باوه‌ش ئه‌شره‌ت

شفق نيوز

 

ئه‌زموون مانگيگ له‌ هه‌ڵوژاردن دڵنيام كرد ك تاك كورد له‌ باوه‌ش ئه‌شره‌ت فيشتر له‌ هويچ شوونيگ تر هس وه‌ دڵنيايی ناكا. ده‌وڵه‌ت ئه‌را هاووڵاتی كورد ده‌وڵه‌ت كوردستان نيه‌ ك گشتيان خاوه‌ن ئه‌رك و ماف بوون و هس وه‌ وه‌رپرسيارێتی بكه‌ن، چوينكه‌ ئه‌شره‌ت هه‌ميشه‌ ئه‌و ئاماده‌گيه‌ ديريد پشتگيری له‌ ئه‌ندامه‌يل خوه‌ی بكاو له‌ هه‌ڵوژاردنه‌يل كانديدی بكاو وه‌ گه‌ره‌نتی به‌رزيه‌و بكاو له‌ نه‌خوه‌شخانه‌ وه‌رده‌م غورفه‌ی پزيشك ئه‌رای بگريد و ئه‌گه‌ر هه‌وه‌جه‌يش داشتوود جه‌نگيش له‌بانی بكا، يا سوڵح ئه‌شايری ئه‌رای بكا له‌ هه‌ر وه‌ختيگ چشتيگ له‌ ده‌سی قه‌وميا.

هه‌ر وه‌و خاتريشه‌ مه‌ندنه‌وه‌ له‌ چوارچيوه‌ی ئه‌شره‌ت له‌ كوردستان دڵنيايی فيشتر ئه‌ياده‌ ئاده‌ميزاد كورد. له‌وه‌خت پرووسه‌ی هه‌ڵوژاردنيش كانديده‌يل گورج ناو ئه‌شره‌ته‌يليان لكننه‌ ناوه‌يليان و دی مه‌كينه‌ی ئه‌شره‌ت ئه‌كه‌فيده‌ كار ئه‌را سه‌رخستن ناو ئه‌شره‌ت و كانديده‌گه‌ی، ئمجا ئه‌را ئه‌شره‌ت گرينگ نيه‌ ئه‌و كانديد ريزداره‌ چه‌سه‌و چه‌ بويه‌، له‌ گوزه‌يشته‌ خزمه‌ت رژيم به‌عس كردگه‌ يا نا، گرينگ به‌رزگرتن ناو پيرووز ئه‌شره‌ته‌.

له‌ كوردستان مێژوو هه‌ميشه‌ خوه‌ی دوباره‌ ئه‌كاده‌و، وه‌لی وه‌ شيوه‌يگ كۆميدی و كورديش هويری كزه‌. له‌ ساڵه‌يل هه‌يشتا سه‌دام حسێن تويه‌نست سوپای فريه‌ گه‌ورايگ له‌ كورد دروس بكاو ناوی نا ئه‌فواج خه‌فيفه‌. ئی فه‌وجه‌يل سووكه‌ زوورميان له‌لايه‌ن به‌شيگ له‌ سه‌رۆك ئه‌شره‌ته‌يل كورده‌و بريانه‌ رييه‌و، بڕيگيش له‌ليان به‌شداری ئاشكرايگ كردن له‌ ئه‌نفالكردن، ئمڕوويش ئه‌شره‌ت ئی ره‌ونه‌ق خوه‌يه‌ له‌ده‌س نه‌ياگه‌و زوورم كانديده‌يل ك هه‌ڵگر باوه‌ڕنامه‌ی به‌رزن ئه‌را سواڵكردن ده‌نگ سه‌ردان سه‌رۆك ئه‌شره‌ته‌يل كرديان، دی ئه‌وه‌ له‌ هويريان چی ك ماوه‌ی چه‌ن ساڵيگه‌ له‌ شاشه‌ی ته‌له‌فزيۆنه‌يله‌و باس دادپه‌روه‌ری كوومه‌ڵايه‌تی و ماف و يه‌كسانی ئه‌كه‌ن له‌ناو كوومه‌ڵگا.

ئويشن گوزه‌يشته‌ ئيسه‌و ئاينده‌ دروس ئه‌كا، ئه‌يه‌ ئه‌را ئيمه‌ی كورد له‌ دروو گه‌ورايگ فيشتر نيه‌، چوينكه‌ گوزه‌يشت سيه‌ له‌يرا ئاينده‌ی گه‌شيگ ئه‌را كه‌سانيگ دروس ئه‌كا، با مناڵ شه‌هيد و پێشمه‌رگه‌يش هه‌ر هاوار بكه‌ن و بويشن باوگم پێشمه‌رگه‌ی ئه‌يلوول و گوڵان و شووڕش تازه‌ بويه‌.

ئمجا پيشنيار من ئه‌را ئه‌وانه‌ك ئه‌خوازن له‌ ئاينده‌ خوه‌يان كانديد بكه‌ن ئه‌را هه‌ر چشتيگ، ئه‌گه‌ر ئه‌شره‌ت و پويل نه‌يرن خاستر ئه‌وه‌سه‌ ئه‌و ئه‌زموون ئيمه‌ دوباره‌وه‌ نه‌كه‌ن، چوينكه‌ له‌ی وڵاته‌ حزب كار ئه‌را مناڵ ئه‌شره‌ت ئه‌كا له‌وه‌ر ده‌نگه‌يلی، مه‌ردميش ئه‌وه‌ وه‌پی خوه‌شه‌و له‌سای وچان ئه‌ياد. هه‌ر وه‌و خاتريشه‌ دياره‌ ئاده‌ميزاد كورد ته‌نيا له‌ باوه‌ش ئه‌شره‌ت ئه‌تويه‌نيد بڕه‌سيده‌ ئامانجه‌يلی.

تامان شاكر

ج . أ