خه‌ير شه‌ڕپه‌ياكه‌ر!!

شفق نيوز

  بيگومان هويروڕای نادروس له‌ گشت كومه‌ڵگايگ هه‌ميشه‌ بويه‌سه‌ كيشه‌ی ئنسانی، وه‌لی ئه‌وه‌ك بگه‌رديده‌ شوون واقع و هويروڕای سروشتی و ئاسايی، ئه‌وه‌ بيگومان فكره‌و هوير و ڕای خوه‌ی فراوانه‌و ئه‌كا، چوينكه‌ ئه‌رای ئاشكراس ك نيمه‌ی راسی ئه‌وه‌سه‌ غه‌ڵه‌ت خوه‌د بزانيد وه‌ ڕی چه‌فتا گوزه‌ر نه‌كه‌يد، هه‌ر له‌وه‌ر ئه‌وه‌يش هه‌ركه‌سيگ له‌بان فكره‌و هويروڕای نادروس و غه‌ڵه‌ت كرده‌وه‌يلی ئه‌نجام دا جوور ئه‌وه‌سه‌ ك داريگ بكاڵيد و ريشگه‌گه‌ی قه‌يار بكه‌يد، ئنجا داريش وه‌بی ريشگ مه‌حاڵه‌ ئه‌وزه‌ڵ بكاو بايده‌ به‌ر، هه‌ر له‌وه‌ر ئه‌وه‌يش دوينيم له‌ ئاكام هه‌ر فكره‌ی خراويگ ئاكام خراويگ له‌لی كه‌فيده‌و.

له‌يرا مه‌سه‌له‌ی خه‌يرو شه‌ڕ دو كردوه‌ی دژه‌ يه‌كن، ك ڕی ئه‌ياكه‌يان له‌‌واكه‌يان‌ جياس، يه‌يش له‌ كومه‌ڵگای ئنسانی هه‌ميشه‌ وجوود داشتگه‌و ديريد، ته‌نانه‌ت گشت ئايين و شه‌ريعه‌تيگيش ئاماژه‌ وه‌پی كردنه‌ ئه‌را ئه‌وه‌ك هويچ وه‌ختی ئاده‌ميزاد نه‌كه‌فيده‌ گيچه‌ڵ ته‌نگی و رويداگه‌يل ناخوه‌ش له‌ ئاكام ئه‌نجامداين فكره‌ی نادروس و شه‌ڕخوازی.

قسه‌يگ هه‌س ك ئويشيد "گشت فكره‌يل ده‌سكرد يا شه‌ڕخوازيگ غه‌ڵه‌ته‌، ته‌نانه‌ت ك هه‌رچه‌نی ئه‌و فكره‌يشه‌ روخساره‌گه‌يشی خه‌ير بوود" چوينكه‌ ئی جووره‌ فكره‌يليگ شايه‌ت له‌ بنه‌و وه‌ خه‌ير دابنريه‌يد، وه‌لی ريڕه‌و شه‌ر بگريده‌وه‌ر.

فره‌جار نوڕيد ئاده‌ميزاد له‌ ئاكام ئه‌نجامداين فكره‌و كرده‌وه‌يليگ ك ده‌سكرد خوه‌يه‌و هوير ئنسانی له‌لی ئه‌كا وه‌ نياز ئه‌وه‌ك مايه‌ی ده‌سخوه‌شی و ريز و حورمه‌ت بوود، وه‌لی دوينيد وه‌ چه‌واشه‌وه،‌ كه‌فيده‌ وه‌ر ره‌خنه‌یل فريه‌يگ و ناڕه‌زايه‌تی فره‌يگيش له‌لی كه‌فيده‌و ته‌نانه‌ت فره‌جاريش شه‌ڕ له‌ليه‌و په‌يا بوود، هه‌ر وه‌و خاتريشه‌ دوينيم گشت فكره‌ی خه‌يريگ مه‌رج نيه‌ خه‌ير له‌لی په‌يا بوود‌، به‌ڵكوو ئاكامه‌گه‌ی وه‌ره‌و شه‌ڕخوازی ڕی گريده‌وه‌ر.

ئنجا هه‌ر فكره‌و كرده‌وه‌ی خه‌يريگيش ك شه‌ڕ له‌شوونی بوود، ئه‌وه‌ له‌ شه‌ڕ شه‌ڕتره‌، چوينكه‌ مه‌ردم وه‌و خه‌يره‌ خه‌ڵه‌تيه‌ن ده‌رئه‌نجاميشی ئه‌وه‌سه‌ ك مه‌ردم متمانه‌ وه‌و جووره‌ خه‌يريگ نه‌كه‌ن، هه‌ر له‌وه‌ر ئه‌وه‌يش ئی جووره‌ خه‌يريگ تويه‌نيم ناوی بنه‌يم "خه‌ير شه‌ڕپه‌ياكه‌ر" ك يه‌يش شوونه‌وار خراويگ هيليده‌جی له‌ڕوی ئنسانيه‌و، ئه‌را نموونه‌: دوينيم كابرای سه‌به‌بكاريگ هه‌ر له‌ خوه‌يه‌و بی ئه‌وه‌ك هويره‌و بكا له‌ ئاقبه‌ت و ئاينده‌ی كرده‌وه‌يلی، هه‌وڵ له‌يه‌ك نزيكه‌وكردن كوڕ و دويه‌تيگ ئه‌ياد وه‌خاتر پيكهاوردن ژيان هاوسه‌ری له‌ ناونيان، وه‌لی دوينيد وه‌ خاتر ئی كرده‌وه‌ دڵه‌يل تر له‌ خوه‌ی ره‌نجنيد، چوينكه‌ فره‌يگ له‌ قه‌وم وخيش ئه‌و دويه‌ته‌ يا كوڕه‌گه‌ خوه‌شی ئه‌را ئه‌و هاوسه‌رگيری ناونيانه‌ ناكه‌ن و جوور تاوانيگ ده‌نه‌ی قه‌ڵه‌م له‌وه‌ر هه‌ر هووكاريگ بوود، دی نوڕيد وه‌ چه‌و گومان و بی متمانه‌يی و دژايه‌تيه‌و ته‌ماشای كابرای سه‌به‌بكار كه‌ن، يا جار له‌يوا هه‌س بويده‌ هووكار دامه‌زرانن كه‌سيگ له‌ كارخانه‌يگ يا هه‌ر دام و ده‌زگايگ، وه‌لی دوياخر جوور ئه‌وه‌ك په‌نده‌ كورده‌واريه‌گه‌ی خوه‌مان ئويشيد"خاسی كردم وه‌خراو نيشت" په‌شيمانی له‌شوونی بوودو متمانه‌ی خوه‌د وه‌پی له‌ده‌س بيه‌يد لای ئه‌وانه‌گ متمانه‌ وه‌پی داشتن، له‌ی باوه‌تيشه‌و په‌نديگ عه‌ره‌بييش هه‌س ئويشيد" تعمل خير تلقي شر" وه‌و مانا كار خه‌ير كه‌يد وه‌لی شه‌ڕ له‌لی دوينيد.

ئيمه‌ راسه‌ ئويشيم كرده‌وه‌ی خه‌ير له‌ هه‌ر كه‌سيگه‌و خه‌ير له‌لی كه‌فيده‌و، وه‌لی نه‌ك وه‌و مانا خه‌يريگ وه‌ زه‌ره‌د كه‌سه‌يليگ تر ته‌واو بوود يا خه‌يريگ له‌وه‌ر به‌رژه‌وه‌ندی يا خه‌يريگ شه‌ڕ و خوسه‌و كينه‌ت له‌لی په‌يا بوود.

جه‌ماڵ ئه‌ركه‌وازی