له‌وه‌ختیگ كوده‌تاكاره‌یل نیاز بوردمانكردن"عه‌گدلئه‌كراد"داشتن

شفق نيوز

  له‌ 8 شوبات 1963، عراق كوده‌تایگ له‌بان عه‌بدلكه‌ریم قاسم وه‌ خوه‌یه‌و دى، له‌و وه‌خته‌ خوین فریه‌یگ له‌ وڵاته‌گه‌ رشیاو ترۆر و تون وتیژى روى كرده‌ چینه‌یل فریه‌یگ له‌ روڵه‌یل عراق و ته‌نانه‌ت خود كوده‌تاكاره‌یلیش له‌لیان بویه‌ دژ یه‌كترى.

له‌یرا هه‌وڵ ئه‌وه‌ ده‌م باس له‌و بار ئه‌وسا بكه‌م ك رویدا له‌ 14ى ره‌مه‌زان، ئه‌ویش وه‌ گووره‌ى ئه‌وه‌ك وه‌چه‌و خوه‌م دیمه‌ى و ئه‌وسا من مناڵ بویم له‌ عه‌گدلئه‌كرادو ئه‌وه‌ك دیمه‌چه‌و بڕیگى باس كه‌م و سوپاسگوزار ئه‌و كه‌سه‌یله‌ كه‌م فیشتر له‌ى باوه‌ته‌و زانن و بخه‌نه‌ى بان باسه‌گه‌م تا وه‌ ته‌واوى مه‌سه‌له‌گه‌ رووشنه‌و بوود.

له‌وه‌ختیگ ك ده‌نگدوو كوده‌تا له‌ به‌غدا بڵاو بوى، یه‌كسه‌ر ده‌نگ هاژه‌هاژ ته‌یاره‌ له‌ ئاسمان پایته‌خت ژنه‌فتیم ئه‌را بوردمان وزاره‌ت وه‌رگرى، ئمجا شماره‌ى فریه‌یگ له‌ جایه‌ڵ جوانه‌یل عه‌گدلئه‌كراد روى كردنه‌ دیم وزاره‌ته‌گه‌ ئه‌را گرده‌وبوین وه‌ل مه‌ردمانیگ تر وه‌خاتر لایه‌نگرى سه‌ركرده‌ عه‌بدلكه‌ریم قاسم و خوازیار ئه‌وه‌ بوین پڕ چه‌ك بكریه‌ن ئه‌را روى وه‌ڕوى بوینه‌وه‌ى كوده‌تاكاره‌یل، وه‌لى عه‌بدلكه‌ریم قاسم ئه‌و داواكاریه‌ ره‌ته‌و كردو وت"من خوه‌م ئى مه‌سه‌له‌ ریكخه‌م و ئه‌تویه‌نم ئى كوده‌تا له‌ناو بووه‌م". دى له‌و وه‌ختیشه‌ ته‌یاره‌یگ ده‌سكرده‌ بوردماكردن وزاره‌ت وه‌رگرى و ته‌قه‌ له‌ مه‌ردمه‌گه‌ كردو یه‌كیگ له‌ جایه‌ڵ جوانه‌یل عه‌گدلئه‌كراد گولله‌یگ له‌لى دریاو یه‌كسه‌ر گیان له‌ده‌سدا.

له‌ى حاڵه‌تیشه‌ براگه‌م ك له‌ خوه‌م گه‌وراتر بوى له‌ عومر وته‌ مه‌ردمه‌گه‌ى عه‌گدلئه‌كراد بچنه‌و ئه‌را ناوچه‌یل خوه‌دان، ك له‌یوا دیار بوى له‌ورا حزبیگ نیشتمانى و شایه‌ت فیشتر له‌ حزبیگیش بڕیار جه‌نگكردن و روى وه‌ڕوى بوینه‌وه‌ى ئه‌و كوده‌تا داشت ك هه‌رچه‌نى چه‌كه‌یلیانیش ئاسایى بوى.

ئنجا وه‌راسى ئه‌و كاره‌ رویداو عه‌گدلئه‌كراد كه‌فته‌ جه‌نگ و وه‌رگیریكردن، له‌و وه‌ختیشه‌ مه‌ردمانیگ بوین چه‌ك داشتن كه‌سه‌یلیگیش نارنجه‌ك مولوتۆف ك یه‌یش له‌ ده‌سكرد خوه‌یان بوى و له‌ به‌نزین و پلیته‌ دروسى كردیان و ئاگرى دیان و ته‌قیاده‌و.

ئه‌و جه‌نگه‌ تا ماوه‌ى سێ رووژ وه‌رده‌وام بوى و ده‌بابه‌یل حكوومه‌ت تازه‌ له‌ مه‌یدان نه‌هزه‌ جیگیر بوین و نه‌تویه‌نست له‌وه‌ فیشتر بایده‌ نوا، یه‌یش له‌وه‌ختیگ ك سه‌رباز و پیاوه‌یل پۆلیس له‌و دیمه‌و له‌ نزیك بنگه‌ى پۆلیس باب شێخ ئاماده‌باش وسیاوین.

وه‌ختیگ ك ئه‌و روى وه‌ڕوى بوینه‌ وه‌رده‌وام بوى، دى كوده‌تاكاره‌یل سه‌بریان نه‌مه‌ندو ژنه‌فتیم ك حكوومه‌ت تازه‌ خوازیار بوردمانكردن عه‌گدلئه‌كراده‌ وه‌ ته‌یاره‌، یه‌كسه‌ر بڕیگ له‌ ده‌مچه‌رمگه‌یل ناوچه‌گه‌ تاودان وه‌ره‌و حسه‌ینیه‌ى شێخ مسته‌فا ئه‌را ئه‌وه‌ك له‌ى باوه‌ته‌و راى شێخ وه‌ربگرن و بزانن چه‌ بكه‌ن له‌ى حاڵه‌ته‌؟

گشت ئه‌و ده‌مچه‌رمگه‌یله‌ گرده‌و بوین و ته‌ماشا كردن كوده‌تاكاره‌یل فریه‌ دڵسه‌خت و فاشیزمن و هویچ چشتیگ ناتویه‌نید نواى ئه‌و كاره‌ له‌لیان بگریدو له‌وه‌رجه‌ ئه‌وه‌یش وه‌ كه‌میگ ته‌له‌فزیۆن عراقى نمایشیگ له‌سێداره‌داین عه‌بدلكه‌ریم قاسم و گه‌مه‌كردن وه‌ ته‌رمه‌گه‌ى بڵاو كردوید، هه‌ر وه‌و خاتریشه‌ شێخ مسته‌فا پیشنیار ئه‌وه‌ كرد وه‌ ئه‌ركیگ ئاشتیانه‌ روى بكه‌نه‌ بنگه‌ى پۆلیس باب شێخ و داوا له‌ وه‌ڕیه‌وبه‌ر پۆلیسه‌گه‌ بكه‌ن نامه‌یگ ك شێخ نویساویده‌ له‌ مه‌ردم عه‌گدلئه‌كراده‌و بڕه‌سنیده‌ حكوومه‌ت ئه‌را وساننه‌وه‌ى ئه‌و جه‌نگ و كره‌وه‌یله‌، چوینگه‌ عه‌گدلئه‌كراد ژن و مناڵ و پیاگه‌یل وه‌ ساڵاچگ له‌تى نیشته‌جیه‌و شه‌ریعه‌ت ئسلام و باوه‌ڕ ئنسانیه‌تیش رى وه‌ى جووره‌ تاوانه‌یلیگ نایه‌ید ده‌رهه‌ق ژن و مناڵ و پیره‌یل په‌ككه‌فتگ و ته‌نانه‌ت ده‌رهه‌ق هویچ كه‌سیگ تریش.

دى ئه‌وه‌ بوى مه‌ردمه‌گه‌یش رازى بوین له‌بان پیشنیار شێخ مسته‌فاو داوا له‌لى كردن خوه‌یشى بچوود وه‌لیاناو نامه‌گه‌ بیاده‌ وه‌ڕیه‌وبه‌ر پۆلیس باب شێخ تا بڕه‌سنیده‌ى حكوومه‌ت تازه‌، هه‌ر وه‌و خاتریشه‌ شێخ مسته‌فا كه‌فته‌ نواى مه‌ردمه‌گه‌و روى كردنه‌ بنگه‌ى پۆلیس باب شێخ و قسه‌ وه‌ل وه‌ڕیه‌وبه‌ر پۆلیس كردو داوا له‌لى كرد وه‌ تلیفۆن قسه‌ وه‌ل وه‌رپرسه‌یل حكوومه‌ت بكاو داوا له‌لیان كرد رى نه‌یه‌ن ئیچنه‌ تاوانه‌یلیگ ده‌رهه‌ق مه‌ردم ناوچه‌ى عه‌گدلئه‌كراد ئه‌نجام بگرید.

دویاخر ئه‌وه‌ بوى كوده‌تاكاره‌یل واز هاوردن، وه‌لى دى نازانیم له‌وه‌ر هه‌ڕه‌شه‌ى مه‌ردم و كه‌مه‌وبوین ته‌قه‌مه‌نى یا له‌وه‌ر فشار و داواكارى مه‌ردم ناوچه‌گه‌، دى كوده‌تاكاره‌یل عه‌گدلئه‌كراد هیشتنه‌جى، وه‌لى له‌ شوون ئه‌وه‌ پیاوه‌یل پۆلیس و سوپا ك وه‌پیان وتیان"حه‌ره‌س قه‌ومى"روى كردنه‌ ناوچه‌گه‌و بڕیگ له‌ جایه‌ڵ جوانه‌یل ناوچه‌گه‌ ده‌سگیر كردن و ره‌وانه‌یان كردن ئه‌را زیندانیگ له‌ "پشت سه‌ده‌" ك نزیكه‌ له‌ به‌غدا.

عه‌لى شێخ مسته‌فا

ج . أ