هەرێم‮ ‬كوردستان‮.. نموونەی‮ ‬وه‌يه‌كه‌وژيان و دیموكراسی‮ لە ناوچەگە

شفق نيوز

كورد له‌ ماوه‌ی چه‌ن ساڵ گوزه‌يشت له‌ ئاكام ئه‌و شه‌پۆل ئالشتكاری گورجه‌ ك خوه‌رهه‌ڵات ناوين گرته‌سه‌و وازيزان خاس و چه‌و وازيگ بويه‌و تويه‌نستگه‌ ده‌رفته‌يل بخوه‌نيده‌وه‌و نه‌ف له‌ليان وه‌ربگريد.

له‌ هه‌رێم كوردستان ئه‌زموونيگ سه‌ركه‌فتگ حوكمڕانی هه‌س، وه‌ شيوه‌يگ ك گشت جه‌هان سه‌رسام كردگه‌، ئمجا هه‌رچه‌نی جه‌نگ كورد كه‌فته‌سه‌ ‌ناو ئاگر جه‌نگيگ وه‌رده‌وام خوه‌رهه‌ڵات ناوين، وه‌لی تويه‌نستگه‌ وه‌ كه‌مترين زه‌ره‌د و فيشترين قانجازه‌و مقه‌يه‌تی له‌ به‌رژه‌وه‌نديه‌يل خوه‌ی بكا له‌ ناوچه‌گه‌.

بيجگه‌ گشت ئه‌و كيشه‌و گرفته‌يله‌ ك له‌ ماوه‌ی ٢٣ ساڵ گوزه‌يشت روی وه‌ڕوی ده‌سڵاتدار حكوومه‌ت هه‌رێم كوردستان بويه‌سه‌و، وه‌لی وه‌ل ئه‌وه‌يشا كورد پاداگر بويه‌ له‌بان وه‌ده‌سهاوردن و چه‌سپانن مافه‌يل ملله‌ت كوردستان و له‌ گشت ئه‌و تاقيكردن و پيلانه‌يله‌ ك ده‌رهه‌ق وه‌ باشوور كوردستان و حكوومه‌ت هه‌رێم جيوه‌جی كريان، وه‌ سه‌ركه‌فتگی و سه‌رفرازی تويه‌نست بويشيده‌ دووس و دوشمنه‌يلی ك ملله‌ت كوردستان له‌وه‌ر خاتر ره‌سين وه‌ ئامانجه‌يلی ئاماده‌س قوربانی بيه‌يد و روی وه‌ڕوی سزای ئابووری و مووچه‌بڕين و چه‌نه‌ها كيشه‌يل تر بدێ، ك وه‌ل ئه‌وه‌يشا گه‌ورايی و سه‌ربه‌رزی ملله‌ت كوردستان وه‌رجه‌ گشت چشتيگ گرينگتره‌ ئه‌را ملله‌ت كورد.

ئی باره‌ ك ئيسه‌ په‌يا بويه‌ كاريگه‌ريه‌گه‌ی سسه‌و بويه‌، كوردستان هه‌رێميگ ده‌وڵه‌مه‌ن وه‌ سامان سروشتی و خاكيگ وه‌پيت ديريد ئه‌را كشتوكاڵ و له‌ هه‌مان وه‌خت پايه‌يگ جوگرافی خاسيش ديريد ئه‌را گه‌شتوگوزار، ك يه‌يش له‌يوا ئه‌كا كومپانيايه‌يل ئۆرپی خواست وه‌به‌رهاوردن داشتوون و بانه‌ ناو كوردستان و كار بكه‌ن.

ئيسه‌يش هه‌رێم كوردستان پايه‌يگ گرينگ ديريد له‌ خوه‌رهه‌ڵات ناوين، هه‌ر وه‌و خاتريشه‌ له‌ده‌سداين ئی هه‌رێمه‌ ئه‌دێده‌ هووكار شكه‌ست سياسه‌ت ئۆرپاو ئه‌مريكا له‌ی ناوچه‌، هه‌رێم كوردستان تويه‌نستگه‌ له‌و ماوه‌ی حوكمڕانيه‌ ك ئه‌نجامی داگه‌ وه‌ ئيسه‌يشه‌و بدێده‌ نموونه‌ی وه‌يه‌كه‌وژيان و ديموكراسی له‌ خوه‌رهه‌ڵات ناوين، ك هه‌ر ئه‌وه‌يش له‌يوا كرد بتويه‌نيد وه‌ تونی له‌ روی وه‌ڕوی ترۆريسته‌يل داعش بووسيه‌يد.

رێبوار حه‌مه‌لاو شوانی

ج . أ