مه‌ینه‌تى كورده‌یل فه‌یلى كووتایى نه‌یرى

شفق نيوز

نه‌یاشت له‌ ڕمانن ڕژیم دیكتاتۆرى وه‌رین، نه‌ له‌وه‌ر ئه‌وه‌ ك ئه‌و پیكهاته‌گانتر ملله‌ت عیراق، خودانه‌خواسه‌، دووس ئه‌و ڕژیمه‌ داشتنه‌، یا به‌رژه‌وه‌ندییگ وه‌لیه‌و داشتنه‌ و خوازیار وه‌رده‌وامبوینى بوینه‌، چوینكه‌ ئه‌و ڕژیمه‌ ئه‌وه‌نه‌ كرده‌وه‌ى سته‌مكارانه‌ و تاوانه‌یل بى شومار دژ ملله‌ت عیراق وه‌ گشت چین و پیكهاته‌گانیه‌و ئه‌نجامدا، هویچ دووس ولایه‌نگریگ ئه‌را ڕووژ ته‌نگ خوه‌ى نه‌یشته‌وه‌ و ئه‌وه‌ بوى ك گشتمان وه‌چه‌و خوه‌مان دیمن چوین له‌ یه‌كم ڕووژه‌یل پرووسه‌ى ئازادى عیراق و هاتن هێزه‌یل هاوپه‌یمان وه‌سه‌ركردایه‌تى ئه‌مریكا ئه‌را عیراق، ئه‌و ڕژیمه‌ وه‌و هه‌مكه‌ تواناى چه‌كدارى و سه‌ربازى و ئه‌من و مخابرات و سوپا و سوپاى مللى و فیدائیه‌یل سه‌دام و ئه‌ندامه‌یل حزب به‌عسه‌وه‌ نه‌تویه‌نست ته‌نانه‌ت ئه‌را یه‌ك مانگیش وه‌رگرى له‌ خوه‌ى بكه‌ید و وه‌و شیوه‌ى میلیۆدرامیه‌ ك دیمنه‌ى ڕمیا و بویه‌ به‌شیگ له‌ گوزه‌یشته‌ ك له‌ شوون ڕمیانى هویچ كه‌سیگ شانازى وه‌ هویچیه‌و نیه‌كه‌ید.

وه‌لى پرسیاریگ له‌یرا خوه‌ى نیشانده‌ید، ئایا ئه‌و دڵخوه‌شیه‌ ك كورده‌یل فه‌یلى داشتنه‌ى له‌ جى خوه‌ى بوى و سه‌رده‌م نوو ك وه‌دیموكراتى و شه‌فافیه‌ت و ماف ئاده‌میزاد وه‌سف كریه‌ید، له‌ ئاست خوزیه‌و و ئومید و خواست ملله‌ت عیراق وه‌گشتى و پیكهاته‌ى كورده‌یل فه‌یلى بوى؟

ئیمه‌ له‌یرا نیه‌توایم له‌یرا بوخت بكه‌یمنه‌ هویچ لایه‌ن و هویچ هیزیگ و پارت و كوتله‌ و لیستیگ عیراقى، وه‌لى ئه‌گه‌ر چه‌ویگ گڕ بیه‌یمنه‌ ناو بارووه‌زع گشتى عیراق ئه‌و ڕاسیه‌ ئه‌رامان ده‌ركه‌فید ك سه‌رده‌م دیموكراسى و شه‌فافیه‌ت و ئه‌و باقى چه‌مكه‌یل فره‌ى نووه‌ ك تازه‌ خوه‌یان كردنه‌ مه‌یدان سیاسى و كوومه‌ڵایه‌تى عیراق، ئى سه‌رده‌مه‌ چه‌ وه‌ل خوه‌یه‌و هاورد و چ چشت نوویگ ئه‌را ملله‌ت ئه‌نجامدا؟ به‌ڵگه‌ و شایه‌تیداین فره‌یگ نیه‌تواید ئه‌را ئاشكراكردن ئه‌و هه‌مكه‌ قه‌یران و ئه‌و هه‌مكه‌ كێشه‌ و گیروگرفت سیاسى و ئابوورى و كوومه‌ڵاتیه‌ ك ملله‌ت عیراق وه‌گشتى له‌ ده‌سى ناڵنن و ته‌نیا ئه‌وه‌ به‌سه‌ وه‌رانوه‌ر كه‌ناڵه‌یل ته‌له‌فزیۆنى عیراقى و كوردستانى و عه‌ره‌بى و جه‌هانى بنیشید و ڕووژانه‌ ته‌ماشاى ئه‌و هه‌واڵ و ڕاپۆرت و به‌رنامه‌یل بكه‌ید ك باس له‌و قیران و كیشه‌ و گیروگرفته‌یله‌ كه‌ن و چوین له‌ى باوه‌ت عیراق چه‌ندین كۆد پێوانه‌یى یا ره‌قه‌م قیاسى شكانیه‌ هه‌ر له‌ ماوه‌ى دامه‌زرانن حكوومه‌ته‌و بگره‌ى تا ڕه‌سیده‌ گه‌ناته‌كارى ئیدارى و دارایى ك پله‌یل به‌رزیگ له‌ ناو لیست دوڵه‌ته‌یل گه‌ناته‌كار جه‌هانى ڕزه‌یل پیش گردیه‌.

وه‌لى چوینكه‌ زه‌ره‌د ئى قه‌یرانه‌یل گشتیه‌ و مه‌ردم عیراق گشتى وه‌ده‌سیانه‌و ناڵنن ، فره‌ باسى نیه‌كه‌یمن چوینكه‌ ئه‌وه‌گ له‌ كه‌ناڵه‌یل ڕه‌سانن جووراوجوور باسیان فره‌ كردنه‌... ئه‌وه‌گ له‌یرا توایمن باسى بكه‌یمن ئه‌و كێشه‌و گیروگرفته‌یله‌سه‌ ك په‌یوه‌ندى وه‌ چین كورد فه‌یلیه‌و دیرى ك له‌ى ماوه‌ى هه‌فت ساڵه‌ له‌ شوون ڕمیان ڕژیم وه‌رین هیمان مه‌ینه‌تیه‌گانیان وه‌ك خوه‌یان مه‌ننه‌، سه‌ربار ئه‌و فشار ده‌روینى و گیروگرفت ده‌روینیه‌ ك زیاتر تویشى هاتنه‌ ، چوینكه‌ یانه‌ له‌ سه‌رده‌م ڕژیم وه‌رین ته‌نیا یه‌ك داخ داشتن ئه‌ویش ئه‌وه‌ بوى ك ڕژیم وه‌رین وه‌و شیوه‌ى دڕندانه‌ وه‌لیانه‌ مامڵه‌ت كرد و تاوانه‌یل كه‌م وینه‌یگ دژیان ئه‌نجامدا، وه‌لى له‌ شوون ڕمیان ئه‌و ڕژیمه‌ دڵیان وه‌و لایه‌نه‌یل سیاسیه‌ خوه‌ش بوى ك چاره‌سه‌ركردن كێشه‌ى كورده‌یل فه‌یلى كردوینه‌ شعار و به‌رنامه‌ى خوه‌یان و ئنسافكردن كورده‌یل فه‌یلى خستوینه‌ ڕزه‌یل پیش كارنامه‌ى پارت و لایه‌نه‌یلیان، وه‌لى تا ده‌سیان له‌ ده‌سڵات به‌ن بوى ته‌نانه‌ت له‌ وتار ئعلامى خوه‌یانیش ناو كورد فه‌یلى نیه‌تیه‌رن ته‌نیا له‌و ڕووژه‌یله‌ نه‌ود ك هه‌ڵوژاردنه‌یل په‌رله‌مانى و مه‌حه‌لى نزیكه‌و بوون ئه‌را خه‌ڵه‌تانن جه‌ماوه‌ر وه‌گشتى و كورده‌یل فه‌یلى وه‌تایبه‌تى.

شایه‌ت پرسیار بكه‌ین ك ئى ڕاسیه‌ ئمڕوو له‌ لاى گشت كه‌سیگ ئاشكرایه‌ و چشت نوویگ له‌ى وتاره‌ وه‌دى نیه‌كریه‌ید؟ و له‌ جوواویشا ئویشیم له‌ عیراق له‌ سه‌ره‌تاى دامه‌زرانن حكوومه‌ت و سسته‌م حوكمڕانى نوو، وه‌زاره‌تیگ دامه‌رزیا وه‌ناو وه‌زاره‌ت كووچكه‌ره‌یل و كووچوه‌پیكریایه‌یل وه‌تایبه‌تى ئه‌را وه‌شوون كه‌فتن ئه‌و كووچكه‌ر و كووچوه‌پیكریایه‌یله‌ ك له‌سه‌رده‌م ڕژیم وه‌رین تویش ئه‌و تاوانه‌یله‌ هاتنه‌ و له‌ نوواى گشتیان كورده‌یل فه‌یلى ... ئه‌وه‌سه‌ ئیمه‌ هایمنه‌ سه‌ره‌تاى ساڵ 2011 و هیمان زوورمى كورده‌یل فه‌یلى كووچوه‌پیكریاى هانه‌ وڵاته‌یل غه‌ریبى و وه‌ ده‌س غه‌ریبى و مه‌ینه‌تى غه‌ریبیه‌وه‌ ناڵنن و كه‌سیش وه‌هانایانه‌و نیه‌چوود.

وه‌ى چه‌ن ڕووژ دویاییشه‌ هه‌واڵه‌یل ده‌نگ هاوار ئه‌و كورده‌یل فه‌یلیه‌ ڕه‌سانه‌ گووشمان ك له‌ ئوردگایه‌یل ئیران یه‌ زیاتر له‌ سى ساڵه‌ وه‌غه‌ریبى و مه‌ینه‌تى ژیه‌ن و وه‌ى دویاییه‌ تویش مه‌ینه‌تى گه‌وراتریگ هاتنه‌ ك ئه‌ویش له‌ شوون قه‌یران ئابوورى و سزایه‌یل ناوده‌وڵه‌تى له‌ بان ئیران له‌وه‌ر به‌رنامه‌ ئه‌تۆمیه‌گه‌ى هات نرخ كاڵا خوراك و خزمه‌تگوزاریه‌یل به‌رزه‌و كرد وه‌لى له‌ هه‌مان وه‌خت وه‌ چه‌ن ئجرائاتیگ پشتگیرى له‌ چه‌ن چینیگ ملله‌ته‌گه‌ى خوه‌ى كرد، وه‌لى ئه‌و كورده‌یل فه‌یلى كووچوه‌پیكریایه‌ ئه‌و ئیجرائاته‌ نیه‌گریده‌یانه‌وه‌ و له‌ى وه‌خته‌ سه‌ربار غه‌ریبى و مه‌ینه‌تى ڕووژانه‌ى دویرى له‌ نیشتمان، وه‌ده‌س قاتى و گرانى و كه‌مده‌سیه‌وه‌ ناڵنن و كه‌سیش وه‌هانایانه‌و نیه‌تیه‌ید، و وه‌زاره‌ت كووچوه‌پیكریایه‌یل و حكوومه‌ت ناوه‌ندى وه‌ك شار خامووشان كشه‌ى خه‌ویان تیه‌ید و خه‌ریك خه‌و خوه‌ش خوه‌یانن و ته‌نانه‌ت سه‌فاره‌ت عیراقیش له‌ ئیران وه‌گووره‌ى هه‌واڵه‌یل هویچ خه‌وه‌ریگ له‌ى چین زوڵملیكریایه‌ نه‌یرید!!.

ئیمه‌یش ده‌نگ خوه‌مان خه‌یمنه‌ پاڵ ده‌نگ ئه‌و مه‌ردم بیكه‌س و غه‌ریبه‌ و داواى منه‌ت له‌ هویچ كه‌سیگ نیه‌كه‌یمن وه‌لى داواى هه‌ق ئه‌و مه‌ردمه‌ كه‌یمن ك چینیگ عیراقى ڕه‌سه‌نن و له‌سه‌ر هه‌ڵوێسته‌یل نیشتمانى و نه‌ته‌وه‌یى ئازایانه‌ى خوه‌یان له‌لایه‌ن ڕژیم وه‌رین تویش كوشتن و بڕین و زه‌فتكردن ماڵوموڵك و بى شوون ونوینكردن هه‌زاران جایڵ جوانیان هاتن و ئه‌و پارت و ئه‌و لایه‌نه‌یله‌ ك سازش له‌بان كێشه‌گه‌یان كردن و وه‌رجله‌ ڕمیان ڕژیم وه‌شیوه‌یگ سیاسیانه‌ وه‌كارى هاوردن و له‌ شوون ڕمیانیشى ئه‌را به‌رژه‌وه‌ندیه‌یل هه‌ڵوژاردن وه‌كارى هاوردن و ئیسه‌ ك شوونه‌یل خوه‌یان قایم كردنه‌، دى كورده‌یل فه‌یلى ئاواره‌ فه‌رامووش كردنه‌ و تا ئى وه‌ختیشه‌ هویچ كاریگ ئه‌رایان نه‌كردنه‌ ك ڕاسگوویى  خوه‌یان وه‌پى سابت بكه‌ن و مه‌ینه‌تى و به‌دبه‌ختى ئى چینه‌ وه‌رده‌وامه‌ و چاره‌نویس خوه‌یان و نه‌وه‌یل دویاڕووژیانیش نادیاره‌ و كه‌فتنه‌سه‌ مه‌ترسى گه‌ورایگ.

 

ماجد سوره‌مێرى