كورده‌یل فه‌یلى تاكه‌ى هاووڵاتى پله‌ دو بوون؟

شفق نيوز

 

جه‌ناب وه‌زیر جواد قه‌دردار

سڵام و ره‌حمه‌ت خودا له‌لیدان

 

من پرسیاره‌یل فره‌یگ دیرم وه‌لى تواناى ده‌رخستنیان نه‌یاشتم له‌وه‌ختیگ جه‌نابد پایه‌ى وه‌رپرسیاریه‌تى داشتید، وه‌لى ئیسه‌ باوه‌ڕم ئه‌وه‌سه‌ ك تواناى پرسیاركردن دیرم له‌لیدان وه‌تایبه‌ت دویاى وازهاوردندان له‌و پۆسته‌و ده‌سوه‌پیكردن نویسانن ك یه‌یش ئاڵشتكارییگ له‌تى دوینم له‌هه‌ڵوێستدان ك ئه‌ویش ئاڵشتكردن سروشتیه‌ له‌ناونى ئه‌وه‌ك له‌ژێر فشار پایه‌گه‌ بوى و له‌ناونى ئه‌وه‌ك قورتار بوى له‌ زه‌نجیر رێككه‌فتنه‌یل و تواناى نویسانن دیرێد وه‌ ئازادو منیش پرسیاره‌گه‌م له‌باوه‌ت ناسنامه‌ى كورده‌یل فه‌یلیه‌.

 

من خاس زانم ك ئى دۆسیه‌ كویه‌نه‌سه‌و زانم ك فره‌یگ له‌ لایه‌نه‌یل سیاسى پشتگووشى خستنه‌و ته‌نانه‌ت جیوه‌جیكردن رێنمایه‌یل سه‌رۆك وه‌زیره‌یلیش له‌ى باوه‌ته‌و سه‌خته‌و بویه‌و نازانم ئه‌راچه‌ له‌وه‌ختیگ كوردیگ فه‌یلى داواى شه‌هاده‌ جنسیه‌ى عراقى ئه‌كا نیشانه‌ى تایبه‌تیگ ئه‌راى دیارى كه‌ن جوور هاووڵاتى پله‌ دو یا له‌وه‌ختیگ ئاڵشت ناسنامه‌گه‌ى ئه‌كاو ره‌سمه‌گه‌ى كویه‌نه‌سه‌و ره‌سم مناڵییه‌و ئه‌خوازێد تازه‌یه‌و بكاد بایه‌سه‌ ئه‌و داواكاریه‌ له‌ڕێ كونسوڵخانه‌ى ده‌ره‌كیه‌و ئه‌نجام بگرێدو دویاى ساڵیگ جوواو داواكاریه‌یل ئه‌یه‌ێده‌و وه‌ پۆست یا به‌رید دبلۆماسى ئه‌را وه‌پیداین ئه‌و ناسنامه‌ وه‌گشت ئه‌وانه‌ك داواكارى پێشكه‌ش كردنه‌، وه‌لى ناسنامه‌ى ئه‌و كورد فه‌یلیه‌ له‌تیان نیه‌و ده‌رنیه‌چوود ئه‌ڕاى؟ ئایا زوڵم له‌یه‌ زیاتر چه‌ بوود، جوور ئه‌مانه‌تیگ تاریخى پرسیار له‌لیدان كه‌م و چه‌وه‌ڕێ جوواودانم ك ئایا واران ره‌حمه‌ت كه‌ى له‌لیمان وارێد، وه‌هه‌ر حاڵ فره‌ سوپاس ئه‌ڕادان.

د. سامان فه‌یلى.

 

ئیچنه‌ بزانم من زیاتر له‌ جاریگ ئه‌را سه‌رۆكایه‌تى وه‌زیره‌یل نویسامه‌، وه‌لى هویچ بریار و جوواویگ نه‌یاسه‌و، یه‌یش له‌ وه‌ختیگ ك ده‌ستوور ئویشێد گشت عراقیه‌یل له‌ هه‌ق و ئه‌ركه‌یل یه‌كسانن، ئه‌ى دى له‌وه‌رچه‌ فه‌یلیه‌یل له‌ كه‌مترین هه‌قه‌یلیان بیبه‌ش كریه‌ن؟ ئه‌راچه‌ به‌ش له‌ كورسیه‌یل په‌رله‌مان نه‌یرن جوور باقى كه‌مینه‌یل تر ؟ ئه‌یه‌و ده‌یه‌ها پرسیاره‌یل تر، وه‌لى كى زه‌مانه‌ت جوواوداین خوه‌ى ئه‌كاو ئاشكرا قسه‌ ئه‌كاو عراقیه‌ت فه‌یلیه‌یل ئسبات ئه‌كا، ك ئیمه‌ خاس زانیم كورده‌یل فه‌یلى له‌ عراقیه‌یل ره‌سه‌نن و خزمه‌ت فره‌یگ پێشكه‌ش كردنه‌سه‌ ئى عراقه‌ و قوربانیه‌یل فره‌یگیش ئه‌راى دانه‌ و جى رێز و حورمه‌تن.

 

وه‌زع كورده‌یل فه‌یلى بایه‌سه‌ خاسه‌و بكریه‌ێد وه‌بى دویاخستن، یه‌یش نه‌ك ته‌نیا له‌ بوار هاووڵاتیبوین، به‌ڵكوو وه‌ قه‌ره‌بووكردنیان له‌بان ئه‌و هه‌مگه‌ زه‌ره‌ده‌یله‌ ك وه‌پیان ره‌سیه‌ له‌لایه‌ن رژیم وه‌رینه‌و، بایه‌سه‌ گشت ئه‌و ماڵ و موڵكه‌یلیانه‌ ك وه‌ زوور له‌لیان زه‌فت كریا ئه‌رایان باریه‌ێده‌و، بایه‌سه‌ بڕیاریگ له‌ به‌رزترین ده‌سڵاته‌و ده‌رچوود ئه‌را راسه‌وكردن ئى بار سه‌خته‌ ك له‌تى ژیه‌ن.

 

من وه‌گووره‌ى پله‌وپایه‌ى خوه‌م ك له‌وه‌ختیگ وه‌زیر ناوخوه‌ى بویم، چه‌ن بریاریگ ده‌ركردم ئه‌را راسه‌وكردن بار كورده‌یل فه‌یلى و لیژنه‌یگ له‌ى باوه‌ته‌و دامه‌زرانم  و ئه‌را ماوه‌ى شه‌ش مانگ كار خوه‌ى ئه‌نجامدا، یه‌یش بیجگه‌ دیدار وه‌ل سه‌رۆك هووزه‌یل و هاووڵاتیه‌یل و رووشنهویره‌یل فه‌یلى.

 

ئمجا دویاى له‌یه‌كه‌وداین گشت دۆسیه‌و یاسایه‌یل، ئى لیژنه‌ چه‌ن رێنماییگ ده‌ركردو منیش رازى بویم له‌بانى جوور فه‌رمانیگ وه‌زاره‌تى و راوێژكار یاساییش رازى بوى له‌بانى و هه‌ر له‌بان ئه‌و بنه‌مایشه‌ 135 هه‌زار عراقى له‌ كورده‌یل فه‌یلى ناسنامه‌و شه‌هاده‌ى عراقى وه‌رگرتن، وه‌لى مه‌سه‌له‌گه‌ وه‌ته‌واوى چاره‌سه‌ر نه‌ویه‌و بایه‌سه‌ چه‌ودیرى بكریه‌ێد له‌لایه‌ن حكوومه‌ته‌و ئه‌را چاره‌سه‌ركردن كێشه‌ى كورده‌یل فه‌یلى، ئمجا ها له‌هویرم هه‌ر له‌ى باوه‌ته‌و یه‌كیگ له‌ برایه‌یل فه‌یلى نماز له‌بان ناسنامه‌گه‌ى كرد له‌وه‌ختى وه‌ریگرد، چوینكه‌ به‌ڵگه‌ى نیشتمانیه‌تى ئه‌راى هاته‌و، ك یه‌یش هه‌ق ره‌وایگه‌و له‌لى وه‌ زوڵم و بریار دیكتاتۆریه‌ت بیبه‌ش كریا، ك یه‌یش جه‌خت له‌وه‌ ئه‌كا ك مه‌سه‌له‌ى هاووڵاتیبوین مه‌سه‌له‌ى هه‌ق و ئه‌ركه‌یله‌ له‌ناونى هاووڵاتى و نیشتمان.

 

جواد پۆڵانى

 

ج. ا