یا گوڤار و رووژنامه‌یلیش گرته‌سه‌وه‌و نوڕید فریه‌جار هه‌واڵیگ مه‌حاڵ وه‌ناو دروو نیسان بڵاو ئه‌كه‌ن و ملله‌تیگ تویش خفه‌ت ئه‌كه‌ن.

یا نوڕید جار له‌یوا بویه‌ له‌ دویرى سه‌د كیلۆمه‌تر زه‌نگ ئه‌را كه‌سیگ كردنه‌ ك باوگى مردگه‌و قه‌سه‌میش ئه‌ڕاى خواردنه‌، یه‌یش له‌وه‌ختیگ وه‌ قسه‌ى درووزنه‌یل مانگ نیسان كوڕ باوگ مردگیش هاته‌سه‌و ئه‌را ماڵ و وتنه‌سه‌پى دروو نیسانه‌.

وه‌ چه‌وایشه‌و دوینید جار له‌یوا بویه‌ كاره‌سات و رویداگ دڵته‌زن رویداگه‌، وه‌لى مه‌ردم وه‌ره‌و هه‌واڵه‌گه‌ ناتنه‌ له‌وه‌ر ئه‌وه‌ك وه‌ دروو نیسان زانستنه‌سه‌ى. ئمجا ئه‌وه‌ چ پیلان و به‌رنامه‌یگه‌ ك ئه‌را نه‌مه‌ندن راسگوویى و ئه‌خلاق راسى! وه‌لى ئه‌ڵڵاجه‌وى تر له‌وه‌ ئه‌وه‌سه‌ مه‌ردمانیگ وه‌ناو رووشنهویر و رووژنامه‌نویس و ره‌ساننكار ئه‌و كاره‌یله‌ ئه‌نجام بیه‌ن و ئى درووه‌یله‌ بكه‌ن. هه‌ر له‌وه‌ر ئه‌وه‌یش ئویشیم بیلا دى ئى ملله‌ت موسڵمانه‌ هه‌ڵنه‌خه‌ڵه‌تنیم، با له‌جیاى دروویگ ئه‌را گرده‌وكردن پویل هووكاره‌ى گرده‌وكردن هووكاره‌ى پویلیان بكه‌یم وه‌ دروسكردن نیسان، با له‌جیاى دروو نیسان له‌ مانگ نیسان سه‌یاره‌ى نیسان دروس بكه‌یم.

یوسف سابر

ج . أ