كوچگ شادى

شفق نيوز

خوه‌ى بزانێد و وه‌جوانى جیوه‌جیى بكه‌ید، و وژدان و ده‌روین خوه‌ى ڕازى و ئاسووده‌ بكه‌ید،ِ تا بتویه‌نید وه‌گشت زووانزڕییگ داواى ماف و هه‌قه‌یل ڕه‌واى خوه‌ى بكه‌ید وه‌بى ترس سه‌رزه‌نشت كردن و گله‌یى و لوومه‌ى هویچ كه‌س و لایه‌نیگ تر؛ وه‌نه‌ ئه‌گه‌ر وه‌ى جووره‌ نه‌ود، شیرازه‌ى كوومه‌ڵگا شیویه‌ید و دوبه‌ره‌كى و ئاژاوه‌ و به‌شبه‌شه‌و بوین كه‌فیده‌ ناوبه‌ین گرووپه‌یل و تاكه‌كه‌سه‌یل و شایه‌ت زوڵم و زوور و زاڵبوین گرووپیگ یا تاقمیگ زووردار بچه‌سپیه‌یده‌ بان ئه‌وباقى ئه‌ندامه‌یل كوومه‌ڵگا؛ و ئیمه‌ى كورد و عیراقییش ئه‌زموون تفت و تیه‌ڵیگ گه‌ن له‌ى باوه‌ته‌وه‌ دیریمن؛ و ڕژیمه‌یل زاڵم یه‌ك له‌شوون یه‌ك، ده‌رد و به‌ڵاى فره‌و فراوانیگ هاوردنه‌ بان ملله‌ت و باس كردنى له‌ى باوه‌ته‌ ڕییه‌و نیه‌ود.

وه‌ك گشتمانیش زانیمن ك ئه‌قڵ و هووش گشتى كوومه‌ڵگا له‌ چوارچیوه‌ى په‌ند و شعر و وه‌سه‌رهاته‌یل جووراوجووریگ هه‌وڵ دایه‌ ئى ڕاسیه‌ بخه‌یده‌ وه‌رده‌س گشت كه‌سیگ؛ تا بووده‌ په‌ند و ده‌رسیگ و مه‌ردم وه‌گشتى عیبره‌ت له‌لى وه‌ربگرن و تاریخ خوه‌یان بخوه‌نن تاگه‌ر جاریگتر دوباره‌و نه‌ود، چوینكه‌ ده‌ین و گوناه‌ دوباره‌و بوین تاریخ كه‌فیده‌ مل ئه‌وانه‌گ تاریخ نیه‌خوه‌نن، یا وه‌گه‌نى خوه‌ننه‌ى، یا وه‌دڵئه‌نقه‌ز وه‌ چه‌واشه‌ى ڕه‌وت كاروان ژیان ڕى كه‌ن و خوه‌یان و كوومه‌ڵگایان تویش ده‌رد و نه‌هامه‌تى تیه‌رن.

له‌ى باوه‌تیشه‌ ئه‌وه‌گ له‌ پیشینه‌یلمان ئه‌رامان هاتیه‌ وه‌سه‌رهاتیگ ئه‌رادان باس كه‌یمن ك وه‌جوانى ئى مه‌عنایه‌یله‌ شیه‌وكه‌ید و خه‌یده‌ى وه‌رده‌س و چه‌و و ئه‌قڵ خاوه‌ن ئه‌قڵ و هووشه‌یل. ئى وه‌سه‌رهاته‌ باس له‌ چوار ئاوایى ده‌یشت كورده‌وارى كه‌ید ك تاكه‌ ڕیگه‌یگ له‌ناوبه‌ینیان بوى ئه‌را هات و چوویان و ئه‌را بردن سه‌وزه‌ و میوه‌جاتیان ئه‌را بازاڕ شاره‌گه‌ى نزیكیان، وه‌لى له‌ ناوڕاس ئى ڕیگه‌ى باریكه‌ كوومه‌ى گه‌ورایگ كوچگ و به‌ڕ گه‌وراگه‌ورا بوى جوور وه‌ربه‌س و ته‌گه‌ره‌ و ڕیگر، و نواى هات و چوویان گردیاد وه‌و شیوه‌ ك ئایه‌م پیاده‌ خوه‌ى وه‌زوور له‌و ڕیگه‌ ڕه‌د بویاد؛ وه‌لى هویچكامیان ئه‌قڵ ئه‌وه‌ نه‌كرد، یا زات ئه‌وه‌ نه‌یاشت مه‌ردم حالى بكه‌ید ك لاوردن ئى كوومه‌ كوچگه‌ ها له‌ خه‌یر و به‌رژه‌وه‌ندى مه‌ردم وه‌گشتى و خه‌ڵك ئى ئاواییه‌یله‌ ئاسووده‌ و ڕه‌حه‌ت كه‌ید.. تا ڕووژیگ له‌ ڕووژان ده‌وریشیگ  ك مه‌لاى یه‌كى له‌و ئاواییه‌یله‌ بوى، وه‌ولاوه‌ ڕه‌د بوى ته‌ماشاى ئى حاڵه‌ته‌كرد، دڵى وه‌ى مه‌ردم بیچاره‌ سزیا و زانست یانه‌ چ ده‌رد و به‌ڵایگ تویشیان هاتیه‌ ك به‌رژه‌وه‌ندى خوه‌یان نیه‌زانن و هات له‌ كنار ئه‌و ڕیگه‌ بار خست و سیه‌ماڵ خوه‌ى له‌ورا كوتا و هه‌ركه‌سیگ وه‌لایا ڕه‌د بویاتا وسانیاده‌ى و وه‌تیاده‌ پى ئه‌گه‌ر تواید خوه‌شى و شادى ڕوى بكه‌یده‌ ماڵد؛ كوچگیگ یا به‌ڕیگ له‌ى كوومه‌ هه‌ڵبگر و تا تویه‌نید له‌ دویرترین شوون فڕه‌ى بیه‌... وه‌ى جووره‌ ماوه‌ى فره‌یگ وه‌پى نه‌چوى ڕیه‌گه‌ پاكه‌و بوى و مه‌ردم وه‌ ئاسانى خوه‌یان و بار و چاره‌وایان وه‌و ڕیگه‌وه‌ ڕه‌د بیان!!!

 

ماجد سوێره‌مێرى