ئايا نازانيد دونيا ده‌ورانه‌؟!

شفق نيوز

رووژه‌يليگيش تيه‌يد باس له‌ عه‌يبه‌ی مه‌ردم ئه‌كه‌يد و هه‌وڵ له‌كه‌داركردن شانيه‌ت و كه‌رامه‌ت مه‌ردم تر ئه‌يه‌يد وه‌بی هووكار. ئايا نيه‌زانيد دونيا ده‌ورانه‌؟

رووژه‌يليگ دوينيد خه‌ير له‌وه‌رده‌مد گومه‌ و شه‌ڕ باڵاده‌سه‌ و تنيش توانای هويچ كرده‌وه‌يگ نه‌يريد، ك ئايا ئی شه‌ڕه‌ نيه‌زانيد دونيا ده‌ورانه‌؟

رووژه‌يليگ هه‌ن خوه‌شه‌ويسی روی له‌ كزی ئه‌كاو مه‌ردمانيگ هه‌ن خوسه‌و كينه‌ت له‌ناونی مه‌ردمان تر به‌شه‌و ئه‌كه‌ن ته‌نيا له‌وه‌ر وه‌ريفرووشی و ئاشووگه‌ری. ئايا ئی جووره‌ كه‌سه‌يله‌ نيه‌زانن دونيا ده‌ورانه‌؟

رووژگاريگ هه‌س هه‌وڵ ئه‌وه‌ ئه‌يه‌يد بنيات گشت چشتيگ بنه‌يد له‌ ژياند له‌بان خاسی و خوه‌شه‌ويسی و دڵسووزی و قوربانی، وه‌لی وه‌ ته‌نيا غه‌ڵه‌تيگ شكه‌ست خوه‌يد و كه‌فيده‌ تی وه‌ بوونه‌ی كه‌سيگ شكه‌ست و بی ئه‌زموون ك رووژگار فريه‌يگيش دووس و ره‌فيقد بويه‌و حاشا له‌و دووسايه‌تيه‌ كرد. ئايا له‌يوا كه‌سيگ نازانيد دونيا ده‌ورانه‌؟

وه‌خته‌يليگ هه‌س وه‌ كه‌سيگ خه‌نيد و سووكايه‌تی وه‌پی كه‌يد و هه‌وڵ ده‌رخستن عه‌يبه‌يلی ده‌يد!

ئايا غافڵيد له‌وه‌ك دونيا ده‌ورانه‌؟

بايه‌سه‌ ئه‌وه‌ بزانيد ك ئی دونيا وه‌ چه‌پ و راس چه‌رخيد و تاسه‌ر وه‌ كام كه‌س نيه‌و دڵخوه‌شی نه‌يريد و جی باوه‌ڕ و متمانه‌ نيه‌و له‌ناكاو گورز سه‌ختيش له‌ تنيش وه‌شنيد.

ئه‌گه‌ريش زانيد ئی دونيا ده‌ورانه‌، خو بايه‌سه‌ له‌ خوه‌د بپرسيد من چه‌م؟ بايه‌سه‌ هويرد له‌ قسه‌ی خوه‌د بوود، ك شايه‌ت جارجاريگ ئه‌و قسه‌ ئاسايی بوود له‌لای خوه‌د، وه‌لی كه‌سه‌يل تر گومان له‌لی بكه‌ن. شايه‌ت جار له‌يوا هه‌س هوير له‌وه‌ بكه‌يد وه‌ وتن هه‌واڵيگ دڵخوه‌ش كه‌سه‌يل تر بكه‌يد، وه‌لی كه‌سه‌يل تر وه‌پی زه‌خمدار بكه‌يد و نه‌زانيد عاقبه‌تی چه‌ بوود؟

مانای ئه‌وه‌سه‌ هويچ وه‌ختيگ مه‌گه‌رده‌ شوون كه‌م وكوڕی مه‌ردم و هه‌وڵ له‌كه‌داركردن هويچ كه‌سيگ مه‌يه‌و كه‌سيش بی عه‌يب نيه‌و ئه‌وه‌يشه‌ بزان ك ئی دونيايشه‌ ده‌ورانه‌.

به‌ريق جيهاد

ج . أ