وه‌زع سياسی عراق هه‌وه‌جه‌ وه‌يه‌كهه‌ڵويستی كورد ديرێ

شفق نيوز

وه‌يه‌يش له‌لايگه‌وه‌ هس كريه‌يگ ك وه‌زع سياسی ئی ولاته‌ وه‌ره‌و سه‌ختی چوود و بی ئوميدی گشت ئه‌و لايه‌ن وهيزه‌يل سياسيه‌ بوی ك هه‌ول وه‌رده‌وام ده‌ن پرووسه‌ی سياسی عراق وه‌ره‌و مه‌ركه‌زيه‌ت و دكتاتۆريه‌ت بووه‌ن . وه‌ختيگيش ئيمه‌ باس له‌سه‌ختبوين وه‌زع سياسی عراق كه‌يم وه‌و مه‌عنا ك له‌ناو پرووسه‌ی سياسی عراق ئه‌قڵيه‌ت ديموكراسخوازی كزه‌و بڕيار له‌لايه‌ن سستمه‌ سياسی و دكتاتۆری و شمووليه‌يل ناوچه‌گه‌وه‌ له‌بان پرووسه‌ی سياسی عراق دريه‌يگ نه‌ك خود لايه‌نه‌يل سياسی عه‌ره‌بی وه‌شيعه‌و سونيه‌وه‌ ك خاوه‌ن ئيراده‌ی سياسی خوه‌يان بوون ، چوينكه‌ هه‌ردوگلايه‌ن عه‌ره‌بی له‌ناوڕاس و باشوور ئی وڵاته‌ به‌شبه‌شه‌و بوينه‌ له‌بان دو ئاراسته‌ی سياسی و مه‌زه‌وی جياواز له‌ناوخود عراق و ئه‌نجامه‌يل هه‌ڵوژاردن ئی جاره‌يشه‌ وه‌جووريگه‌ ك هويچ لايه‌نيگ وه‌ته‌نيا نيه‌تويه‌نيگ حكوومه‌ت ئاينده‌ی ئی وڵاته‌ پيك باريگ ، يه‌يش ئه‌وه‌ له‌لی كه‌فيگه‌وه‌ ك پايه‌و سه‌نگ هه‌رێم كوردستان بته‌وتره‌و بووگ و بووگه‌ فاكته‌ريگ سه‌ره‌كی له‌پيكهاته‌يل حكوومه‌ت عراق .

له‌باوه‌ت مه‌سه‌له‌ی هاوپه‌يمانيكردنيش ، بايه‌سه‌ سه‌ركردايه‌تی سياسی هه‌رێم كوردستان وه‌ل ئه‌و لايه‌نه‌يلا ريك بكه‌فيگ ك هويروئه‌ڕای چوينيان له‌ هويروئه‌ڕای چوين كورده‌وه‌ نزيكه‌ وه‌تايبه‌ت له‌بان مه‌سه‌له‌ی فيدراڵيه‌ت و باوه‌ڕكردن وه‌ بنه‌مايه‌يل ده‌ستوور هه‌ميشه‌يی عراق و جی وه‌جيكردن مادده‌ی ١٤٠ ئی ده‌ستووره‌ ك هه‌رچه‌نی له‌عراق ئاينده‌ دگانناين وه‌ هه‌قه‌يل ره‌وای ملله‌ت كوردستان كاريگ ئاسان نيه‌ ، چوينكه‌ ژينگه‌ی سياسی ده‌وروه‌ر ئی وڵاته‌ وه‌جووريگه‌ له‌دژ هه‌قه‌يل ملله‌ته‌گه‌مان و يه‌يش خوه‌ی له‌خوه‌ی مه‌ترسی گه‌ورايگه‌ له‌بان ئامانجه‌يل سياسی ملله‌ته‌گه‌مان . هه‌ر له‌وه‌ر ئه‌وه‌يش مامڵه‌كردن وه‌ل ئی جووره‌ وه‌زعيگ سياسيه‌وه‌ هه‌وه‌جه‌ وه‌ ئاگاداری و هوشيارييگ سياسی و دبلۆماسی بته‌ويگ ديريگ تا جووريگ له‌هاوپه‌يمانێتی له‌لی په‌يا بووگ و له‌به‌رژه‌وه‌ندی هه‌رێم كوردستان بووگ ، وه‌لی ئه‌وه‌ك ئيسه‌ فره‌ گرينگ ياموهمه‌و باس له‌لی كريه‌يگ پيكهاوردن حكوومه‌تيگ وه‌رفراوانه‌ له‌عراق ئاينده‌و ئه‌گه‌ر بايگ و ئه‌يه‌ بكريه‌يگ له‌قوناغ ئيسه‌ شايه‌ت له‌به‌رژه‌وه‌ندی عراقه‌ وه‌شيوه‌يگ گشتی و هه‌مان وه‌خت مه‌ترسيه‌يل بان عراقيش كه‌مه‌و بووگ ، چوينكه‌ ئه‌گه‌ر بايگ و هه‌ر لايه‌نيگ ئه‌و لايه‌نه‌گه‌ی تر دويره‌و بخه‌يگ ، ئه‌وه‌ كاره‌گه‌ ده‌رئه‌نجام خراويگ له‌لی كه‌فيگه‌وه‌و عراق وه‌ره‌و ئاراسته‌يگ خه‌ته‌رناك گام نه‌يگ و هه‌مان وه‌خت وه‌زع سياسی ئی وڵاته‌ شيويه‌يگ و نائاسايی بووگه‌وه‌ ، وه‌لی له‌باوه‌ت وه‌زع سياسی هه‌رێم كوردستان و چوينيه‌تی روی وه‌ڕوی بوينه‌وه‌ی رويداگه‌يل ، ئيسه‌ مايه‌ی خوه‌شحاڵيه‌ ك ليست و قه‌واره‌يل سياسی كوردستان دويای گفتوگووكردن له‌بان ريكه‌وخستن ماڵ كورد ره‌سينه‌ ئه‌و ئه‌نجامه‌ ك وه‌يه‌كه‌وه‌ هاوده‌نگ و هاوهه‌ڵويست بچنه‌ به‌غداو ريزدار جه‌لال تاڵه‌بانی دوباره‌ وه‌سه‌رۆكايه‌تی كوومار هه‌ڵوژنن و لوجنه‌يگيش دروس بكه‌ن ئه‌را گفتوگووكردن وه‌ل قه‌واره‌يل سه‌ركه‌فتگ عه‌ره‌با ، ك يه‌يش چووگه‌وه‌ ئه‌را سياسه‌ت حه‌كيمانه‌ی ريزدار سه‌رۆك هه‌رێم كوردستان .