هویچ قسه‌یگ له‌باوه‌ت كورده‌یل فه‌یلى نیه‌

شفق نيوز

ده‌مكوتكردن هاتن، و ئى حاڵه‌ چه‌ن ده‌یه‌یگ كیشا، و كه‌ناڵه‌یل ڕه‌سانن ناوخوه‌یى و ده‌ره‌كییش  فره‌ باس ئى تاوانه‌یله‌ كردن، وه‌لى ئه‌وه‌گ تویش كورده‌یل فه‌یلى هات له‌گشت چین و لایه‌نیگ تر زیاتر بوى.چوینكه‌ ئى چینه‌ تویش كاره‌ساته‌یل فره‌یگ هات و وه‌ زووره‌ملى كووچوه‌پیان كردن و ڕه‌گه‌زنامه‌ له‌لیان بردن و هه‌رچى وه‌ره‌قه‌ و مسته‌مسه‌كات ڕه‌سمیه‌ له‌لیان بردن جوور جنسیه‌ و شه‌هاده‌ى جنسیه‌ و سه‌نه‌ده‌یل موڵكه‌یلیان، ئه‌وه‌ بیجگه‌ چه‌پاوكردن داراونه‌دارایان، وه‌لى كه‌س له‌ى باوه‌ته‌ نه‌هاته‌ زووان و قسه‌یگ نه‌كرد، وه‌تایبه‌تى له‌ كه‌ناڵه‌یل ڕه‌سانن، چمانى هویچ نه‌وى و هویچ نه‌كریا.

له‌وه‌ختیگ ك كاره‌سات كورده‌یل كاره‌سات گه‌ورا و كه‌موینه‌یگ بوى و شایسته‌ى ئه‌وه‌ نه‌وى ك وه‌ى جووره‌ پشتگووش بخریه‌ید و سڕپوو بكریه‌ید له‌ شوون ئه‌وه‌گ له‌ ماڵ و له‌وڵات خوه‌یان وه‌زوور ده‌ركریان و فڕه‌یان دریا ئه‌ودیم سنوور وڵات ئیران له‌ناوڕاس كێڵگه‌یل مین (حقول الالغام) ك فره‌كه‌س له‌لیان بوینه‌ قوربانى، بیجگه‌ ئه‌وانه‌گ له‌ ورسێتى و تینێتى له‌ ڕیگه‌ مردن .. و كه‌سیش باسیان نه‌كرد.

جایڵه‌یل كورده‌یل فه‌یلى خزمه‌ت عه‌سكه‌رى خوه‌یان كردن و گوڵ جایڵ جوانى خوه‌یان له‌ وه‌رگرى كردن له‌ عیراق سیسه‌وكردن له‌ جه‌نگ ناونى عیراق و ئیران ، و له‌جیاتى پاداشت و خه‌ڵات كردنیان وه‌ك پاڵه‌وان جه‌نگ، تویش ده‌سگیركردن و زندانى كردن هاتن و ئنجا بى شوون و نوین كریان له‌ قه‌ورسانه‌یل ده‌سه‌جه‌مى، ك تا ئیسه‌یش كه‌س نیه‌زانى هانه‌ كوو؟ و كه‌س باسیان نیه‌كه‌ى.

ئه‌یه‌ گشتى به‌ڵگه‌ و ده‌لیله‌ ك حكوومه‌تیش كێشه‌ى كورده‌یل فه‌یلى پشتگووش خستیه‌ و په‌رله‌مانیش ناویان نیه‌تیه‌رى، له‌وه‌ختیگ ك دوینیمن كه‌ناڵه‌یل ڕه‌سانن سه‌رقاڵ كێشه‌یلیگ ده‌ره‌كیه‌ و خوه‌ى دویره‌و خستیه‌ له‌ مه‌ینه‌ت هاووڵاتیه‌یل عیراقى و وه‌تایبه‌تى كورده‌یل فه‌یلى ك هیمان تویش مه‌ینه‌تیه‌یل گه‌ورایگ هاتنه‌ له‌وه‌خت سه‌رداین فه‌رمانگه‌یل ده‌وڵه‌ت ئه‌را وه‌رگردن شه‌هاده‌ى وه‌فات قوربانیه‌یلیان، و هویچ كه‌سى باس فه‌یلیه‌یل نیه‌كه‌ى

ته‌ماشا كه‌یم ك میدیاى حكوومى سه‌رقاڵه‌ وه‌وه‌گ له‌ لیبیا ڕوى ده‌ید  یا له‌ وڵاته‌یل عه‌ره‌بى تره‌ك و هویچ ماوه‌ و ڕوى وه‌ریگ ئه‌را كێشه‌یگ گرنگ  نه‌یرى؛ جوور ساڵیاد 31 ساڵه‌ى ده‌ركردن كورده‌یل فه‌یلى، ئه‌یه‌ له‌ لایگ و له‌لایگتر سه‌رۆكایه‌تى ئه‌نجوومه‌ن نوێنه‌ره‌یل قه‌بوول نیه‌كه‌ید به‌یاننامه‌یگ وه‌ى بوونه‌وه‌ بخوه‌نریه‌یده‌وه‌ وه‌مه‌هانه‌ى ئه‌وه‌ ك نیه‌ود په‌رله‌مان بكریه‌یده‌ مه‌نبه‌ریگ ئه‌را خوه‌نستن به‌یاننامه‌ و وتار، و یه‌یشه‌ دوچه‌وه‌كى كردن ئاشكرایگه‌، چوینكه‌ ڕووژانه‌ به‌یاننامه‌ له‌ په‌رله‌مان خوه‌نریه‌یده‌وه‌، وه‌لى به‌یاننامه‌یگ سه‌باره‌ت وه‌ چین گه‌ورایگ جوور چین كورده‌یل فه‌یلى گووش وه‌پى نیه‌دریه‌ید، هه‌رچه‌نى ك بایه‌ته‌ ئه‌نجوومه‌ن نوێنه‌ره‌یل بى لایه‌نى خوه‌ى نیشان بیه‌ید له‌ بڕیارداین، و هویچ قسه‌یگ له‌باوه‌ت كورده‌یل فه‌یلى نیه‌.

شایان باسه‌ ك دادگاى باڵاى تاوان بڕیاریگ ده‌ركرد ئه‌وه‌گ تویش كورده‌یل فه‌یلى هات وه‌ده‌س ڕژیم وه‌رین وه‌ جینۆساید دا قه‌ڵه‌م، و له‌ شوون ئى بڕیاره‌ ڕیزدار مه‌سعود بارزانى سه‌رۆك هه‌رێم كوردستان داوا له‌ گشت لایه‌نه‌یل په‌یوه‌ندیدار كرد له‌ عیراق فیدرالى و هه‌رێم كوردستان ك بكه‌فنه‌ شوون هه‌رچشتى خزمه‌ت ڕه‌سنیده‌ دادپه‌روه‌رى وه‌ هه‌ق كورده‌یل فه‌یلى له‌ گشت مه‌یدانیگه‌وه‌ تا ماوه‌ بدریه‌یده‌ پیان قه‌ره‌بوو خوه‌یان وه‌ربگرن و هه‌رچى هه‌ق خوریاى خوه‌یانه‌ بارنه‌وه‌ ك له‌ لایه‌ن ڕژیم وه‌رینه‌وه‌ چه‌پاوكریا و بایه‌تیشه‌ ئاسانكارى ئه‌رایان بكریه‌ید تا ڕۆتین بشكیه‌ید و ته‌گه‌ره‌ى نواى معامه‌لاتیان لاوریه‌ید.

 

ن: مه‌حه‌مه‌د عه‌لى سه‌ماوى

 

ت: ماجد سوره‌مێرى