له‌ ڕووژ یه‌تیمه‌یل...كورد فه‌یلى یه‌تیم نه‌یرى!!

شفق نيوز

سووز و مهره‌بانى و سه‌رپه‌رشتى باوگ ناهمى كریانه‌، و وه‌ك نه‌ریتیگ كوومه‌ڵایه‌تى ئى ڕووژه‌ كریه‌یده‌ بوونه‌یگ ئه‌را سازداین ئاهه‌نگ و پیشكه‌شكردن ئه‌وه‌گ له‌ توانا بوود ئه‌را ئى مناڵه‌یل بى سه‌رپه‌رشت و ناهمیه‌ له‌ سووز باوگایه‌تى، جوور ئه‌ركیگ ئه‌خلاقى و دینى و كوومه‌ڵایه‌تى ئه‌را سووكه‌وكردن بار گران ژیان و قه‌ره‌بووكردن ئه‌و كه‌لێنه‌ ك باوگه‌یلیان خستنه‌سه‌ى ژیان و دڵ و ده‌روینیان.

هاوزه‌مان وه‌ل ئى بوونه‌وه‌ و له‌ 4 نیسان ساڵ 1980 كورده‌یل فه‌یلى تویش گه‌وراترین و پیسترین تاوان هاتن وه‌ختى ڕژیم شۆفینى به‌عس ده‌سكرده‌ ده‌ركردن و كووچوه‌پیكردن و كوشتن سه‌دان هه‌زار كورد فه‌یلى و زندانیكردن جایڵ و جوانه‌یلیان و ئنجا بى سه‌ر و شوینكردنیان ك دویاخر ئه‌وه‌ ئاشكرابوى ك كریانه‌سه‌ قوربانى تاقیه‌وكردن ئه‌و چه‌كه‌یل كیمیاویه‌ ك دویاخر دژ وه‌ ملله‌ت كوردستان و عیراق و دژ وه‌ له‌شكر ئیران وه‌كارى هاورد له‌ جه‌نگ هه‌یشت ساڵه‌ى كه‌نداو یا خه‌لیج.

ئه‌و جایڵ و جوانه‌یله‌ ك هیمان له‌ عومر گوڵ بوین و زوورمیان باوگ ئه‌و مناڵه‌یله‌ بوین ك وه‌ل داڵگه‌یل بیچاره‌ و داپیر و باپیر به‌دبه‌ختیانه‌و ڕه‌وانه‌ى ئه‌و دیم سنوور یا حدود ئیران كریان و فڕه‌ دریانه‌ ناو كێڵگه‌ یا مه‌یدانه‌یل مین و بڕ فره‌یگیان بوینه‌ قوربانى ته‌قینه‌وه‌ى ئه‌و مینه‌یله‌ ك له‌ ریگه‌یان بوى له‌ كاروان خه‌مینیان وه‌ره‌و دونیاى ئاواره‌یى و غه‌ریبى و بى كه‌سى و ئه‌وانه‌گ مه‌نن هه‌ر له‌و ژیان سه‌خته‌ له‌ ناو ئۆردگایه‌یل ئاواره‌یى ژیان یه‌تیمى خوه‌یان بردنه‌سه‌ر و ڕه‌سینه‌ عومر باڵغى و تا ڕووژ ڕمیان ڕژیم وه‌رین له‌ وه‌هار ساڵ 2003 وه‌ ئه‌وپه‌ڕ ئومیده‌وه‌ هاتنه‌وه‌ ئه‌را وڵات خوه‌یان و چه‌وه‌ڕى ئه‌وه‌ بوین ك وه‌دیده‌ن باوگه‌یلیان شاد و شوكره‌و بوون، وه‌لى وه‌ل هاتنیان تویش شۆك یا سه‌دمه‌ى ئه‌وه‌ هاتن، نه‌ك هه‌ر باوگه‌یلیان وه‌ زنیه‌یى نه‌ینه‌وه‌، به‌ڵكوو خه‌وه‌ر ئه‌وه‌ ڕه‌سیه‌ پیان ك گشتیان كوشیانه‌ و له‌وه‌یشه‌ سه‌خت و گرانتر ئه‌وه‌ بوى ك تا ڕووژ ئمڕوویش ته‌نانه‌ت ته‌رمه‌یلیان نه‌دینه‌سه‌وه‌ ك خه‌وه‌ر ئه‌وه‌ هه‌س خریانه‌سه‌ ناو قه‌ورسانه‌یل وه‌جه‌م، ئه‌و قه‌ورسانه‌یله‌ ك له‌ سه‌رانسه‌ر دووڵ و بیاوانه‌یل عیراق به‌رش وبڵاوه‌و بوینه‌ و هه‌ر لایه‌نیگ كه‌فته‌ شوون ته‌رم و روفات قوربانیه‌یل خوه‌یان، ته‌نیا كورد فه‌یلى نه‌ود ك ڕووڵه‌یل بى سه‌ر و شوونیان تا ئیسه‌یش چاره‌نویسیان نادیاره‌ و كه‌سیش نیه‌تیه‌یده‌ ته‌نگ هاوار و داد و بیدادیان و به‌شداریان نه‌كردنه‌ له‌ به‌رپاكردن پرسه‌یگ ئه‌را ئه‌و ڕووڵه‌یل عه‌زیزیانه‌ وسه‌ره‌خوه‌شى كردن له‌ كه‌س و كاره‌یلیان.

به‌ڵى یه‌تیمه‌یل كورد فه‌یلى گه‌ورا بوین و دى وه‌ ناو یه‌تیم قه‌بوول نیه‌كه‌ن و وه‌ى جووره‌ تویه‌نیم بویشیم كورد فه‌یلى یه‌تیم نه‌یرى، به‌ڵكوو باوگ كوڕ كوشیاى دیرى و داڵگ دڵشكیاى دیرى و براى پشتشكیاى دیرى و خوه‌یشك بى برا دیرى و بیوه‌ژن بى سه‌رپه‌رشت دیرى...

 

ن: ماجد سوره‌مێرى