سه‌رله‌نوو سه‌روه‌رییگ ئه‌را په‌رله‌مان كوردستان

شفق نيوز

كومه‌ڵكوژ له‌ لایه‌ن رژیم دیكتاتورى به‌عس سه‌ره‌نجام ئه‌نجوومه‌ن ئاسایش ناوده‌وڵه‌تى له‌ ژیر گوشار ره‌ئى عام و رێكخراوه‌یل به‌شه‌ردووس وه‌ده‌ركردن بڕیاریگ ناوچه‌یل ئارام و قه‌یه‌خه‌كردن باڵه‌و گردن ته‌یاره‌یل رژیم له‌ ناوچه‌گه‌ ده‌ركرد و رژیم به‌غدایش ئه‌را ئه‌وه‌گ گوشار بخه‌یگه‌ مل ملله‌ته‌گه‌مان سه‌رجه‌م دام و ده‌زگاگان خوه‌ى له‌ هه‌رێم كوردستان كیشاوه‌ و ملله‌ت كورد له‌  كه‌فته‌ وه‌راوه‌ر دو گه‌مارو ناوخوه‌یى و ناوده‌وڵه‌تى و تویش كیشه‌یل گه‌وراى ئابوورى و سیاسى و ئیداری هات, وه‌لى سه‌ركردایه‌تى سیاسى كورد له‌ هه‌وڵ و ته‌قالایگ بى وچان و وه‌گوره‌ى به‌رنامه‌یگ چڕوپڕ و حه‌كیمانه‌ تویه‌نست كه‌م كه‌م كیشه‌گان چاره‌سه‌ر بكا و قه‌تاره‌گه‌ بخه‌یگه‌ بان سكه‌ى راسكانى خوه‌ى و ئه‌وه‌ بوى له‌ هه‌ڵوژاردنیگ ئازاد و دیموكراسى په‌رله‌مان كوردستان دامه‌زریا و له‌ شوون ئه‌وه‌یش یه‌كمین حكوومه‌ت هه‌رێم كوردستان له‌ داڵگ بوى و هه‌ر له‌و رووژه‌و حكوومه‌ت و په‌رله‌مان هه‌رچه‌ن دوچار كیشه‌ و گرفته‌یل و گوشاره‌یل هه‌رێمى و ناوده‌وڵه‌تى هات وه‌لى هه‌میشه‌ له‌ خه‌م دابین كردن ژیانیگ خوه‌ش و ئارام ئه‌را هاووڵاتییه‌یل ناو و ده‌یشت هه‌رێم بوى، هه‌رچه‌ن ناوچه‌یل كوردستانى ده‌یشت هه‌رێم له‌وساوه‌ تا ئیسه‌ هاله‌ بان ناوچه‌یل ژیر ده‌سه‌ڵات حكوومه‌ت فدرالى وه‌لى حكوومه‌ت هه‌رێم هه‌رگز خافل له‌ خزمه‌تگوزارى ئه‌را ئى ناوچه‌یله‌ نه‌ویه‌ و هه‌رساڵ به‌شیگ له‌ بوودجه‌ى ساڵانه‌ ئه‌را ئاوه‌دانی و خزمه‌تگوزارى و ده‌سه‌یه‌تداین هاوزووانه‌یلمان ته‌رخان كردگه‌ و مه‌ردم ئه‌و ناوچه‌یلیشه‌ خوه‌یان شایه‌تى ئه‌را ئى خه‌مخوه‌رى نه‌ته‌وه‌ییه‌ ده‌ن. ئمساڵیش هه‌رچه‌ن حكوومه‌ت و په‌رله‌مان تویش كیشه‌ و گرفته‌یل فراوانیگ بوین وه‌لى جوور گوزه‌یشته‌ ئه‌ندامه‌یل فراكسیۆن كوردستانی وه‌ته‌قالاى فه‌ره‌یگ تویه‌نستنه‌ به‌شیگ له‌ بوودجه‌ى ئمساڵ ئه‌را ناوچه‌یل ده‌یشت هه‌رێم دیاری بكه‌ن هه‌ر وه‌و جووره‌گ عه‌لى حوسێن فه‌یلى ئه‌ندام په‌رله‌مان كوردستان سه‌روه‌ فراكسیۆن كوردستانى له‌ ته‌سریحیگ ئه‌را ده‌زگایه‌یل ره‌سانن ئویشیگ: په‌رله‌مان كوردستان وه‌زورم ده‌نگه‌یل گوژمه‌ى 70 ملیارد دینار له‌ بوودجه‌ى ئمساڵ هه‌رێم ئه‌را ناوچه‌یل ده‌یشت هه‌رێم كوردستان و هه‌میش 100 ملیارد دینار ئه‌را ناوچه‌یل سنوورى زه‌ره‌رمه‌ند ته‌رخان كردگه‌. فه‌یلى زیاتر ئویشیگ: ئه‌و دو گوژمه‌ له‌ بوودجه‌ى ته‌شغیلى گیریاگه‌ و هه‌میش په‌رله‌مان ده‌نگ داگه‌ له‌ بان جیوه‌جى كردن ده‌یان پروژه‌ى ئاوه‌دانى و خزمه‌تگوزارى له‌ ناوچه‌یل ده‌یشت هه‌ریم.

وه‌ڕاسى په‌رله‌مان كوردستان وه‌ى بڕیاره‌یل ئى جاریشه‌ خه‌مخوه‌رى خوه‌ى ئه‌را هاوزووانه‌یلمان له‌ ده‌یشت هه‌رێم سه‌لماند و سه‌روه‌رییگتر له‌ مێژوو كوردستان ئه‌را خوه‌ى تومار كرد و هاووڵاتییه‌یل كوردیش وه‌تایبه‌ت كورده‌یل فه‌یلى سوپاس و ده‌سخوه‌شى له‌ ئه‌ندامه‌یل په‌رله‌مان وه‌تایبه‌ت ئه‌ندامه‌یل فراكسیۆن كوردستانى كه‌ن و نموونه‌یان هه‌ر زیاى بوود.

 

جواد كازم فه‌یلى