تاوانه‌يل پاكسازی ره‌گه‌زی و له‌ناوبردن وه‌جه‌م دژ پيكهاته‌يل عراقی، تاكه‌ی؟

شفق نيوز

 

ئه‌وه‌ك هاته‌ تويش ئی پيكهاته‌يله‌ تاوانه‌يليگه‌ هويچ نه‌ريتيگ ئنسانی و ئايينی وه‌پيه‌و نيه‌و تاوانه‌يليگه‌ پاكسازی ره‌گه‌زی و له‌ناوبردن وه‌جه‌م و ئه‌وه‌كيش ئيسه‌ روی ئه‌ياد ئاڵشتكردنيگه‌ له‌ شيواز مه‌ردمی له‌ پاريزگای نه‌ينه‌واو شوونه‌يل تر و ده‌سگرتنه‌ له‌بان زه‌وی وزار و ماڵ وموڵك مه‌ردم له‌ی ناوچه‌يله‌و وه‌رده‌واميداينه‌ وه‌و كرده‌وه‌يله‌ ك رژيم وه‌رين په‌يڕه‌وی كرد وه‌ناو نه‌ته‌وه‌و ئيسه‌يش ترۆريسته‌يل داعش خوازيارن ئه‌و شيوازه‌ ته‌مام بكه‌ن وه‌ناو ئايين.

ئيمه‌ له‌وه‌ختيگ ك وه‌ تونی ئدانه‌ی ئه‌و تاوانه‌يل دڕندانه‌ ئه‌كه‌يم، ئاشكاری هاوكاريمان ئه‌كه‌يم وه‌ل قوربانيه‌يل و داوا له‌ ده‌سڵاته‌يل عراقی و كوومه‌ڵگای ناوده‌وڵه‌تی ئه‌كه‌يم گشت ده‌سميه‌تيگ بڕه‌سننه‌ قوربانيه‌يل ئی تاوانه‌يل گه‌وراو پشتگيری له‌ خاوه‌ن نه‌ريته‌يل و ئاشتيخوازه‌يل بكه‌ن له‌ گشت نه‌ته‌وه‌و ئايين و مه‌زه‌وه‌يل جياجيا و گشت پيكهاته‌و چينه‌يل ناوچه‌گه‌، يه‌يش له‌وه‌ختيگ ك هه‌ڵويست كوومه‌ڵگای ناوده‌وڵه‌تی به‌رز نرخنيم له‌وه‌رانوه‌ر ئی تاوانه‌يل دڕندانه‌.

ئيمه‌ی كورد فه‌يلی تويش سياسه‌ت و تاوانه‌يل پاكسازی ره‌گه‌زی به‌رنامه‌دار و تاوانه‌يل له‌ناوبردن وه‌جه‌م ريكخرياگ هاتيم ك ده‌وڵه‌ت عراقی ئه‌نجاميدا وه‌ هانداين سه‌ركرده‌يل گه‌ورای عراقی و له‌وانه‌يش تارق عه‌زيز جوور ئه‌وه‌ك يه‌كيگ له‌ برايه‌يل سه‌دام حسێن باسی كرد له‌وه‌خت دادگاييكردنی وه‌ تومه‌ت تاوانه‌يل كوشتن و كووچ وه‌پيكردن كورده‌يل فه‌يلی، ك وه‌ده‌سی عراقيه‌يل جيوه‌جی كريا له‌دژمان هه‌ر له‌سه‌ره‌تای دامه‌زراننی له‌وه‌خت ياسای ره‌گه‌زنامه‌ ك جوور "ته‌به‌عيه"‌ی ده‌وڵه‌ته‌يل تر هساو كريايم و ده‌سكريا كووچ وه‌پيكردنمان له‌ ناوڕاس ساڵه‌يل سی سه‌ده‌ی وه‌رين و كه‌مه‌ مه‌مه‌ په‌ره‌ سه‌ند له‌سای رژيم وه‌رين و ئه‌را ماوه‌ی سێ ساڵ وه‌رده‌وام بوی هه‌ر له‌ساڵ ١٩٦٩ تا ١٩٧٢، دويای ئه‌وه‌يش بويه‌ پيسترين كووچ وه‌پيكردن و كوشتن و گرتن دژ فيشتر له‌ ٦٠٠ هه‌زار هاووڵاتيه‌يل بيتاوان عراقی و هه‌ر وه‌رده‌وام بوی ئه‌را ماوه‌ی ١٠ ساڵ هه‌ر له ٤/ ٤ / ١٩٨٠ تا ١٩٩٠.

گشت ئی كرده‌وه‌يليشه‌ له‌سای بيده‌نگی كوومه‌ڵگای ناوده‌وڵه‌تی و هووكاره‌يل ره‌سانن جه‌هانی و بيده‌نگی حكوومه‌ته‌يل و ريكخرياگه‌يل عه‌ره‌بی و ئسلامی ئه‌نجام گرت ك له‌تی تاوانه‌يليگ ده‌رهه‌ق ژن و مناڵ و فيشتر له‌ ٢٠ هه‌زار جايه‌ڵ جوانه‌يلمان ئه‌نجام درياو تائيسه‌يش چاره‌نويسيان ديار نيه‌و گشت ماڵ و موڵك و به‌ڵگه‌يلمانيش زه‌فت كرياو ئيسه‌يش كيشه‌يل فريه‌يگ ئه‌رامان دروس كردگه‌ بيجگه‌ مه‌ويسی و ژان و زه‌خم قويل ك هووكاره‌گه‌ی رژيم ديكتاتۆری بوی وه‌ سياسه‌ته‌ ترۆريستی و تاوانه‌ دڕنده‌گه‌ی ده‌رهه‌ق نه‌وه‌يل وه‌رين و ئيسه‌مان ئه‌را ماوه‌ی فيشتر له‌ ٣٥ ساڵ.

هه‌ر وه‌و خاتريشه‌ ئيمه‌ی كورد فه‌يلی فيشتر له‌ كه‌سه‌يل تر هس وه‌ مه‌ينه‌تی برايه‌يل ئێزيدی و مه‌سيحی و توركمان و كاكه‌يی و شه‌بك ئه‌كه‌يم له‌ نه‌ينه‌واو شوونه‌يل تر له‌ ئاكام ئه‌و تاوانه‌يل پاكسازی ره‌گه‌زی و ئايينی و له‌ناوبردن وه‌جه‌مه‌ ك ترۆريسته‌يل داعش و هاوپه‌يمانه‌يلی له‌ دژيان ئه‌نجامی ئه‌يه‌ن.

ئمجا ئايا دی كه‌ی ده‌وڵه‌ت عراق مه‌رزيگ دياری ئه‌كا ئه‌را تاوانه‌يل پاكسازی ره‌گه‌زی و له‌ناوبردن وه‌جه‌م دژ پيكهاته‌يل عراقی ك له‌ بنه‌ڕه‌ته‌و ده‌س عراقيه‌يل سه‌ر وه‌ ده‌وڵه‌ت عراق وه‌رين ها له‌تی يا سه‌ر وه‌ هيزه‌يل ترۆريستی داعشن؟

يه‌كێتی ديموكرات كورده‌يل فه‌يلی

ج . أ