خێر فه‌يليه‌يل ئه‌را غه‌يره‌خوه‌يانه‌

سه‌عه‌د  فه‌يلى

شه‌فه‌ق نيوز/ ئه‌را ماوه‌ى 20 ساڵه‌ من له‌ بوار هونه‌ر كار ئه‌كه‌م و هه‌ر رووژيگ له‌ خه‌و هه‌ڵئه‌سم و له‌ ده‌روه‌چه‌وه‌ ته‌ماشا ئه‌كه‌م كه‌سوكار و دووسه‌يل فه‌يلييم ئه‌كه‌فێده‌ هويرم و هوير له‌ چونينێتى دڵخوه‌شكردنيان ئه‌كه‌م له‌ڕى دێڕه‌ شيعريگ يا ئاوازيگ مۆسيقى، ئمجا وه‌و وه‌سيله‌يل سه‌ره‌تاييه‌ ك ديريمه‌يان هه‌وڵ دام چشتيگ له‌و رۆڵ خواسته‌ ده‌ربخه‌م جوور خزمه‌تيگ ئه‌را كيشه‌گه‌مان، چوينكه‌ به‌خته‌وه‌رى مه‌گه‌ر وه‌ خوه‌شاڵكردن گشت تاكه‌يل پيكهاته‌ ته‌ڵايه‌گه‌م ته‌مام بدێ.

 

له‌لايگ تره‌و گرينگى له‌ مۆسيقاكاره‌يل فه‌يلى ده‌هه‌ق وه‌ گيشه‌گه‌مان ناوينم، جوور ئه‌وه‌گ  هونه‌ر ئى مه‌قام جوان و پيرووزه‌ دوكانيگ بوود ئه‌را جه‌مه‌وكردن ليره‌ى نه‌ختى و ئمتيازه‌يل خودى و هه‌ر له‌وه‌ر ئه‌وه‌يش زوورميان خزمه‌ت وه‌ رووشنهويرى و كيشه‌ى مه‌ردمان تر ئه‌كه‌ن!

 

چستيگ پڕ داخه‌ هه‌ناى ك دويننه‌م وه‌ ته‌نيا گيژ ده‌ريا ئه‌كه‌م و وه‌رگه‌ى شه‌پۆله‌يل ئه‌گرم، ئمجا نوڕن و چه‌وه‌ڕى چركه‌ى بيده‌نگبوينم ئه‌كه‌ن، زوورميانيش توانايه‌يل خاسيگ ديرن و ته‌نانه‌ت ستۆديۆيه‌يليش ئاماده‌كرياگن، وه‌لێ له‌يوا دياره‌ مه‌سه‌له‌گه‌ گرينگ نيه‌ له‌لايان جوور ئه‌وه‌گ له‌لاى من گرينگه‌.

 

ئيمه‌ى فه‌يليه‌يل هه‌وه‌جه‌ فريه‌يگ ديرێم ئه‌را شووڕشيگ هونه‌رى گشتى و جوور ئه‌وه‌گ ئاشكراس له‌ هونه‌ر ك زووان په‌يوه‌نديه‌ له‌ناونى ملله‌ته‌يل.

 

ئيمه‌يش زووان و شيوه‌زار و خاس و بنه‌مايه‌يل مۆسيقى خاسيگيش ديرێم، وه‌لێ ده‌سپيشخه‌رێ نه‌يرێم و له‌يراوه‌ ئاموژگارى گشتلايگ ئه‌كه‌م ك هان رووڵه‌يليان بيه‌ن له‌بان يايگرتن هونه‌ره‌يل و داهێنان تا پيكهاته‌گه‌ مانايه‌يل جوانيگ ئه‌را كۆمه‌ڵگايه‌يل زياى بكاو زينگ بمينێد و زه‌رده‌خه‌نه‌ داشتوود، هه‌ر وه‌و خاتريشه‌ ئه‌هل هونه‌رن ك به‌ش گه‌ورا له‌ به‌خته‌وه‌رى ملله‌ته‌يل دروس ئه‌كه‌ن.

 

كيشه‌يگه‌ ناڵنيم وه‌پيه‌و! ها هويرم هه‌ناى ك تواسم ئامێريگ ئۆرگ بسينم، ماڵمان نواگيرى له‌ليم كرديان له‌ سه‌ندنى و له‌و كار ناوداره‌و وتنيانه‌پيم ئه‌خوازێد شه‌عار له‌لێد ده‌ربچوود و بيلێد مه‌ردم وه‌پيمان بخه‌نن! وه‌لێ من هه‌ر مكوڕ بويم و دوياجار ئه‌و ئامێره‌ سه‌ندم و وه‌گووره‌ى رووژگار هه‌ر خود ئه‌ندامه‌يل ماڵمان بوينه‌ خاسترين هانده‌رم و خوه‌شاڵ فريه‌يگ بوين و تويه‌نستم ئه‌و ديده‌ له‌لايان ئاڵشت بكه‌م.

 

له‌لايگ تريشه‌و ئيمه‌ هونه‌ر جوور كرده‌وه‌يگ شه‌يتانى زانيم! ئى حكايه‌تيشه‌ وه‌لما له‌ حسه‌ينيه‌يگ روێدا:

له‌ناو فاتحه‌خوه‌نينيگ ئاماده‌ بويم و قه‌در له‌يوا كرد له‌ وه‌رده‌م شێخ وتارخوه‌ن دانيشم و ئه‌ويش خاس ناسيه‌م، دى وه‌بى پيشه‌كى ده‌سكرده‌ قسه‌، ئه‌ويش له‌وه‌ر ئه‌وه‌گ زه‌مانه‌ت وجوود و ژنه‌فتنم بكا وه‌رجه‌ ئه‌وه‌گ فاتحه‌ بخوه‌نم و له‌ دانيشتنه‌گه‌ ده‌ربچم، ئمجا له‌بان گورانيچڕ ده‌سكرده‌ قسه‌ ك عزرائيل هاتگه‌و گيانى بكيشێد له‌وه‌ر ئه‌وه‌گ گورانيچڕ بويه‌و فريشته‌ى مه‌رگ وه‌ شيوه‌ى رخه‌وبه‌ر و ترسهاوه‌ريگ هاتگه‌و كه‌ره‌سه‌يگ كانزايى كه‌وانه‌يى وه‌ده‌سيه‌و بويه‌و جوور ناڵ ئه‌سپ و كه‌ميگ گه‌وراتر وه‌ل ئاگردانيگ قرمه‌زه‌و بوى و خسته‌ مل گورانيچڕه‌گه‌ و ئه‌و گورانيچڕيشه‌ ده‌سكرده‌ هاوار و وت ئى تاوانه‌ چه‌س، ئايا من چشت خراويگ كردمه‌و نازانم؟

 

وه‌هه‌ر حاڵ، شێخ وه‌و قسه‌يله‌ مه‌رامى ئه‌وه‌ بوى واز له‌ وه‌رده‌وامى گورانيچڕين و هونه‌ر بارم له‌ ترس ئه‌و كه‌ره‌سه‌ى كانزايى گيانسزننه‌. دوياخريش ئامووژگاريدان ئه‌كه‌م له‌بان ئه‌وه‌گ مناڵه‌يلدان هووكاره‌ى هونه‌ر به‌ن، چوينكه‌ ئيمه‌ هه‌وه‌جه‌ وه‌پى ديرێم جوور ئه‌وه‌گ هه‌وه‌جه‌ وه‌ هه‌واو ئۆكسجين ديرێم.

سعه‌د فه‌يلى