ئاره‌زووه‌یلمان له‌ى ساڵه‌

شفق نيوز

وه‌رده‌وامیگه‌و هه‌ر له‌ساڵه‌یل هه‌فتاى وه‌رینه‌وه‌ هاته‌ تویشمانه‌وه‌ له‌وه‌ختى مه‌ردم وه‌ به‌له‌مرك ده‌ڵه‌ك یه‌كترى دیان و ده‌س نیانه‌ یه‌كتریه‌وه‌ له‌وه‌ر خاتر چوار یا په‌نج خایه‌، یا وه‌ختى سوار سه‌یاره‌ى (پاس ریم) بویایم و چل و شه‌ش ته‌خت له‌تى بوى و باقى مه‌ردمه‌گه‌ كه‌ڵه‌كه‌ كردیانه‌ بان یه‌كترى و گشتیان ده‌ڵه‌ك یه‌كترى دیان له‌وه‌رخاتر ئه‌وه‌ك شوونیگ  په‌یا بكه‌ن و له‌تى بووه‌سیه‌نه‌ پاوه‌ یا بنیشن، یا وه‌خته‌یلیگ  ك مه‌ردم له‌ناو گراجه‌یل له‌شوون سه‌یاره‌ تاو دیان تا شوونیگ  بكه‌فیگه‌ ده‌سیان و بچیاتانه‌وه‌ ئه‌را شاره‌یل خوه‌یان، بیجگه‌ ئه‌وه‌یش جه‌نگه‌یل و كوشتن هه‌زاره‌ها مه‌ردم بیتاوان له‌تى تا ڕه‌سیه‌ مه‌رگ په‌تى له‌ ته‌قینه‌وه‌یل و كاره‌یل تون وتیژى دویاى ساڵ 2003 ك ئویشن ئازادى هاوردیمنه‌، وه‌لى ژیان به‌خته‌وه‌ر و ئاسایش وه‌پیمان نه‌یانه‌.

تا ئیسه‌ كیشه‌یل ئیمه‌ چاره‌سه‌ر نه‌كریاگه‌و دیاره‌ وه‌ى نزیكه‌یلیشه‌ چاره‌سه‌ریگ نه‌یریگ، مه‌سه‌له‌ى قه‌یران نیشته‌جیبوین(ازمه‌ السكن) بیجگه‌ ماوه‌ى حوكم سه‌رۆك وه‌زیره‌یل وه‌رین عه‌بدولكه‌ریم قاسم ك پارچه‌ زه‌ویه‌یلیگ  دابه‌ش كرده‌ بان هاووڵاتیه‌یلا، تائیسه‌یش ئه‌و قه‌یرانه‌ چاره‌سه‌ر بنه‌ڕه‌تى ئه‌ڕاى نه‌كریاگه‌و فره‌یگ  له‌ ماڵه‌یل ستوینى(شقق سكنیه‌)له‌ژیر سایه‌ى رژیم وه‌رین تایبه‌ت كریان ئه‌را عه‌ره‌به‌یل په‌نابه‌ر و عراقیه‌یلیش بیبه‌ش بوین له‌لى.

دویاى ساڵ 2003یش، هاووڵاتیه‌یل عراقى هویچ چشتیگ  له‌و قه‌وڵه‌یله‌ وه‌چه‌و نه‌ین ك وه‌رپرسه‌یل دانه‌ى له‌بان مه‌سه‌له‌ى نیشته‌جیبوین، ك ڕووژانه‌ باس له‌ پرووسه‌یل نیشته‌جى فره‌یگ  كردیان و له‌هه‌مان وه‌خت وتیان بایه‌سه‌ ركابه‌رى یا مونافسه‌ى ده‌وڵه‌ته‌یل پیشكه‌فتگ  بكه‌یم، ك زیاتر له‌ هه‌فت ساڵه‌ له‌ى قسه‌یله‌ كه‌ن و هه‌ر وتیان فه‌قیر بایه‌سه‌ ماڵ وه‌پى بدریه‌یگ، وه‌لى ده‌ره‌نجامیش سیاسیه‌یل بوینه‌ خاوه‌ن ماڵ له‌هه‌ر ناوچه‌یگ  خوه‌یان بتوان و فه‌قیره‌یلیش هه‌ر وه‌و حاڵه‌وه‌ مه‌ندن. یه‌یش له‌وه‌ختیگه‌ ك وه‌رپرسه‌یل باس له‌ غیره‌ت و شه‌ره‌ف و ده‌سپاكى و ئه‌خلاق و ڕوى وه‌ڕوى بوینه‌وه‌ى گه‌ناته‌كارى كه‌ن و نه‌یتوان شوون نیشته‌جى هاووڵاتیه‌یل دابین بكه‌ن و ماڵه‌یل و شاره‌یل خوه‌شگوزرانى و به‌خته‌وه‌رى ئه‌ڕایان دروس بكه‌ن، ك یه‌یش یه‌كیگه‌ له‌ئاره‌زووه‌یل هاووڵاتى و حكوومه‌ته‌یل یه‌ك له‌شوون یه‌ك جى وه‌جى نه‌كردن ك هه‌رچه‌نى دابینكردنى له‌ڕوى دارایى و ئنسانیه‌وه‌ ئاسانه‌و زوى ئه‌نجام دریه‌یگ.

ئه‌وه‌سه‌ دى هاووڵاتى وه‌ژان خوه‌ى زانیگ و له‌هه‌مان وه‌خت زانست قسه‌كردن له‌بان دیموكراسى و ئازادى هویچ مه‌عنایگ  نه‌یریگ  له‌وه‌ختى بیبه‌ش كریه‌ن له‌ هه‌وه‌جه‌یل ژیان و ئاینده‌ى ڕوڵه‌یلیان و له‌یوا وه‌پیان هاتگه‌ هویچ متمانه‌یگ  نه‌یاشتوون وه‌ پرووسه‌ى سیاسى ئه‌گه‌ر بایگ و ئاره‌زووه‌یلیان جى وه‌جى نه‌كریه‌یگ.

ئمجا ئایا چ وه‌ربه‌سیگ  نیه‌یلیگ وه‌رپرسه‌یل جى وه‌جى ئه‌و به‌رنامه‌یله‌ بكه‌ن ك قه‌وڵى دانه‌ هاووڵاتیه‌یل، ئایا له‌ساڵ تازه‌ چشته‌یل تازه‌یگ وه‌ كرده‌وه‌ دوینیم له‌وانه‌ك سیاسیه‌یل باسى كردن و قه‌ڵى دان؟